يعطيك العافيه على الموضوع
لو تشوف شواع معيذر الجنوبي شوارع جديده كانك في الجبيهه (الاردن)
كل كم متر ارتفاع ونزول (الاردن منطقه جبليه ولكن قطر رمليه وسهله تسوية الشوارع فيها )
لكن لايوجد في الموقع الا مهندس الشركه فقط
|
يعطيك العافيه على الموضوع
لو تشوف شواع معيذر الجنوبي شوارع جديده كانك في الجبيهه (الاردن)
كل كم متر ارتفاع ونزول (الاردن منطقه جبليه ولكن قطر رمليه وسهله تسوية الشوارع فيها )
لكن لايوجد في الموقع الا مهندس الشركه فقط
هلا بك أخ ريان
في الأُردن يا اخوي تم بناء نفقين فوق بعض واحد شرق غرب متجه والآخر شمال جنوب، وفوقهم دوار لكافة الإتجاهات، وكل هذا تم في فترة قياسية، واستجلبوا فريق تفجير خاص أمريكي علشان يفتت صخور الجبل، وأنهوا الشغل كامل بالزراعة والصبغ في شهرين وعشرين يوم مع ان فترة العقد كانت 3 شهور و10 أيام .. يعني وفروا 20 يوم وخذوا بدالها مبلغ إضافي جائزة تخليص الشغل بسرعة عن كل يوم مبلغ معين ما اذكره، وإحنا أرضنا يحفرها الواحد لو حفص بالغلط ويمكن يطلع بترول، وشوف المقاولين شلون يشتكون من الحفر لا والتفجير ممنوع ومسموح في المناطق البعيدة فقط.
مدام فيها ازالة وفيها تخطيط مستقبلي ياخي باسوي ازالة صح علشان احط
شوارع وباركنات صح اما ازيل عقبه مايكفي اللي بنيته وارد ازيل واظبط
باتأخر وبأخر العالم ومشاريعي بتوقف لازم فيه حزم في هل الامور
والله مـا يشحنّـي راع الكبـر والــزوم
وراع الجمـيـل الـلـي يـمــنّ بجمـيـلـه
الطـيـب يتـعـب كــل قــرمٍ وشغـمـوم
ومايـكـسـبـه راع الـيـمـيـن البـخـيـلـه
ورفيـقـي الـلــي مانفـعـنـي ولا يـــوم
خـيـر مــن رفقـتـه شــوف الحلـيـلـه
المشاركة الأصلية كتبت بواسطة مخاوي الشيبة
بنحاول نتصيد حق بعض المباني اللي مخلينها شبه داخله في الشارع، ومباني تنهدم وهي بعيده وبدون سبب واضح .. وأتمنى مساهمتكم بصور توضيحية أفضل.
هذه صورة جوية من قوقل إيرث، وواضح فيها شارع استاد خليفة وجزء من العزيزية، والأرض الفضاء في زاوية التقاطع الحيوي الواقع جنوب شرق ستاد خليفة، توجد في أسفل هذه الأرض محطة كُبرى للدفاع المدني، ويلاحظ المشاهد أن هناك شويرع طويل وضيق ويمر على تقاطعات كثيرة في داخل منطقة سكنية، ومعروف أن سيارات الدفاع المدني يجب أن تكون قريبة من شبكة الطرق الرئيسية لسهولة خروجها ووصولها لأي مكان، وليست مخفية داخل منطقة سكنية، وفي حالة خروج سيارات الإطفاء بسرعة ومرورها على هذه الطرقات الضيقة ستحدث لا قدر الله حوادث وإزعاج مستمر لأهل المنطقة القريبة.
فهذا سوء تخطيط ومجاملة لصاحب الأرض والأولى كان وضع محطة الإطفاء في زاوية التقاطع المذكور أعلاه بحيث تستطيع آليات الإطفاء أخذ أي إتجاه والسير بسرعة لموقع الحريق، والآن هذا التقاطع مزدحم فلو أخذته سيارات الإسعاف أو الإطفاء من نهايته وقت الإزدحام لمر وقت طويل لتصل إلى بداية التقاطع.
