آبي آرائكم ونقاشكم في تصميم بيتي المفترض

[معماري قطري]

هذا تصميم للدور الأرضي وتوزيعة الحوش لبيت ناوي إن شاء الله أبنيه .. الله يعطيني وياكم طولة العمر .. في المستقبل القريب إن شاء الله.

الأرض مستطيلة ويجاورني الوالد من يسار وسكه من يمين وشارع رئيسي من أعلى الرسمة، والأعلى مقابل شمال شرق وأكثر لإتجاه الشرق .. ووراي أرض مملوكه.

مساحة الأرض 2265 متر مربع ومساحة البناء ما يقارب ال 1400 موزعة على دورين وملحق ومجلس خارجي .. أدري يمكن مبالغ في المساحات بس إن شاء الله بالتزم بتشطيب وسط وبابتعد عن المبالغة.

تفضلوا التصميم ولتبخلون علي بالآراء وبن غيث ثراك محجوز تبني لي كيفك لتقول دور غيري.




ما طلعت الصورة واضحة ولو باخليها واضحة بتكون حجم كبير .. شرايكم؟

[بن غيث]

تأمر أمر معمارينا .. وحاظرين لك
ولو بغيت المصممة الخاصة لنا تصمم لك البيت بأرسلك رقمها وترتب معاها الموضوع
وعندي بعد مصمم أيطالي يعتبر من أفضل المعماريين في أيطاليا وحاصل على جوائز حكومية

[معماري قطري]

تأمر أمر معمارينا .. وحاظرين لك
ولو بغيت المصممة الخاصة لنا تصمم لك البيت بأرسلك رقمها وترتب معاها الموضوع
وعندي بعد مصمم أيطالي يعتبر من أفضل المعماريين في أيطاليا وحاصل على جوائز حكومية

ما تقصر يالشيخ .. هشكل بيستوي بيتي بنكهة إيطالية .. ما شاء الله عليك والله يوفقك .. خلني بس أقرر انا توني ساكن ما لي 7 سنين ومنطقتي زينه بس ابوي واخواني بدوا ينتقلون لمنطقة جديدة وإحنا إحتمال يقصون بيتنا وبنطلع بس عايشين على هالإحتمال.. وإن شاء الله خلال فترة قصيرة بابدأ أطور التصميم وتفاصيله.

[بن غيث]

تذكر البيت المصمم على نظرية الفراغ .. ليش ما تسوي مثله ..
بيكون وايد مميز

[khaldoon]

الله يوفقك و يبارك لك فيه

يا ريت لو تذكر وين الجهات اللي بتطل على الشارع و الجيران

لو تبتعد عن الزوايا القائمة في زوايا البيت و تكسرها مثل الشمفر احسه اجمل

الصورة مب واضحه وايد و ما في ابعاد

ليش خليت الدرج مثل الغرفه و ما حاولت تستفيد من تصاميم الادراج و تسوي منظر جميل من الداخل.... ما شاء الله بيتك كبير يعني ما عندك مشكلة بالمساحات لو انك توسع بالدرج شوي يعني مب محكوم بالمساحة


المسبح بالع مساحة كبيرة جدا.... هل هو داخلي و الا خارجي... شكله خارجي

نبي صورة اوضح و ان شاء الله لي عوده ساعتها ......بس اتمنى تبتعد عن الواجهات التقليدية و اللي اشوفه انه الواجهات غير منتظمة و اخشى انها مب جميله مع شباك كبير جدا بالواجهة الامامية من جهة و صغير جدا بالجهة الاخرى

الساحات الخارجية يبيلها اعادة ترتيب .... ارجوك حط صورة اكبر و افضل

[معماري قطري]

تذكر البيت المصمم على نظرية الفراغ .. ليش ما تسوي مثله ..
بيكون وايد مميز

هذيه من نظرية البطن الخالي .. وسط البيت مجوف ومفتوح للسما وكم من مساحة تطل على حوض السباحة .. باكمل على باقي المخططات وباحطها إن شاء الله علشان توصل الفكره أكثر.

[Aaziz]

السلام عليكم

والله ياخوي معماري انت تعلمنا مانعلمك ،، ولكن عندي ملاحظه يمكن تكون صحيحه .

احسك حطيت في بالك و انت توزع البيت هدف وهو اني بستغل كل مساحه ممكنه ... حسيت البيت مزدحم بالحوش و بكل شي ،، او ان الصوره الي حطيتها عطتني هذا الايحاء .

[معماري قطري]

الله يوفقك و يبارك لك فيه

الله يسلمك ويخليك شيخنا خلدون

يا ريت لو تذكر وين الجهات اللي بتطل على الشارع و الجيران

ذكرتها وأعيدها لك على يساري بيت الوالد .. وجدامي ساحة فاضية وبعدين شارع فرعي وبعدين أرض مزروعة وبعدين شارع رئيسي .. ويميني سكة خدمات .. ووراي جار من الأهل القريبين.

