بسم الله الرحمن الرحيم
السلام عليكم عساكم علقوه:
هذا تقرير عن السياحه في بريطانيا في شهر ابريل، ^,^
اول خطوه
الفيزا البريطانيه:
خطواتها بالترتيب باختصار
تعبئه الابليكيشن اونلاين - تدفع الرسوم اونلاين - تاخذ موعد
تطبع الابليكيشن وتاخذ وياك الاوراق الداعمه لطلب الفيزا (شهاده راتب- كشف حساب 3 اشهر-حجز فندق - حجز تذاكر.. الخ ) الى "برج الشريف بالقرب من اشاره تيوتا" في الموعد المحدد لك
اجراءات الفيزا تاخذ من 5 الى 10 ايام عمل
ملاحظه:
-تقدر تاخذ موعد مستعجل + تستعجلهم في اجرائات الفيزا - تدفع تقريبا 500 ريال
---------------------------
تذاكر السفر + الفندق
جدول الرحله 5 ليالي في لندن + 5 ليالي في ليدز
طيران القطريه يروح (دوحه - هيثرو - دوحه) مباشر
طيران الاماراتيه يروح (دوحه-دبي-هيثرو-دبي - دوحه) ترانزيت ساعتين في دبي
طيران البريطانيه تروح (دوحه - بحرين - هيثرو - بحرين - دوحه) ما تنزل من الطياره ساعه ونص انتظار
الاسعار واوقات الرحلات تحصلونه بالتفصيل في مواقع كثيره وشركات السفريات
بخصوص الفنادق:
لندن ( فندق ثيستل ماربل ارش) Thistle marble arch
اربع نجوم - تقريبا الليله 850 - 900 ريال مع الفطور
الموقع استراتيجي بين شارع اكسفورد والادجورد رود و دقيقتين مشي للهايد بارك
محطات الباص العادي والسياحي قريبه جدا + محطه مترو ماربل ارش دقيقه مشي
ليدز (فندق الماريوت) marriot leeds
اربع نجوم تقريبا 350 - 400 الليله مع الفطور
موقع الفندق في نص المدينه- قريب من المول الجديد ومحطه القطار
----------------------------
الاماكن السياحيه في لندن (أول 5 ايام) :
قبل السفر تقدر تحجز تذاكر للاماكن المهمه اونلاين او في برج الشريف "مكان تقديم الفيزا" يبيعون هال التذاكر بسعر تقريبا نفس سعر النت (يمكن 10 - 15 ريال عموله لهم)
الي تحجزهم قبل ما تروح لندن الاتي:
1- big bus London الباص السياحي الي سقفه مفتوحه، لونه احمر ولهم موقع يبين لك طريقه سيره، هال الباص مفيد لانه يمر على كل الاماكن السياحيه الحلوه في لندن، احجز حق يومين 48 ساعه (سعر النت تقريبا 20 ياوند للشخص تزود عليهم 6 باوند تاخذ حق يومين)
2- London eye لندن اي، عجله لندن الكبيره (احجز لل fast track) تقريبا 20 باوند للشخص، التذكره متضمنه فلم 4D لاتنسون تدخلونها
3- believe it or not معرض صدق او لا تصدق، مكانه في البيكادلي، تذكرته 15 باوند تقريبا
4- مدام توسو Madame Tussauds معرض متحف الشمع، خذوا الfast track تدفع زياده احسن من النطره نص ساعه في الزحمه، التذكره متضمنه فلم 4D
5- اكواريوم (ملاصقه للندن اي) معرض للكائنات البحريه، بسيط وما يستاهل بس فيه بطاريق ههه
6- باص الى مدينه bicester village الى الاوت لت outlet فيه فوق ال40 محل كله ماركات واسعارهم اقل ب 70% من اسعار السوق،
الباص ياخذكم من فندقكم لين الاوت لت ساعه 9 الصبح، ويردكم الفندق 7 المغرب،
تقريبا 10 باوند على الشخص،