وأرجو أن تكون واضحة الصورة فهي خير دليل على تخبيط حديث وليس تخطيط حديث.
الصورة هذي حق حل كارثي لحماية الكاميرا.
وشكل ما انتوا شايفين واضعين أعمدة حديدية صلبة وثابتة في الأرض، وهذا يتسبب في إصطدام مباشر بشي حاد لدرجة ان الصدمة تتركز على خط واحد فيكون كالسكين يقطع الحديد، وما صار والله يعتبر تهبيش هندسي وما حطوا أي اعتبار للروح البشرية، وكانت فيه حلول تحمي الطرفين.
وعلى فكرة هذي الحلول قديمة عندنا وإنحطت قبل أعمدة خرسانية دائرية وسببت حوادث مميته ومصرين عليها، وصدقوني من ابتدع هالحل هو مهندس طرق قطري خريج أمريكا، وهالحل مستحيل يتطبق في دول متقدمه، وممكن يسوون حماية بس تكون للطرفين، وكان ممكن يسون رصيف مرتفع وعليه يركبون الكاميرا، رصيف يكون مثل الحواجز الخرسانية وفي بدايته يخلون حديد أو بلاستك ماص للصدمات المباشرة.
وتفضلوا الصورة
زين بلادنا فيها زوار ومقيمين ومواطنين، وواجب المسؤولين عن أُمور الطريق حماية الجميع، ووضع عائق مميت ممكن يدخل الدولة في قضايا ومطالبات من الناس اللي فاهمة قوانين الطرق الدولية في حال حدوث حادث قوي لأحدهم، وهذا غير عن الصورة الغير حضارية اللي يعكسها هذا الإجراء على طرق بلادنا.
وأشغال تتكلم بالمليارات وما عندهم حلول جذريه صح غير حق هذي المشكلة؟ ووين الخبراء؟ ولا مشغولين عن موضوع مهم وخطير.
بعيني شفت في السابق حادث للخرسانة اللي حول إشارات شارع السد السابقة قبل التعديل الحالي اللي هو صح، ليش نرجع نكرر الغلط؟ هل لا توجد دراسات واحصائيات؟ وهل مهندسينا وإدارينا تخفى عليهم هذه الأُمور أو لم يتعلموها في جامعاتهم؟ أو هل تخصصاتهم غير وتورطوا في شغلة بالكامل غير؟ ... شرايكم يا اخوان؟
هلا اخوي معماري قطر , ويشرفني اني اكون من المشاركين بموضوعك ..
بما اني يوميا امر على شارع الريان باتجاه سوق واقف , وكانت ملاحظتي نفس ملاحظتك بأن مشروع مشيرب قريب جدا من الشارع , وفعلا التوسع فيه صعب جدا على الوضع الحالي , الا اذا صارت استملاكات جديدة للبيوت او القصور القديمة الموجودة على الشارع وردم المواقف الارضية اللي بجنب المسجد الكبير فيمكن يكون الوضع مختلف , لكن على الوضع الحالي وبدون اي استملاكات , اتوقع هالشارع يصير باتجاه واحد باتجاه سوق واقف واغلب الشوارع المحيطة اتوقعها راح تكون باتجاه واحد ..
اما بالنسبة للحواجز اللي حامين فيها الرادار , شفتها وتعجبت , لهذي الدرجه ارواح الناس ارخص من راداراتهم ..
سوء تخطيط واضح جدا , المهندسين والمسؤولين نظرتهم ماتتعدى باب مكاتبهم , شوارع تصير حق سنه وسنتين , وبترد تصير ازمة نفس اللي صاير في اغلب الانفاق والجسور اللي ماكملت كم سنة , والمشكلة حتى هالجسور والانفاق ماسلمت من من سوء التصميم , عيل افتح خط سريع مخارجه اما اشارات او دوار ..
هلا وغلا إخوي السهم وانا اللي أتشرف بأمثالك الغيورين على مصلحة بلادهم.