لو تبتعد عن الزوايا القائمة في زوايا البيت و تكسرها مثل الشمفر احسه اجمل

تدري سويت جزئين شامفرد فوق في المظلة اللي على المدخل وفيها مكتبي بيكون بإذن الله بس ما احب أكثر تضيع عندي مساحة .. انا very conservitive from outside..i consider the functionality and beauty of serviceability only.
أنا عملت تصاميم كامله وثري دي قبل بس كمبيوتري القديم وقف وضاع الشغل كله.

الصورة مب واضحه وايد و ما في ابعاد

صحيح .. الأبعاد مكتوبه كمساحات داخلية صافية .. وطبيعتي أخفي نظام الشبكة والأبعاد المكتوبة للتنفيذ علشان تبين توزيعة المساحات وطريقة التأثيث وممرات الحركة.

ليش خليت الدرج مثل الغرفه و ما حاولت تستفيد من تصاميم الادراج و تسوي منظر جميل من الداخل.... ما شاء الله بيتك كبير يعني ما عندك مشكلة بالمساحات لو انك توسع بالدرج شوي يعني مب محكوم بالمساحة

بيتي الحالي بالغت في الدرج وفايدتي جمالية بس .. يعني حطيت على تشطيبات الدرج من غير الخرسانات الزايدة حول 125000 ريال زيادة، وهذي تعادل سعر مصعد كامل، وعجبتني طريقة الدرج معلق بين حوايط داخلية وشبه مفتوح من جهة ووسطه اللفت.


المسبح بالع مساحة كبيرة جدا.... هل هو داخلي و الا خارجي... شكله خارجي

هو صح خارجي بس سقف البيت في الأخير بيكون مغطى بزجاج ينفتح .. يعني من إرتفاع سطح الدور الثاني .. والجزء اللي في إرتداد الملحق فيه سونا وبخار وغرفة للمعدات ومخزن .. هذي سقفها بيكون دعامه لشلال يصب على المسبح وفوقها بيكون سقف بسيط يغطي باقي المكان صوب صالة الرياضة على اليسار لين الحمام الخارجي ومطبخ البيت على اليمين.

نبي صورة اوضح و ان شاء الله لي عوده ساعتها ......بس اتمنى تبتعد عن الواجهات التقليدية و اللي اشوفه انه الواجهات غير منتظمة و اخشى انها مب جميله مع شباك كبير جدا بالواجهة الامامية من جهة و صغير جدا بالجهة الاخرى

إن شاء الله باحاول بس أكيد بتطلع كبيرة ويحتاج الواحد يحرك بالماوس بعدين بعد بتطلع مزعجة بس علشان الوضوح الظاهر لازم أسويها .. عن الواجهات .. يا اخوي هي موزونه بفن وطول عمري ما احب المباني المتناظره " symetrical facia " وهذا مبدأ قديم في التصميم اعتمدوه العرب وخصوصاً المصريين ولا يغيرون عنه .. انا بالعكس أشوف فيه تناظر وكبرت الدريشة وايد في المجلس وسويتها على شكل قوس حتى تكسر التناظر بالكامل.

الساحات الخارجية يبيلها اعادة ترتيب .... ارجوك حط صورة اكبر و افضل

بالعكس المساحات الخارجية فيها لاندسكيبنغ جيد ومواقف كفاية للسيارات وهذا شيء نعاني منه الحين .. وحاضر لك يا اخوي باحط صورة كبيرة .. وتعجبني أسئلتك .. بعدين ثرى الإرتدادات كلها قانونية وكل شيء محسوب بالملم.

[معماري قطري]

السلام عليكم

والله ياخوي معماري انت تعلمنا مانعلمك ،، ولكن عندي ملاحظه يمكن تكون صحيحه .

احسك حطيت في بالك و انت توزع البيت هدف وهو اني بستغل كل مساحه ممكنه ... حسيت البيت مزدحم بالحوش و بكل شي ،، او ان الصوره الي حطيتها عطتني هذا الايحاء .

عليكم السلام ورحمة الله

ذكرتني بواحد من ربعي فلسطيني الله يذكره بالخير .. يقول ما خليتش خرم ابره ما استغليته .. قصده عن بيتي الحالي .

بس شوف يا اخوي لازم الواحد تكون عنده خطه ومقاسات وأشياء بديله بعد .. وانا ركزت على الإناره الطبيعية وعلى العزل الحراري وعلى التجميل بحدود معقولة وبالزراعة في كم جهة وهذي بروحها يبي لها تفاصيل متعبه.

وهذي صورة أكبر إن شاء الله تكون أوضح.



شكلي بغيت أكحلها عميتها طلعت كلش مب واضحة .. المشكلة إني أحول من رسم أوتوكاد إلى صوره وما يعطيني البرنامج إختيارات أوضح .. باشوف باسوي فايل بي دي إف يمكن يطلع أوضح.

[Aaziz]

سو برنت سكرين للصوره في الاوتو كاد ... ملاحظه ثانيه بالنسبه للتصميم .
هل تعتقد ان الرؤيه بتكون امنه بالنسبه للسيارات ،، يعني السياره الي واقفه عند الدويره ،، هل الي في المنطقه هذي يقدر يكشف الي جاي من اليمين جهه الخمس سيارات ... اقصد مثلا لو كان طفل راكب سيكل ولا جاي يركض لا سمح الله من هذي المنطقه هل الرؤيه مكشوفه