شاشات البلازما والـlcd الاختيار الأول للمنازل
قريبا ..!
بعد ماقررت اشتري جهاز عرض بتقنية جديده توقعت الموضوع سهل ..الخيارات واضحه تقريبا تلفزيون ديجيتال - بروجكتر - شاشات مسطحه.. وكنت اجهل الكثير عن هذي الأخيره ! لما شفتها على الطبيعه عرفت انها هي الشي اللي ادور عليه بالتحديد .. وحاولت اجمع اكبر قدر من المعلومات عنها لانها فعلا اجهزه تستحق الإقتناء .. وفي هالتقرير شرح كامل للشاشات المسطحه بنوعيها البلازما و LCD وانشاءالله بيكون دليل واضح لأهم المعلومات للي حاب يشتري هالنوع من الشاشات
قبل 8 سنوات اول ماطلعت تقنية ( DVD ) وانتشرت بين الناس كانت هذي البداية الحقيقية لظهور ما يسمى السنما المنزلية .. وقتها انتشر البروجكتور كجهاز عرض وكان سعره مرتفع جدا لدرجه يضطر فيها الشخص الى استخدام التلفزيونات العاديه للمشاهده رغم ضعف جودتها كأجهزة عرض تناسب السنما المنزليه ..!
حاليا اختلفت الوضع بعد ما ظهرت لنا شاشات العرض المسطحه ( FLAT PANEL DISPLAYS ) بنوعين :
شاشات البلازما ( PLASMA )
شاشات LCD اختصار ( LIQUID CRYSTAL DISPLAY )
طبعا تجربة المشاهده على هذي الشاشات مختلفه تماما عن اي مشاهده شفناها قبل .. خصوصا اذا ركبت لها نظام صوت محيطي او ( Surround Sound ) بحيث مثلا وانت تشاهد فلم تسمع كل المؤثرات الصوتيه اللي مستحيل تسمعها على تلفزيون عادي مهما كانت تقنيته يعني لو ممثل ترمش عينه بتسمع تسكيرة العين اعرف زميل بدون مبالغه اخر فلم شافه اتوقع كان رامبو1 .. ومره بالصدفه شاف فلم عند واحد على شاشه LCD حجمها 40 انش تغيرت نظرته تماما .. وصار من اكبر المفلمين
كثيرين ودهم يشترون شاشه عرض ويكون لهم سنما منزليه خاصه بس يمكن مايعرفون وش الفرق بين النوعين خصوصا ان مبلغها مرتفع .. واول سؤال يتبادر لنا ماهو الفرق بين شاشة البلازما وشاشة LCD ..!؟!
بتلميح مبدئي كل التقنيتين ( البلازما و LCD ) تعطيك نفس النتيجه وهي صورة وضوحها عالي ودقه في الألوان وسطوع قوي .. وكلها تجي تقريبا بأشكال متشابهه إطار نحيف شكلها يكون قريب من اللوحات الفنيه والسعر نوعا ما بينهم متقارب جدا وكل ماله في انخفاض لين بيكون سعرهم واحد تقريبا وهذا من صالحنا
اذا كل هالتشابه بين التقنيتين اجل وين يكون الفرق ؟
الفرق جذري بينهم بس الفرق يأخذ شكل تقني بحت وهو طريقه عمل كل تقنيه وطريقه عرضها للصوره ويمكن التوسع بهالموضوع خصوصا طريقة عمل البلازما ( PLASMA ) ماراح يفيدنا كثير لانها تقنيه مصنوعه بشكل معقد مختصرها انها شاشات تعمل على غاز اسمه (NEON ) يتعرض لشحنات كهربائيه ويخليه يولد اشعة فوق بنفسجيه غير مرئيه ( وهذي النقطه تذكروها لأني بعلق عليها في نهايه الموضوع وبتكون من اهم الفروق بين التقنيتين)
اما شاشات(IQUID CRYSTAL DISPLAY ) اختصارها LCD مثل ماهو واضح من الأسم تتكون من سائل محصور بين لوحين زجاجيين وفي السائل بلورات من الكريستال اذا تعرضت لشحنه كهربائيه تسمح بمرور الضوء من خلالها بالتالي تصير هالبلورات الكريستاليه نقاط مرئيه تكون مع بعضها الصور اللي نشوفها على الشاشه .
طيب كيف الواحد يقدر يقرر وش الأنسب له ؟ البلازما او LCD ?
فيه اشياء مهمه تخص شاشات العرض المسطحه وهي اللي بتساعدك تحدد اختيارك بدون ما تحتار بشكل كبير ولازم تنتبه لها وانت تطلع على العروض وبتحصل كل هالنقاط مكتوبه على اوراق المواصفات بستعرضها
بشية تفصيل :
1- التباين ( CONTRAST )
والمقصود فيه اعلى درجة للون الأبيض واعلى درجة للون الأسود تقدر تقدمه الشاشه .. وكل مازاد هالمعدل زادت قدرة الشاشه على إظهار التفاصيل بالصوره بشكل افضل .. ومن ناحية التباين شاشات البلازما قدرت توصل لدرجه عاليه جدا من إظهار اللون الأسود توصل 3000:1 ماقدرت توصل لها شاشات LCD اعلى رقم وصلت له 1000:1 بس طبعا مو معناته ان LCD سيئه هي تقدر تعطيك نتيجة اكثر من كافيه بالنسبه لدرجة للون الأسود.