7- London Tower : قصر قديم فيه متحف المجوهرات الملكيه الحلو فيه اطلالته على جسر لندن، القصر بياخذ قريب الساعه ونص من وقتك لان كبير
-----------------------
نبدأ بسم الله بالجدول السياحيمع الصور:
اليوم الاول:
الوصول الى لندن، لو كان الوصول قبل الغروب تقدرون تاخذون فره في الهايد بارك hyde Park خاصه منطقه البحيره- اما لو الوصول متأخر فجوله في شارع الاكسفورد زينه،
الهايد بارك كبيره وهي فعليا عباره عن حديقتين جنب بعض يفصل بينها شارع تمر فيه السيارات، في حدود الحديقه بتشوفون اعمال فنيه وتحف وتماثيل كل واحد له قصته، والمنطقه الي عند شارع الاكسفورد بتشوفون الmarble arch قوس النصر
شارع الاكسفورد شارع تقريبا 2 كيلومتر، كله محلات ومطاعم، فيه السلفردج "كل العطورات الراقيه متوفره فيه" يعتبر ثاني اكبر مجمع تجاري بعد الهارودز، وفي الاكسفورد بعد محل ديزني،
يتقاطع مع الاكسفورد شارع الادجورد رود ويسمى "شارع العرب" كله شيش ومطاعم عربيه، اسعار مطاعمه غاليه وجوده الاكل مب لهناك، وما يفضل انك تاكل فيه ابدا، تدخله نص ساعه كفايه عليه،
هذا اول يوم، ولو كان في الواحد شده يقدر ياخذها مشي للهارودز "بعد المشي للبحيره تروح للصوب الثاني وتقطع الشارع وتوصل للهارودز"
اليوم الثاني:
من الصبح رحله الباص السياحي (محطته قريبه من الماربل ارش) وتحصل ناس لابسين شعار الباص، اول باص يتحرك ساعه 8:30 يفضل انك تلحق عليه مع انه كل 20 دقيقه باص، و ميزه الباص انك تقدر تنزل في اي محطه، وترد تركب الباص الي عقبه ،
في رحلتين للباص "الخط الاحمر والخط الازرق" خذوا الخط الاحمر لان الازرق يمر على اماكن ممله،
اول نقطه توقف للباص (مدام توسو) متحف الشمع، فيه تماثيل شمع لمشاهير، وعلى نهايه المتحف فلم 4D، المتحف ياخذ تقريبا ساعتين او ثلاث ساعات،
بعد المتحف تردون تاخذون الباص السياحي، بيمر على مناطق منها البيكادلي و الترافجلر سكوير (منطقه حلوه مطله على المتحف وقريب منها محل M&M's لا يفوتكم) بس مب الحين بنروح لها، خلكم بالباص لين يوصل الى محطه لندن اي،
هناك المنطقه فيها مناظر حلوه، بس زحمه شوي، وفي مطاعم ومقاهي، تركبون اللندن اي طبعا لا تدخلون بالخط الزحمه لانكم حاجزين fast track
بعد لندن اي، تقدرون تاخذون رحله في العباره على النهر (الرحله ببلاش متضمنه في تذكره الباص السياحي) وتقدرون بعد تروحون ببلاش الى مدينه غرينتش تقريبا 45 دقيقه بالعباره لو كان الوقت بدري بس ما يفضل لانها بتاخذ كثير من وقتكم
رحله بالعباره الى الجهه الاخرى من نهر التايمز "بينزلكم على جسر لندن" تنزلون هناك وتروحون الى London Tower قلعه قديمه كبيره، المناظر حلوه من فوق "حاولوا تدخلون ويا قروب يشرح لكم كل شيء" -
وبعد القلعه مشي الى اقرب محطه للباص السياحي او تقدرون تاخذون العباره مره ثانيه الى لندن اي ومن هناك تاخذون الباص السياحي مره ثانيه - لو في وقت تقدون تدخلون اخر شيء معرض "اكواريوم" لو مافي وقت تخلونها لثالث يوم
اليوم الثالث:
تقدون تتاخرون شوي وتاخذون رحله الباص السياحي -الخط الاحمر- ساعه 9 زين -تمرون على المحطات لين يوصل الى (ترافجلار سكوير) تنزلون مناك، الساحه حلوه، وفي كوفي شوب اسمه "نيرو" في الساحه،
الهدف من هال الحركه تشوفون تبديل الحرس في قصر الباكجهام، ساعه 10 تقريبا شركه الباص تسوي رحله "مشي" تمشون الى القصر وفي الطريق بيشرح لكم عن كل شيء يمر عليه لين ما توصلون الى القصر وتمشون ويا الحراس في مسيرتهم، (تقريبا ساعه 12 يخلصون تبديل الحراس)
بعد تبديل الحراس تروحون الى الحديقه الي جنب القصر "St.Jamees Park + Green Park" حديقه سانت جمس احلى، ومنها تروحون لاقرب محطه للباص، الى منطقه البيكادلي، مناك في معرض believe it or not تدخلونه
وبعد المعرض تمشون تقريبا 10 دقائق الى M&M's world
والى اقرب محطه باص سياحي ويردكم الى المحطه القريبه من الفندق
اليوم الرابع:
جوله الصباح في الهايد بارك وجوله القارب الى الهارودز،
وبعد الهارودز تاخذون تكسي الى "برج شارد" تقدرون تروحون لطابقين فاتحينهم للزوار تشوفون منظر لندن من فوق،
تروحون اكواريم في حاله ما كان في وقت في ثاني يوم او الاكسفور ستريت والاماكن الي ذكرتها وما كان في وقت لها الخ ..
اليوم الخامس:
من الصباح الى بستر فيليج الي فيها الاوت لت، يعتبر اشهر اوت لت قريب لندن، الطريق ساعتين تقريبا،
اليوم السادس:
التشك اوت من لندن الى ليدز الرايقه
1- يا تاخذون القطار " متعب اذا كان عندك شنط ثقيله"
2- الباص من لندن "محطه فكتوريا الى ليدز" مريح وينزلك قريب فندق الماريوت في ليدز تقريبا 40 باوند للشخص
3- التكسي الى ليدز تقريبا 180 باوند، مريح ويوصلك لباب الفندق،
بخصوص التكاسي، افضل شركتين alphamini cap + minicapinlondon
وتقدر تحجزهم اونلاين بدون ما تدفع ويستقبلونك في المطار، انا افضل شركه alpha
عن تجربه،
الوصول الى ليدز ولفه سريعه في الستي سنتر (الcity hall تقريبا 5 دقايق مشي، مبنى حلو وساحه هاديه وفيه متحف ليدز ما يتفوت) و منطقه الاسواق ( والمول الجديد وعندهم عجله ليدز leeds wheel تشوف كل ليدز من فوق والسوق الشعبي عند العجله،،
بس هذا الي اعرفه في ليدز،
تروح محطه القطار القريبه من الفندق، تشتري تذاكر قطار الى مانشستر + ليفر بول + يورك
مانشستر وليفر بول قريب الي 10 -20 باوند للشخص
يورك تقريبا 5 باوند للشخص
تآكد تاخذ كل المدن "دايركت" يعني ما تتطر تغير القطار في اي محطه، ولو تبي للضمان تدفع شوي زياده وتاخذ رحله مفتوحه ما تلتزم في وقت محدد للقطار،
اليوم السابع:
الى مانشستر بالقطار "تقريبا الطريق ياخذ ساعه" وتنزلون في محطه "بيكادلي" تعتبر في وسط المدينه،
مانشستر للي ما يهتمون بالنادي الرياضي بتكون مدينه شبه ممله،
الاماكن السياحيه فيها
"city hall" و "city center" اول ما تنزل من محطه القطار 3 دقايق مشي، منطقه فيها محلات + مبنى قديم
حديقه heaton park تقريبا 10 دقايق بالتكسي 12 باوند، الحديقه كبيرررره، على 3 مرات من الهايد بارك، الشيء الوحيد الحلو فيها منطقه في نص الحديقه اسمها "the farm" المزرعه ، فيه دجاج وخرفان ومن هال الكائنات اللطيفه،،
