الجديد في عالم المطابخ والحمامات وتصميماتها

[معماري قطري]

شوف إخوي بو زيد هذا مقتطع جزئي لمنطقة المطبخ الخارجي والداخلي كما صممه الاستشاري



التصميم يعطيك صورة متوقعة لإمكانيات الفراغ والطرق الأفضل لإستخدامه والمصمم ممكن يفكر بكاونتر بسيط وفراغ كبير بدون فايدة فقط للحركة وحركة الإنسان معروفة ويتكيف مع المساحات الصغيرة بسهولة .. هي صغيرة لكن كافية وملمومة وسهلة للاستخدام وانا افضل المطبخ الخارجي ضيق لو الواحد ما عنده مساحة ما بيكون عنده فرق وبيعطي ميزة سهولة الإستخدام

هذا سكتشي للمنطقة هذي وفيه وزعت المطبخ أفضل مع باب وسطي للمخزن وسعة أكبر للتخزين .. فيه ساحة وسطية للزراعة 10 في 10 مقابلة المطبخ الداخلي هذا كبرته شوي وحركت باب الغرفة جهة الصالة بدال ما تنفتح على المطبخ وتضيقه وسويت في طرفه على اليسار مخزن هذا للداخلي واللي فوق واضح التغيير فيه مع إن عرضه 2.5 متر بس يكفي لكاونترين ومسافة حركة بينهم تكفي لشخصين بالراحة وممكن أكثر شخصين قصدي يمرون جنب بعض



التصميم حلو وعملي والاستشاري مختص بعد تصميم داخلي بس مستغرب ليش ما وضح هذي الإمكانيات لأنها مهمة .. حتى دورات المياه كان توزيعها يحتاج تفكير شوي أفضل وما شفتها مناسبة وحطيت عليها اقتراحات .. كلها خذت مني يومين لأن التأسيس موجود وفايل الاوتوكاد موجود

ذكريات هذي المشاركة لها فترة من آخر 2020 وألحين بيت الرجال مقرب يخلص يرسل لي صور أوقات بس ما يحب أنشرها والله يوفقه البيت في البحرين مب في قطر ومهما يكون المهندس شاطر بعد تبقى ملاحظات لو تمت دراسة المخططات بعمق أكبر .. أعتقد ذكرت إن المهم هو الإستفادة من مساحة ضيقة للمطبخ الخارجي بتوزيع من الجهتين ومساحة حركة بسيطة في الوسط تعتمد الخطوتين القصار لسهولة الحركة والمناولة

أحس اني مرتكب إثم بعرضي للمخطط الجزئي بدون موافقة بس بيتي أقدر أعرض الصورة المحيطة بالمطبخ والملحق .. بيتي على كثرة دراستي له ألاحظ إني نسيت المغسلة الأرضية الخارجية وهذي تكون مبلطة وعريضة بحدود متر في مترين تكفي لغسيل أي شيء كبير مثل جدور كبيرة أو حتى لذبح الذبيحة .. باشوف لها ترتيب ممكن في طرف الحديقة صوب غرفة غسيل الملابس لأن قليل استخدامها .. شيء ثاني المطبخ الخارجي مفكر لو خليت الفرن له كاونتر جهة الحايط وخليت الطاولة الوسطية بس سطح عمل قريب من الفرن والمغسلة



المنطقة الوسطى اللنك بين المطبخين ممكن البلدية ترفض شبكها وتغطيتها .. حل بديل ممكن بدال الجدران أحط أبيام خشب وأسوي عليها برغولا مغطاة ببولي كاربونيت حتى تخف حدة الشمس .. بس بعد الغبار مشكلة .. الخوف يتهورون البلدية ويركزون على بيوت أهل قطر أي بيت مسوي إضافة ما تعجبهم يطالبونه بازالتها .. حتى الإستشاري رافض يحطها في المخططات يقول بيعطونه غرامة

[معماري قطري]

بهذي الطريقة بيكون التوزيع أشوفه أفضل

[معماري قطري]

شغلة عجبتني وما كنت منتبه لها في غرفة الغسيل هذي .. عمل تقسيمات مثل الكبت وأكيد عميق بعمق يوصل ل 70 سم وترك تجويفات لغسالات الملابس مع الكبتات حولها .. أول شيء نكون رفعنا الغسالات في مستوى الشخص الواقف ما ينزل ويتعب وثاني شيء كل شيء حولنا من تخزين وممكن الجهة الثانية يكون عندنا الاوتي وطاولة الكوي

يعني ممكن عرض الغرفة حتى أقل من مترين 0.7 متر للكبت هذا شامل الغسالات + 1.3 مسافة حركة وطاولة الكوي ممكن تكون صغيرة أو قابلة للسحب ولاصقة في الجدار الثاني

[معماري قطري]

المغاسل هذي بعد حلوة وناعمة

[معماري قطري]

قطع صغيرة مناسبة للمساحات الصغيرة مع أماكن تخزين

[سعود.]

اوووووو من 3 سنوات محد فعل هذا الموضوع

[معماري قطري]

اوووووو من 3 سنوات محد فعل هذا الموضوع

صبحك الله بالخير إخوي سعود .. صادق العمر يمر واللي ذكرني به هو المجلة اللي نزلتها حسيت فيها صور ومواضيع مفيدة

[معماري قطري]

درجة لون تعتبر موضة هذي الأيام بس كلمة موضة سهل يستخدمها أي مسوق حتى يسوق اللي يبي .. يعني انا مركب وخالص باغير بس علشان واحد قال لي الناس تستخدم الشكل الفلاني والا هذا موضة قديمة

لكن ما انكر اللون حلو وبتحبه إختنا سين جيم

[معماري قطري]

حلوة الألوان ذي وفيها كسر للأبيض .. حاولت أقلد اللون لو شافه واحد بيمجع شعره من القهر حاقد على كل شيء

[sara jsm]

شغلة عجبتني وما كنت منتبه لها في غرفة الغسيل هذي .. عمل تقسيمات مثل الكبت وأكيد عميق بعمق يوصل ل 70 سم وترك تجويفات لغسالات الملابس مع الكبتات حولها .. أول شيء نكون رفعنا الغسالات في مستوى الشخص الواقف ما ينزل ويتعب وثاني شيء كل شيء حولنا من تخزين وممكن الجهة الثانية يكون عندنا الاوتي وطاولة الكوي

يعني ممكن عرض الغرفة حتى أقل من مترين 0.7 متر للكبت هذا شامل الغسالات + 1.3 مسافة حركة وطاولة الكوي ممكن تكون صغيرة أو قابلة للسحب ولاصقة في الجدار الثاني

طبعا هالتصميم خيالي مب واقعي ..
قوة حركة دورة تجفيف الملابس في الغسالات الاوتوماتيك تعادل 12 ريختر
احنا بدون كباته منشلخة الارضيات بعد تبي تحوطهم بخشب

صل عالنبي وخلك واقعي