2- دقة الألوان ( COLOR SATURATION )
المقصود فيها قدرة الشاشه انها تعرض جميع الألوان بمختلف تدرجاتها بصورة دقيقه ومطابقه للواقع .. بالنسبه للميزه هذي شاشة البلازما تتفوق فيها ايضا كونها تقدر تعرض لنا كل الوان الطيف وعددها 16.77 مليون لون بدقه عاليه جدا لكن شاشات LCD فيها ميزه انها تتمتع بكثافه نقطيه اكبر بكثير من شاشات البلازما بمعنى انك لو تقرب مره من شاشه LCD ماراح تلاحظ نقاط صغيره على نفس الشاشه بالتالي تكون فيها الألوان متشبعه اكثر .
3- زوايا الرؤيه ( VIEWING ANGLES )
شاشات البلازما لها زاوية رؤيه كبيره تصل الى اكثر من 160 درجه بمعنى انك تقدر تشاهد الشاشه من اي مكان بالغرفه ومن اي زاويه بنفس الدقه والوضوح .. اما شاشات LCD ممكن ان الرؤيه تكون خافته نوعا ما لو جلست في زاوية مايله كثير عن الشاشه وعلى شان تحصل على افضل رؤيه من المهم انك تكون مواجه للشاشه او جالس بزاويه مايله نسبيا
4- زمن الاستجابة ( RESPONSE TIME )
كل ماكان الزمن اقصر كانت فعالية الشاشه افضل خصوصا في عرض مشاهد الأكشن السريعه والعاب الكمبيوتر وفي هالجانب تتفوق شاشات البلازما يوصل زمن الاستجابه الى 7Ms لكن حاليا LCD متساويه معها تقريبا بس مو في كل الأنواع
5- مدة الحياة ( LIFESPAN )
مثل ماذكرت بالبداية ان شاشات البلازما تعتمد على غاز في آلية عملها مشكله هالغاز ان له عمر افتراضي يقدر 3000 -2500 ساعه عمل بعدها تضعف الشاشه ويقل سطوعها بكشل كبير .. وبما ان الغاز ماله طريقه إعاده تعبئه بهالحاله تنتهي حياة الشاشه مع إنتهاء العمر الإفتراضي للغاز .. اما شاشات LCD بما انه فكرة عملها تعتمد على الضوء بشكل اساسي يقدر عمل مصابيح الضوء فيها الى 60000 ساعة عمل وبما ان هالمصابيح ممكن تتغير يصير العمر الإفتراضي للشاشه غير محدود ابدا
6- استهلاك الطاقة ( POWER CONSUMPTION )
ماتقارن شاشة LCD مع البلازما في هالنقطه فهي تستهلك شي بسيط جدا من الطاقه بينما البلازما تستهلك ضعف استهلاك شاشة LCD
7- مستوى الإشعاع الناتج ( RADIATION LEVELS )
وهذي من اهم نقاط الفروق واللي قلت في البدايه ركزو فيها وهي الإشعاعات الضاره اللي تصدرها الشاشه .. وفي هالنقطه شاشة LCD ماتصدر اي اشعاع ضار ابدا لانه مايصدر منها إلا الضوء .. اما شاشات البلازما لانها تصدر اشعة فوق بنفسجيه تكون ضاره نسبيا ولو انها اقل من اللي يصدر من التلفزيونات العاديه
بالاخير نجي للموضوع السعر وهو الأهم
طبعا شاشات LCD اغلى من البلازما اللي من بنفس حجمها لانه حاليا فيه صعوبه بتصنيع شاشات LCD بقياسات 30 انش واكثر بدون وجود نقاط واضحه على سطح الشاشه لذلك اكبر حجم نشوفه بالسوق حاليا لشاشات LCD هو 40 انش بينما شاشات البلازما وصل حجمها الى 60 انش .. وبشكل عام السعر نقص عن قبل سنتين تقريبا بنحو 40 بالميه ومازال السعر ينخفض
بالاخير يكون قرار اختيار احد هالشاشتين بنظري ذوق شخصي لان الفروق بينهم ماتعتبر عيوب والأفضل ان الواحد يشوفها على الطبيعه وهي تعرض فلم او اي عرض دعائي يحتوي على الوان كثيره لان الدقه والسطوع والألوان بتكون واضحه الفروق اكثر على الطبيعه
بقى اني اوضح اشهر انواع الشاشات وامثله مختاره على بعض اسعارها :
SAMSUNG
SONY
PHILIPS
PANASONIC
LG
NEC
BENQ
شاشه بلازما نوع LG 42PX3RV حجم 42 بوصه يتراوح سعره مابين 10 الاف الى 10500
شاشه بلازما نوع PHILIPS.42PF9946 حجم 42 بوصه السعر 8000 الى 9000
شاشه بلازما نوع Panasonic TH-42PA50M حجم 42 بوصه السعر 8500 الى 9500
شاشه LCD نوع SAMSUNG LA40M61 حجم 40 بوصه السعر 12000الى13000 ريال
شاشه LCD نوع BENQ DV3750 حجم 40 بوصه السعر 7500 ريال الى 8500
شاشه LCD نوع SONY KDL-40S2000 حجم 40 بوصه السعر 10500 ريال الى 11500
الفروق بالمشاهده بين الشاشات المسطحه بنوعيها البلازما وLCD وباقي التلفزيونات
واخيرا اتمنى ان يكون هالتقرير المتواضع قدر يجيب ولو على شي بسيط من تساؤلات البعض عن شاشات البلازما و LCD او اللي وده يشتري ولا توفرت له معلومات عنها ..
|
رد مع اقتباس
المشاركة الأصلية كتبت بواسطة snake