وتعودنا من أشغال إن إهتم حد وتكلم إن يقول أعذار واهية، مثل هذي مشاريع من زمان استوت وقبل الإدارة الحالية .. هذي أساليبهم في الردود، وحتى الجرايد نكتب لها مقال متكامل وبالصور ولا ينشرونه .
اليوم مريت صوب طريق سلوى، وشكل ما يقولون العور على العميان باشا، فالشركة اللي تشتغل في التقاطعات شغالة لحد الآن زين، لكن تجي مكان مغطى زين وفجأة مكان مفتوح يخلي الفضولين من السواقين وطبعاً انا أولهم يطالعون شصاير وينسون الطريق، وهذي حماية ناقصة لذلك يفترض عزل مكان العمل بحواجز وبسواتر فوقها عن الرؤية.
ومرة على شارع الوعب قبل تقاطع السودان وهم يخلصون الشارع، لاحظت أحد العمال يقص رصيف بمنشار كهربائي على طرف الطريق والغبار يتطاير على السيارات، تتخيل معاي الوضع انت والقاريء الكريم؟ صدقني يمكن أجهل الجهلاء بيضبط عماله إنهم يشتغلون ببعد مناسب أقل شيء ولا يقصون رصيف والغبار وقطع من الرصيف تتطاير على السيارات وهم على بعد حول متر من مرور السيارات... ياليتني صورت ذيك اللقطات بس صعوبتها ان الطريق زحمة وصعب يركز الواحد.
وبالعودة إلى تعليقك عن مدخل وإشارات سوق واقف، فما اتوقع بيخلونه إتجاه واحد لآنه شارع حيوي وبيكون عندك ضغط على شوارع ثانية، وكان الحل موجود على الورق قبل البناء من كل صوب، وكيف يصير استملاك؟ والمناطق كلها مستملكة وقبل لتستملك كانت المباني بعيدة عن الشارع وامكانية التوسعة سهلة، أما الحين مواقف حديثة لها فترة بسيطة من جهزت ومشيرب للحين ما خلص بادي يبين لنا ويفاجئنا.
ولو عن حماية الرادار فيه حلول غير وبتنفع الطرفين وحلول سهلة بعد بس هم يختارون الأسهل، وتحصل قيمة هالحديد المركوز في الارض بمئات الآلآف من الريالات ... بس فكر شبيصير لو وحدة تسوق واحنا نعرف الحريم شوي ما يتصرفون صح وقت الخطر وتمشي بسرعة 40 كيلومتر وحد لف عليها ولفت فجأة وصدمت هالأعمدة؟ تتوقع الحادث بيكون بسيط وسرعة السيارة 40 كم/ ساعة؟ انا اقول عمدان حديد وثابتين في الأرض بيقطعون السيارة وإحتمال وفاة أو إصابة خطيرة وارد، فما بالك بالسرعة القانونية 80 كلم / ساعة؟
إداريين أشغال صدقني يوقعون ويطلعون في الجرايد بس، ومره شفت أجانب من مكتب استشاري يتابع مشروع لأشغال واقفين يسولفون مع بعض، كل واحد في رنج جديد وكاشخ ببدلة وكرفته، وفي بلادهم ما يحلمون بهالسيارة ولو اشتغلوا في مشروع تحصلهم بلباس شغل وحماية راس وعدة شغل خاصة.
والأنفاق بتبين مساوئها لحظة هطول أمطار غزيرة.
وسلامتك، ولا تنسى تصور أي شيء تشوفه غلط علشان تتضح الصورة لهاذي الكوارث الهندسية.
