السلام عليكم ورحمة الله وبركاته
صار موقف لواحد من الشباب يوم السبت تاريخ19/1/2013 وحبيت انقله لكم مع الادلة بالصور
عشان الكل يحط باله وينتبه من الغش الي قاعد يصير من ورانا واحنا على نياتنا .
.
.
.
صاحبنا مودي سيارته كروزر حق محل في الوكرة باذكر لكم اسمه في نهاية الموضوع
ودخل سيارته وطلب من العامل الهندي يبدل له الايل ويركب له ايل تيوتا الاصلي
وصاحبنا قاله انا باروح وبارجع لك بعد شوي
وطلع يتكلم بالجوال ولما شاف الهندي جاب كارتون الآيل وطلع علبة الآيل وحطها فوق الكارتون
دخل مرة ثانية صاحبنا وهو يخززز الكارتون لأنه شوي وصخ وشاف العلبة الي فوق الكارتون
كانت العلبة نظييييفة ومحد كان يقدر يشك انها قديمة
بس صاحبنا شك في الغطا انها شوي كانت مايلة ويوم دقق زيادة...
ركزوا بالصور واحكموا
وفتح الغطا في العلبة الاولى واكتشف الصدمه
والثانية
وعقب طلع كل العلب الي بالكرتون
عرفتوا شلي كان يصييير :4ce6d2:
كانوا يبطلون القصدير الي فوق العلبه بشويش عشان مايبين ان القصدير انفتح
يعني كانوا الي مايخافون ربهم يستغلون الناس ويغشونهم بآيل مغشوش غير التيوتا
يمكن يحط في العلبة الاصلية ايل بورخيص ونوعيه رديئه
وصاد الهندي وقاله ايل شنو هاي
قاله ايل تيوتا مسوي نفسه غشيم
وراح علطول حق المسؤول الإيراني ولد راعي المحل كان بالمكتب
بس الحركة الحلوة الي سواها صاحبنا انه صور العلب قبل مايكلم المسؤول الإيراني
وعقب قاله شنو هاي الايل
قاله الايراني هاي ايل تيوتا اصلي
قاله صاحبنا لا لا انا اقصد الايل الي داخل العلبة شنو
رد عليه الإيراني
وهو يتمسخر يقوله يعني علبة تيوتا شنو راح يكون الايل الي داخل بنظره استهزاء :4ce6d2:
صاحبنا يقوله معليه انا غلطان
و يحقره ويروح صوب سيارته
ويمسك الجوال ويبي يتصل على رقم حماية المستهلك
ولا يحصل الايراني جاي من وراه ويحب راسه ويحب يده ويترجاه ويستسمح منه شوي ويصيييح
ويقوله الي تبيه باسويه لاتسوي لي مشاكل
وبسرعه بسرعه يعطي الهندي فلوس ويقوله روح بسرعه جيب ايل اصلي من المحل مال قطع الغيار
وصاحبنا طنش له واتصل على حماية المستهلك وبلغهم والله يجزاهم خير متابعين الموضوع لين اليوم
وان شالله يتخذون اجراء صااااارم بحقه وبحق كل من يستغل الناس ويغشهم
بس اكتشفنا عقب ان هالمحل عليه شكوتين من قبل بس مادري ليش ماتسكر
والشي الي ضحكنا عليه
بعد ماسكر الجوال صاحبنا من حماية المستهلك
الا يشوف الايل مش موجود بس علب فاضية
ويسأله وين الايل الي كان موجود فوق الكارتون
قاله الايراني
اي ايل ؟؟؟ انا ماعرف عن اي ايل تتكلم ؟؟؟
الا الريال طلع ماااااسح اثار الجريمة بثوااااااني وصب الايل وفضى العلب ههههه
وهالتقرير ماعملته الا عشانكم وعشان مصلحتكم وتـنبهون كل من يعز عليكم
حطوا بالكم وانتبهوا على الي يصير لنا واحنا على نياتنا ماندري ونأمن في هالحرامية على انهم ثقة
اسم المحل (شركة اطارات الوكرة) في الدوار الي بالوسط على شارع الشيخ عبدالرحمن بن جاسم
انا ماحبيت اشهر في المحل او اقطع رزقه
بس الي مايخاف ربه ويسوي هالسوات في الناس يستاهل الي يجيه
والله يكافينا شرهم ان شالله
العذر والسموحة منكم جميعاً على الإطالة
اتمنى اني وفقت في طرح هالموضوع والتقرير
وبالتوفيق للجميع
|
رد مع اقتباس
