الحمد لله وبفضل من الله ربي وفقني لمقاول وشركة محترمة لاتمام بناء الدور الثاني والحمد لله حتى هذه اللحظة والامور طيبة ان شاء الله ، لكن حبيت اشاوركم في عدة نقاط اختلفت فيها مع زوجي الله يحفظه
امس كانت عندنا جلسة مع المقاول على اساس له دفعتين متاخرتين عندي واضافات طلبتها في البنيان وخصومات السيراميك والخزاين والسخان اللي لي عليه ،
المهم طلع اللي له عندي 130250 ريال قطري حسب اللي هو قاله
حسب لي كل شي طابوقة طابوقة يعني حاسبني حتى على سوكيتات الكهرباء الزيادة وطبعا هذا حقه ، وبعد المناقشة معاه طلع انه ضايف 2000 ريال زيادة على شي خطا وطبعا حذفها ، وجينا لحسبتي انا وهي كالتالي
حاسبته على السخانات العادية المذكورة في العقد وكانت بمبلغ معين لسبع حمامات ومطبخ ، وبما اني ركبت سخان مركزي فالسخانات موضوع العقد لم تركب وبالتالي ترد لي فلوسي صح الكلام ؟؟؟
وحاسبته على الخزاين اللي ركبتها هو حاسب لي الخزانة ب 850 المتر وانا خزانتين سويتهم ب10500 ولي مبلغ طبعا عنده بهالقيمة
وحاسبته كذلك على غرامة التاخير وهذا هو اهم شي في الموضوع اللي هي 400 لكل يوم ، وهو متاخر عالتسليم حوالي 4 شهور وكم اسبوع طبعا انا لغيت ايام الاجازات الرسمية اللي الدولة تعطينا فيها اجازة مثل الاعياد وخلافه وكنت كريمة معاه ولغيت شهر وشوية بما اني دخلت برمضان وكانوا العمال متكاسلين شوي ، وطلع لي مبلغ حلو من التاخير
وحاسبته بعد لعى 5% من قيمة العقد اللي هي730 الف ، تطلع تقريبا 36000 وهذا المبلغ يتم حجزه مدة 400 يوم حسب الاجراءات المتبعة او شيك ضمان منه بهالمبلغ يرجع له اذا كانت الامور في السليم خلال هال400 يوم
لكن زوجي الله يحفظه اخذني على جنب وقالي حرام تحاسبينه على سخانات وعلى تأخير وتمسكين عليه 5% ، قالي حرام هذا حلااله ،طبعا تناقشنا وايد وماوصلنا لاي نتيجة هو متمسك انه ماياخذ اي غرامة تاخير ومكتفي بشيك الضمان وانا ابي غرامة التاخير مع شيك الضمان وطبعا فلوس السخانات والخزانات تنخصم من الدفعتين اللي باقية له
بنظركم انا ظلمت هالمقاول لما حسبت عليه غرامة التاخير ؟ وليش ظلم اذا هالشي مذكرو بالعقد وموثق وتعاملنا مع بعض من البداية بما يرضي الله ؟؟ وهذا هو حاسبني على كل شي ولا قلت شي وهذا حق ماينقال فيه شي ،
تعتقدون اني ظالمة ، انتظر رايكم بهالشي وعسى بو عيالي يقتنع بكلامي ومايخلينا طيبين زيادة عن اللزوم ، طيب هو متاخر وفيه شرط جزائي وانا ماتاخرت في ولا دفعة ولا في توريد اي اغراض للبيت التاخير من عنده وفي التشطيب هو اللي عماله يوم يجون وعشرة مايجون ليش انا اتحمل اخطاء الاخرين ؟؟ هل وجهة نظري صحيحة ام لا ؟؟
وتحياتي لكم جميعا