يعطيك العافية أخوي على الموضوع الأكثر من رائع
احنا نعاني من المشاريع العشوائية و وضع المشاريع بناء على تنبأ شخص أن فكرته بتكون هي طوق النجاة لأصحاب المشكلة فنتفاجئ أن فكرته تكون فعالة حق 2 - 3 سنوات بعد افتتاح المشروع وهني تكون المشكلة لأن الناس صبروا وأخرتها على نفس السيناريو القديم (الشرطي المسكين الواقف على التقاطع أو الدوار)
من آخر الأشياء اللي ترفع الضغط و تدل على العشوائية اللي شفته أمس في جريدة الراية أمس
مذكور أن دوار عبدالغني فالوكرة بيتحول إلى اشارات بدال الدوار وأن المشروع مقترح من عضو دائرة الوكرة
سؤالي هو على أي أساس قرروا يسوون اشارات !!!
مب لازم تكون في دراسة ومنها يعرفون شنو اللي تحتاجه المنطقة واللي ينحط بدال الدوار (جسور ، نفق ، اشارات ... الخ)
أصلا هالدوار هو المخرج و المدخل الوحيد حق الوكرة للي رايح الدوحة (باستثناء خط الوكير الخلفي) و الغالبية العظمى من مرتادي الوكرة ماينعطفون يمين أو يسار دايما في خط مستقيم
الله يكون في عونا لو صج صار و سووا اشارات لأن صج بتصير زحمة مب طبيعية والسبب عشوائية اخواننا المسؤولين
صح الله لسانك وما عبر به قلمك يا اخوي
بيسوون اللي يبيه العضو وبدون دراسه، وبيقولون حسب طلب العضو وإحتمال في قليل من الأحيان عضو المجلس البلدي يكون مختص، بس مهما يكون علمه واختصاصه فالمطلوب تخصص هندسة طرق، وحتى دراسة هندسية إحصائية، وليش إحنا لين رحنا بلاد متقدمة نشوف شوارع عريضة ونظيفة وممكن عليها عدد قليل من السيارات؟ هذا شيء معروف إنه إحتياط للمستقبل، وربعنا نقلوا دواعيس ام غويلينة للأبراج وقاموا يبدعون في الحلول، وزين لو سووا دراسة شتتوقع بيسوون؟ ... بيروحون زيارات ميدانية كم دولة ويمكن يصورون ويستانسون ويرجعون بموضوع إنشائي طويل للجرايد.
تبي الصج لازم فيه خطة للوكرة ولازم يطبقونها صح قبل لا تنبني الأرض كلها ويتورطون، ويقولون بعدين كم مره تضاعف عدد سكان قطر وكنهم يبنون دراساتهم على الحاضر وبس..
المطلوب أتوقع شارع إضافي موازي لطريق الوكرة، وليش ما يتنفذ طريق ساحلي بعد دراسة ويمكن شوية تغييرات أو توسعات أو استقطاعات حق مناطق حيوية مثل محطة الكهرباء، أو ممكن يكون طريق جديد ما يبعد كثير عن القديم بحيث يمر صوب المطار وغيره من المناطق بس يكون طريق واسع وسريع.
بعدين مشكلة قطر أرضها مسطحة وهشة ومستوى المياه الجوفية في بعض المناطق يعتبر مستنقع أو تحت الأرض بعمق بسيط، وهذا يجعل الأنفاق كارثية لأنهم يسوون خزان لتجميع مياه الأمطار لكي لا تسد هذه الأنفاق، لكن لو ارتفع منسوب المياه الجوفية وتسربت هذه المياه للخزانات التحت أرضية ستكون طاقة استيعاب كل خزان قليلة، ومع اي رشة مطر قوية وميلان الشوارع المحيطة بهذه الأنفاق طبيعي ستتسرب المياه في إتجاه الأرض المنخفضة أو النفق ويغرق بالمياه ويكون غير قابل لمرور السيارات وتقع كوارث مميتة لا قدر الله مثل ما حصل في جدة والرياض وغيرها.
في رأيي الحل هو عمل جسور مرتفعة وتصريف طبيعي لمياه الأمطار حتى لو بحيرات مفتوحة، أو شبكة سحب لهذه المياه خاصة لتتجمع لتنقيتها من السموم التي في الطرق واستخدامها في الزراعة.
وسلامتكم.
ضوابط المشاركة
رد مع اقتباس
