لمن يريد العلاج في بنجلور الهنديه .. تفضلوا

[خالد العمادي]

السلام عليكم ورحمة الله وبركاته

حبيت أفيدكم لمن يريد العلاج في بنجلور الهنديه من خلال تجربتي معهم لمرتين

بخصوص التأشيره تطلع في نفس اليوم وتحتاج لصورتين بخلفيه بيضاء
وكذلك لصوره من تذكرة السفر ومن حجز الفندق ( ممكن حجز الفندق يكون وهمي عن طريق مكتب سفريات )
قيمة التأشيره 160 ريال

الأن نأتي ليوم الوصول لبنجلور ..
ممكن تتفقون مع سايق أسمه ساجد وهو صاحب شركه وعنده مجموعه كبيره من السائقين والرجل أمين جدا ورقم هاتفه 00919686336777
أيجار التوصيل من المطار للفندق حوالي 90 ريال قطري
وبعدها بتكون يومية السايق 1800 روبيه في اليوم ( 120 ريال ) للسياره الكبيره شامل البترول والترجمه وأخذ المواعيد وكل شي من الألف الى الياء
السياره الصغيره سعرها تقريبا 90 ريال في اليوم

السكـــــــن

السكن أنصح بشقق فندقيه ( كلاسيك آن ) سعر الشقه غرفتين وصاله وحمامين ( اعزكم الله ) ومطبخ 6000 روبيه ( 400 ريال ) مع الغساله وكل اللوازم والفندق يحتوي على حمام سباحه وغرفة تمارين

المطاعم

المطاعم الأسلاميه متوفره بكثره والحمدلله وعلى مستوى عالي وراقي والأسعار متفاوته من مطعم لأخر ولكن المطاعم الهنديه الجيده أسعارها رخيصه جدا مقارنه مع المطعم اللبناني والأيراني وغيرهم

نأتي للعلاج
للي يبغي يتعالج بالأوزون والكليشن أنصحه يروح للدكتوره رونيكا لأنها التوب في هذا العلاج وأسعارها ممتازه وعلاجها ماعليه كلام بشهادة كل من تعالج عندها
جلسة الأوزون الواحده ب 1300 روبيه ( 86 ريال )
وجلسة الكليشن تتراوح مابين 3000 روبيه الى 4000 روبيه ( كل جلسه بدوا مختلف وسعر مختلف )
علاج الأوزون مفيد لتجديد الخلايا والقضاء على الأورام السرطانيه الجديده وكثير من الفوائد ( ممكن مشاهدتها في قوقل )
علاج الكليشن وهو الأساس والكل يذهب من أجل الكليشن لأنه يفتح الشرايين وينظفها من الدهون ويمنع الجلطات وتصلب الشرايين وأمراض القلب كما يعيد للجسم قوته القديمه ونشاطه من خلال تدفق الدم بقوه في الشرايين
وكذلك يقلل من نسبة الكوليسترول والسكر .. والكثير من الفوائد
وقد رأيت بعيني الكثير من كبار السن وهو يستعيدون عافيتهم خلال أسبوعين
ولمن يعاني من أنسداد الشرايين يحتاج علاج لمدة شهر

لعلاج المفاصل وخصوصا الركب
هناك دكتورين واحد أسمه شفاق أحمد وهو مسلم وممتاز
والثاني أسمه ايا باس وأيضا ممتاز
والأثنين متخرجين مع بعض وكانوا يشتغلون بعياده وحده وبعدها أنفصلوا
ولكن للأمانه وشوف عيني الكثير ممن كانوا على كراسي صاروا يمشون بعد أسبوع واحد فقط من العلاج
ولكن نصيحه بعد مايقولكم الدكتور عن السعر تفاصلوا معاه وراح ينزل كثير من السعر .. يعني راح يقولكم العلاج ب 130 الف روبيه ولما تتفاصلون معاه ممكن ينزل لغاية 85 الى 90 الف روبيه والسعر يعتبر بلاش مقابل أن يرجع الأنسان يمشي ومن غير عمليات ( يعني العلاج في حدود 6000 ريال قطري
وطبعا علاج الدسك والفرات أرخص في حدود 3000 ريال وخلال خمس أيام يروح الألم

بالنسبه لدكتور الأنف والأذن والحنجره
في دكتور أكثر من رائع أسمه شهاب احمد << قمه في الأخلاق والشطاره
رقمه 9845071156 شاطر بدرجة أمتياز

ولعلاج العيون

دكتور آم آس أحمد
دكتور مسلم وشاطر وكبير
يعمل عمليات الترا ليزك ونوع جديد أفضل من الألترا ليزك بس نسيت أسمه
علاج الألترا ليزك ب 75000 روبيه ( 5000 ريال )
بس هو أمين وراح ينصحكم أذا كنتوا تحتاجون عمليه او تظلون على النظاره لفتره معينه وعنده عدسات ألمانيه ممتازه للنظاره تخليكم تشوفون القريب والبعيد

لعلاج الأسنان
دكتور سيف وهوغني عن التعريف هناك يملك عياده كبيره ودكتور خلوق جدا ومسلم وشاطر وأسعاره ممتازه
التلبيس للضرس الواحد حوالي 300 ريال قطري فقط والشغل من أروع مايمكن
ونصيحه خلوا الدكتور سيف يعالجكم مب أبوه لأن يده أخف بكثير من يد أبوه

الأسواق

طبعا بنجلور فيها مجمعات تجاريه كثيره وأغلبها يحتوي على الماركات العالميه وأسعارهم أغلى منالدوحه في أغلب المجمعات
ولكن نصيحه روحوا لشارع أسمه ( كمرشل ستريت ) فيه محلات راقيه وبأسعار حلوه

الملاهي

وللملاهي أنصحكم تروحون مدينة ( وندر لا ) قمه في اتلروعه وتحتوي على ألعاب مائيه وعاديه للكبار والصغار وكل شي فيها رائع والألعاب كلها مجانيه ورسم الدخول حوالي 50 ريال قطري للشخص
وعندكم صالة الثلج قمه في الروعه وقريبه من وسط البلد ورسم الدخول حوالي 90 ريال للشخص

المبالغ النقديه
بخصوص الفلوس تقدرون تاخذون معاكم روبيات من الدوحه عادي مسموح ولكن الأفضل تاخذون مبلغ بسيط والباقي تحولونه دولار وتصرفونه هناك عن طريق السايق لأن السايق بيجيب لكم أفضل سعر على الأطلاق وممكن تتأكدون من سعره وسعر محلات الصرافه هناك وبيكون هو الأفضل عن تجربه

مانصح تروحون محلات تجاريه ينصحكم بها السايق لأنها بتكون غاليه والسايق له نسبه من المحل

بعد مادري أذا نسيت شي ممكن تسألوني وانا حاضر وبالخدمه

وأتمنى منكم دعوه طيبه

وبالشفاء للجميع بأذن الله

ملاحظه اللي بيتصل في السايق يقوله من طرف ناصر العمادي عشان يهتم فيه أكثر لأن ناصر أخوي متعامل معاه أكثر مني ويعرفه عدل
واللي مايبغي عادي يكلمه ويتفاهم معاه وهو ماراح يقصر مع حد أبدا