الجديد في عالم المطابخ والحمامات وتصميماتها

[Chambray]

معماري
انت تحط لنا صور تعور قلبنا

لكن اذا بغيت تنفذ
ماتحصل شركة شغلها نظيف بهالدرجة
وذا حصلت ماراح تحصل هالمطابخ الجوده او الحمامات الراقيه والمواد الي انت حاطها ..
سوقنا ينقصنا اشياء اكثيره على فكرة..
ايش الحل؟

[معماري قطري]

معماري
انت تحط لنا صور تعور قلبنا

لكن اذا بغيت تنفذ
ماتحصل شركة شغلها نظيف بهالدرجة
وذا حصلت ماراح تحصل هالمطابخ الجوده او الحمامات الراقيه والمواد الي انت حاطها ..
سوقنا ينقصنا اشياء اكثيره على فكرة..
ايش الحل؟

هلا الغالي .. انا إن شاء الله باصور المطابخ اللي سويتها عندي وهي لها قريب 7 سنين ألحين،،

وصدقني هذي الصور أغلبها توضح أفكار تصميمية ، ولازم انت تسوي تصميم حسب إحتياجك وتحط فيه هذي الأفكار الأساسية، وبعدين تمر على محلات التجهيز وتحجز أقل شيء أو تشتري القطع الخاصة وتدمجها في المطبخ، فالكاونتر مثلاً لازم يكون غرانايت راقي ويتناسب مع لون المطبخ أو أقل شيء كوريان، في بعض الدول يستخدمون الخشب وبعضها السيراميك وبعضها الحجر والستانلس ستيل، والخلاطات والمغاسل عندك أنواع متعددة وعندك الأفران والشوايات وحتى فيه شوايات صغار مفتوحة تتركب على الكاونتر وكل هذي موجودة عند الموردين وبجودات تختلف، حتى الألماني موجود عند شركة ناصر بن خالد.

انا يمكن للحين ما حصلت الجهاز الأخير الفلتر اللي يعطيك ماي ساخن أو بارد، وبعدين يمكن إحنا نغلط نسوي مطبخ كبير يتعب الواحد من المشي فيه، ومثلث العمليات يكون متباعد يعني الثلاجة والمغسلة والفرن، والحين عندك الفرن ينقسم إلى 3 أقسام وقسم رابع المايكروويف، وعندك القلاية والشواية فيه منهم صغار حق وجبة خفيفة، وينفتح لها في الرخام وتجي تحت شفاط الدخان.

قريت كتاب عن المطابخ وذكر قبل نشأة المطابخ في أُوروبا، وما تصدق انهم كانوا يسوون غرفة مفتوحة السقف ويطبخون على حطب وبطريقة بدائية مثل طباخنا قبل، وشوي شوي تطوروا لين وصلوا للتكنولوجيا الحالية، والحالية في تطور مستمر وكل يوم يطلع شيء جديد من مواد بناء ومن تجهيزات.

وأتمنى من الإخوان إضافة أي نوع من التجهيزات والعدة الخاصة بالمطابخ والحمامات لهذا الموضوع حتى يكون مرجع لكل واحد يبني أو يجدد في مبنى.

[معماري قطري]

هذا المطبخ عجبني فيه إنه منحوت في الفراغ الخاص بغرفة الطبخ، ويبين لنا واضح مسوين مكان خاص من الحوائط الجبسية للثلاجة الستانلس ستيل، وحتى المدخنة مسويينها من الجبس ، والإنارة مدروسة ومركزه للأماكن الخاصة بالشغل أكثر شيء، والجزيرة جاية قريبة من الكاونتر الخاص بالطبخ يمكن بينهم متر بس والمغسلة في الجزيرة، وطرف الجزيرة طاولة للطعام.



وهذا مطبخ بألوان متعددة وطاغي فيه اللون الأحمر واللون الرمادي لأبواب خزاين المطبخ وفيه جلسة تلفزيون بحايط أزرق، واليكم الصور ...







والصورة الأخيرة عجبني فيها السكاي لايت وهو بدون فريم وخالص من الزجاج، وفيه عوارض زجاجية،، وطاولة الطعام تحته بكراسي طوال مشتركة بدون ظهر.



أتوقع اضافوا الجزيرة بعدين .. شرايكم؟

[نور الحور]

موضوعك مميز كالعادة أخوي معماري ..
وايد عجبتني المطابخ .. خاصة المودرن أحس فيها بساطة وأناقة ونظافة ..
من فترة كنت في ألمانيا ودخلت محل تفصيل مطابخ ..ماكان ودي اطلع منه هههههه سألتهم لكم فروع برا ..قالوا ما عندنا إلا في ألمانيا .. صراحة موديلات روعة وجودة ومتانة ...

