السلام عليكم ،،

حبيت اقولكم بالي حصل معاي وافتح عيونكم اذا كنتو مثلي مدمنين طلبات اون لاين

عندي حساب ف ارامكس وصار لي تقريبا سنة ونص وانا اطلب والله العظيم كل مرة اروح استلم 11 او 10 باكجات اقل مرة كانت 5 باكجات والاوراق عندي تثبت

لاحظت ان كل مرة ادفع 1000 ريال وفوق واقل مرة كانت 400 ريال وشوي
واتضايق من نفسي اقول انا اطلب اشيا رخيصة جدا مثلا شوز فلات سعره حوال الخمسين ريال ليش ادفع 107 ريال شحن له ؟
واخر المرات طلبت اغراض لقطوتي والله كلفتتتتني صج صج مع ان البيت الي طالبته لها ب 135 ريال شحنه ب 474 ؟!

المهم اخر مرة رحت من 4 ايام استلم 10 باكجات و 7 منهم كفرات جوال وجارجات جوال للسيارة واثنين منهم لقطوتي وواحد شوز الله يكرمكم

قالت لي الحساب كامل 808 ؟!
انا شكيت قلت شدعوة كفرات جوال خفيفة جدا ليش شحنها ب 32 و 26
قلت لها لو سمحتي يصير اوزن كل باكج ؟ قالت اي جابت الميزان
قلت لها الكيلو الواحد بكم ؟ قال 74 ! قمت اوزن كل شي واضرب وزنه ب 74
وطلع رخييييييييييص شي بريالين وشي ب8 ريال هي انصدمت قلت لها انتو كاتبين على الباكج وزنه 0.25 وهو وزنه 0.6 !!! قالت مب منا هاي من شركة الارامكس بدبي قلت لها ولو لما يوصل سلوى لازم انتو تردون توزنون كلللل شي مايصير

وبعد ماحسبت كامل حسابي طلع 649 ، لان اغراض قطوتي ثقيلة وغالية شحنها ب 400 وشوي قلت لها من يوم ورايح انا باجي باوزن كللل باكج يخصني ولاتزعلون ونادت المسؤولة وتمت تعتذر وسمعتهم حجي قلت لها انا زبونة دايمة واطلب فوق ال10 اغراض كل مرة وبنفسج تشوفين وتعرفيني ليش كل هالاحتيال والنصب وتمت تحلف ان مب منهم

رجعت البيت طلعت كللل اوراق ارامكس الي عندي وتميت احسب انا يمكن دافعة لهم فوق ال5000 ريال على الفاضي وايد انقهرت والله كل مرة 1000 ريال او 800 او 400 اقل شي

حتى قلت بيني وبين نفسي لو الكراتين للحين عندي جان رجعت اوزنهم قدامهم واخذ حقي حتى لو ارفع قضية او اروح حماية المستهلك اثبت لهم بالاوراق غش ارامكس

مب منهم فتحو فرع يديد وعلى الفلوس الي ينهبونها جان زين يفتحون افرع قريبة سكرو فرع الاند مارك وفرع اللجنة الاولمبية

انتبهو اذا انتو دايما تروحون ارامكس تستلمون باكجات اوزنو كل شي واضربوه ف 74

يعني مثلا لو باكج وزنه 0.19 اضربوه ف 74 وبيطلع لككم الناتج 14.06 ريال

حبيت انبهكم بس ..