مول trafford center يعتبر من اكبر مولات اوروبا، كبير ومتفرع فيه محلات كثيييره،
ونادي مانشستر تقدرون تاخذون جوله داخله،
المدينه مافيها باص سياحي الا يوم السبت فقط
وما فيها عجله او مانشستر اي
والعوده الى ليدز في اخر اليوم
اليوم الثامن:
الى ليفر بول - تقريبا ساعه ونص الطريق- المدينه مطله على البحر فالجو بيكون ابرد من ليدز، خذوا احتياطاتكم،،
اول ما تنزلون من المحطه، تاخذون فره عند المبنى الكبير "المتحف" مب لازم تدخلون المتحف، بس في حديقه حلوه،،
عند باب االمتحف تحصلون محطه للباص السياحي، تركبون بالباص السياحي -في شركتين اثنينهم ممتازين- 8 -10 باوند للشخص، بياخذكم فره في ليفربول، خلكم بالباص لين يوصل للمنطقه القريبه من البحر "عند liverpool wheel تنزلون مناك،
المنطقه حلوه للمشي وفيها مطاعم عندهم اكل نباتي زين، وقريب منها متحف تايتانك + المتحف البحري، فيه تاريخ تايتانك واشياء حلوه، الدخول مجاني،
بعد المتحف الى liverpool wheel ، وبعدها للباص السياحي، الى محطه القطار والعوده الى ليدز
اليوم التاسع:
الى YORK - المدينه المشهوره بالفايكنك وبلد مصنع الشكلاته،،
الطريق 30 دقيقه بالكثير،
تاخذون الباص السياحي- محطته قدام محطه القطار بالضبط، بياخذ فيكم لفه في المدينه، الاماكن الي لازم تزورونها هي الاتي، تسآلون الي يبيع التذاكر واهو بياشر لكم في الخريطه على اقرب المحطات للاماكن:
1- Chocolate story :معرض عجيب عن تاريخ الشكلاته، بعضهم يسمونه York sweet story
2- Clifford tower قلعه صغيره على قمه هضبه شكلها حلو، وعندها متحف يورك مب لازم تروحون له،
3- اقدم شارع تجاري في انجلترا shambles street شارع فيه محلات اعمال يدويه واشياء حلوه،
4- متحف الفايكنك Jorvik ، متحف حلو بس صغير يشرحون فيه تاريخ الفايكنك بطريقه حلوه،
المدينه المشي فيها ممتع، وتحسها متمسكه بماضيها ولاحظت البط منتشر في كل مكان وزاعج الناس خخخ
ملاحظه: لما تشترون تذكره الباص السياحي، يعطونكم خصومات على اماكن معينه، منها متحف الشكلاته، وبعض المطاعم، استغلوا هال العروض،
والعوده الى ليدز اخر اليوم،
اليوم العاشر:
تقدرون تخلونه مشي في مدينه ليدز، او راحه او تروحون بالقطار الى newcastle ما انصح فيها مدينه صغيره وماتسوى المشوار لها "تقريبا ساعتين بالقطار"
متحف ليدز
بخصوص العوده من ليدز الى مطار هيثرو ( يا تحجزون العوده من مطار مانشستر اقرب) او (لو اتطريتم للعوده الى مطار هيثرو في كذا طريقه اولها القطار الي يغير المحطه لازم في لندن kingcross
او بالتكسي "تقريبا 200 باوند
او بالباص من محطه الباصات 45 باوند للشخص، بس اسآلوا عن مواعيد انطلاقهم لانه باص واحد باليوم، يطلع 10 من ليدز ويوصل 4 العصر مطار هيثرو،،
هذي المعلومات الي عندي، والسموحه اذا طولت بالموضوع،،
فمان الله
|
رد مع اقتباس
المشاركة الأصلية كتبت بواسطة AL-MAYSTRO
