شارع سعد بن ماجد .. مأساتنا المستمرة
حاطين فيه مسمار جحا .. رايحين و رادين يحفرونه
الظاهر مضيعين واحد من العمال تحت
شارع سعد بن ماجد .. مأساتنا المستمرة
حاطين فيه مسمار جحا .. رايحين و رادين يحفرونه
الظاهر مضيعين واحد من العمال تحت
توي امغسل السيارة والا ما اوعى والا حفرة في نص الشارع صوب فريجنا وكأن نيزك صغير طايح امس بليل وما كانت موجودة قبل امس
لا تعليق وما حبيت اصور الحفرة لان كان في عمال حواليها وخفت ايفكرون غلط
المنافسة المفتوحة تنزل الأسعار لا تستغرب وبعدين التصميم المتكامل والإشراف الصحيح والإدارة الهندسية الحقانية يسوون مشروع يسوى وعليه القيمة
هو جهد منسق صح وحلقات ما تنفتح .. كم شركة دخلت قضية مع أشغال؟ وايد وشركات عالمية والقضاء عندنا نصر الظالم على المظلوم .. بس الشركات هذي ما تجي مرة ثانية ولو جات تطلب أضعاف تغطي نفسها بالكامل .. وبعدين حتى الشركات الجديدة تسمع شيصير وتخاف تدخل السوق القطري
موضوع شوارعنا وفرجاننا بسيط والمطر اللي يجينا شوي ومقدور عليه .. بسهولة يسوون بايبات تحت أو يرفعون الشارع ويسوون ميلان مناسب وتصريف لأَرض نازلة حتى لو قريبة .. الأرض يسونها نازلة بالتدريج ويزرعونها وتكون منظر وتكون مثل البحيرة يتجمع فيها المطر .. لكن فجأة يبون يستوون الأفضل ويصرفون الأغلى ويسوون شبكة وطنية لكل الوطن تتجمع في نقطة صراحة هذا شغل غير مجدي ومكلف ومشاكله وايد
النظام الأول هو شبكات بسيطة ومحلية .. ويفترض تنعمل أول بأول في المناطق الحديثة
الله يعطيك العافيه اخوي معماري قطر
حبيت اشارك معاكم بهالموضوع المهم بالنسبة لنا كمواطنين يهمنا مصلحة دولتنا الحبيه لتكون الافضل وموضوعك اخوي معماري بطبيعة الحال هو نقد بناء بلا شك وتشكر عليه ولا خلا ولا عدم بالبقيه الكرام .
منطقة بني هاجر بدت بتحسين خدماتها من سنة تقريبا 2010 من شركة كويتيه فاشله بمعنى الكلمه وانتهت مشروعها في 2014 ظهرت عيوب في خلال السنتين من طفح المجاري للشارع وانخفاض الشارع واخطاء فالتوصيلات الخدميه واعادة الحفر والاصلاح من جديد من قبل شركات اخرى .
صورة لشارع الحوايا ببني هاجر توضح انخفاض الشارع وهذا يدل ان فيه تسريب تحت الارض من الصرف الصحي .
التعديل الأخير تم بواسطة qatari 111 ; 08-02-2016 الساعة 01:04 PM
http://www.50d.org اضغط من فضلك
الله يعافيك إخوي قطري 111
الصورة حقيقة معبرة ودليل فاضح على الشغل التعبان .. هذي حفرة غزيرة تتسبب في حادث بشع حتى للسيارات المرتفعة .. وهذا شارع جديد
إحنا في الغالب نلوم الشركات اللي تنفذ لكن صدقني اللوم الأكبر عن من يعين هذي الشركات ومن يراقب شغلها ومن يسمح بالتجاوزات ومن ما يتابع الشغل صح بعد الاستلام وملاحظة العيوب وايجاد حلول لها
عرفنا إن أرضنا ضعيفة وهشة وتتخللها مياه جوفية مرتفعة .. نترك شوارعنا تخفق وتغرق والا نسويها مرتفعة شوي ونقوي بنيتها التحتية بمواد مقوية مثل حبال البلاستيك المخلوطة ومغلفة بخرسانة خفيفة أغلبها دفان حتى تكون متماسكة أكثر من الدفان المدكوك ولا يخربها الماء؟ .. وعرفنا إن شوارعنا تمر عليها شاحنات وعليها دوس ثقيل حتى من السيارات نخليها رقيقة وضعيفة؟ كذلك عرفنا إن الأسفلت اللي ماسك قطع الحجر الكبيرة نوعاً ما يتحلل وتطلع الحجارة ويهتريء الشارع بسرعة .. هل ما نستخدم مواد خام مناسبة؟ وهل ما نصين شوارعنا بطبقة حامية ما يدخلها الماء؟ .. شوارع أُوروبا لو يستوي فيها شق بسيط أجزاء من الملم يدخل فيه الماء ولين ثلج يزيد حجمه 4% وهذي الزيادة تتسبب في توسيع الشق كل دورة .. وبعض الأوقات الدورات هذي تستوي عدة مرات في اليوم .. كأن يذوب الثلج ويرجع يستوي .. الحل عندهم سهل مهب رقود مثل إدارة أشغال .. الحل يجون بصفة دورية يفحصون الشوارع قبل بطريقة بدائية ألحين سيارات تمسحها بسرعة 120 كلم وتحدد أماكن الضعف ويجي فريق يسد المكان بقار سائل حتى ما يدخل الماء
مب غلط إن الواحد يخطيء مرة ويصلح الخطأ بطريقة علمية صحيحة لكن الغلط يغلط ويستمر في الغلط ويقط اللوم على حتى كائنات فضائية مثل ما نقلت خلال هذا الموضوع الطويل
ملاحظة ثانية هنا نلاحظ تكرر النظام الدائري لطرق شبه رئيسية .. هو جيد ممكن لمجمعات سكنية كشكل معماري خاص لكن طريق على زحمة سير لا