بس بالنسبة لتحديد أماكن بالجبس للثلاجة مثلا مثل الصور الأخيرة ..ما يتأثر الجبس بالحرارة والرطوبة في المطبخ ؟
أو يكون سريع الخدش ؟

بالنسبة لفلتر الماي اللي حطتيه في الصور السابقة عجبني وايد ..
بس فيه بديل ولو كان مو نفس الشكل ..
لأني ظليت فترة أدور فلتر يفلتر لي ماي الحكومة حار وبارد ومالقيت ..وجربت اللي يفلتر على خمس مراحل وشلته، وما اقتنعت أبدا بالفلتر اللي يجيك معاه غراش مقلوبة ..مو صحي أبداً .. حاولت على الأقل ألقى غراش قزاز أنظف وأعقم ..
وبعد بحث طوووويل لقيت فلتر ماء حار وبارد وركبته والحمدلله ارتحت ..وشكله بعد حلو ينفع ديكور ..ومنه أحجام حجم صغير ممكن ينحط على سطح المطبخ وحجم كبير ينحط على الأرض ..

نفس هالسستم بس أشكال أحلى

[معماري قطري]

[bمشكوره أُخت نور على الإطراء

والجبس عملي صراحة لآخر درجة وممكن يتصلح لو إنكسر وبسهولة .. وفي حماماتنا تكرمون نحطه في السقف والرطوبة قوية تجيه ويبقى ما يتغير بس ينصبغ بصبغ خاص ضد الرطوبة، وفيه أنواع تجي مصنعة ضد الرطوبة، وفي دول كثيرة يستخدمونه كحوائط غير حاملة للسقف، وللحمامات يتركب عليه البلاط بعد حتى في جدران الشورات يمشي.

القصد من هنيه إننا نخلي كبت الحايط يبين مثل اللي داخل وجاي قطعة وحده مبني مع الحايط ونخلي الجبس يبدا من حافة الكبت ويغطي الفراغ اللي فوقه، فيكون كأنه منحوت في حايط المطبخ.[/b]

[معماري قطري]

اللون الأسود أوقات يطلع حلو كثير للحمام كخلفية للقطع البيضاء




وهذي صورة مقربة لشكل البلاط الأسود، والحركة الجديدة هنيه عندنا فتحة الصرف لمنطقة الشاور غير مفتوحة تحت قدم المستحم ومفتوحة جانبياً ومغطاة بقطعة معدنية كما هو واضح لكم أعزائي القراء

[معماري قطري]

هذا مطبخ أحلى ما فيه قطعة الرخام المتصلة والوحدة الكاملة على الجزيرة الوسطية.

[معماري قطري]

هذا تصميم لتوزيعة حمام بمقاس 2 متر في 2 متر، ويحتوي على مغسلة بكاونتر بعرض 40 سم ومراية محفور لها في الحائط بعمق 5 سم، وممكن عمل برواز حول المراية سواءً من الجبس أو قطع السيراميك الصغيرة أو الرخام أو حتى الخشب المحفر والمزخرف.

لصغر الحمام يُمكن عمل فتحات تخزين لبعض المواد كأدوات التنظيف والصابون كما هو موضح بعمق 10 سم وبعرض وطول يتناسب مع المكان وممكن عمل أرفف زجاجية داخل هذه الفتحات أو كما يمكن أن نسميها " الروشنة " ، وهذه ممكن عملها حتى في الحمامات الكبيرة فهي لا تُشكل عائق كالتركيبات البارزة، وجميلة المنظر وممكن عمل إضاءَة إل إي دي الهادئة في أعلى هذه الفتحات، وتُعامل كلوحات عرض راقية تبرز ناحية عملية وجمالية للحمامات، وهي واضحة باللون الأزرق الخط الرفيع.

الشُباك في حدود عرض 80 سم ويُستحسن أن يكون نازل بإرتفاع عادي كباقي النوافذ 90 سم أو 80 سم وبإستخدام زجاج محبب للإنارة الطبيعية والخصوصية، ويُنصح بعمل شفاط خاص فوق السقف المستعال وبفتحة في الحائط للتهوئة وبعمل فتحات دخول هواء للحمام في أسفل الباب، ويُنصح أن تكون هذه الفتحات خشبية لقوتها وعدم إهتزازها مثل المعدنية.

وإليكم المخطط.





وهذا للإيضاح للقراء الكرام كيفية توزيع وكفاية المناطق الصغيرة لهذا العدد المحدود من القطع، ولقد مر علي سابقاً منزل بحمام رئيسي 4 متر في 4 متر ويحتوي فقط على 3 قطع كهذه، والتي ممكن أن ترتب جيداً في رُبع المساحة فكانت مساحات كثيرة ضائعة وغير مستغلة، ويفترض في صاحب المنزل أن يزيد عدد القطع ويعتمد ترتيب آخر لحل المشكلة تخطيطياً من البداية وللإستفادة من المساحات الضائعة بلا فائدة.

[غرِيبهـ]

يعطيك العافية

مطابخ حلوة وايد وافكار تجنن

[غرِيبهـ]

يعطيك العافية

مطابخ حلوة وايد وافكار تجنن