السلام عليكم اخواني وخواتي الاعضاء
حبيت انقل لكم تجربتي مع عملية تكميم المعدة
وبحاول قد ماقدر اختصر لكم واللي عنده اي استفسار انا حاضر اني ارد عليه سواء عالخاص ولا عالعام
وزني 105 و طولي 165
تاريخ العملية 6/7/2013 يوم السبت
مستشفى العمادي / الدكتور محمد العمادي
تكلفة العملية 50 الف ريال قطري .. دفعت عربون قبل العملية بأسبوعين 5000 وكملت المبلغ نفس يوم العملية
قبل العملية بأسبوع رحت المستشفى سويت تحاليل وتلفزيون وتخطيط للقلب
يوم العملية رحت المستشفى الساعه سبع وقبلها كنت صايم لمدة 12 ساعه وسجلت وخذت الغرفه اللي بتم فيها ليلتين
كان قبلي تسع اشخاص سووا العملية في نفس اليوم عشان جذي انا بدت عمليتي الساعه 12
المهم دخلت غرفة العمليات 12 عطوني البنج 12 ونص فتحت عيني 2
اول مافتحت عيني ماحسيت الا بألم قوي في ظهري " ليش مادري"
ودوني الغرفه .. طبعا اول يوم ماقدرت اكل ولا شي بس طول اليوم كنت ارجع دم طبعا هالدم نتيجة الجراحه في المعده لازم يطلع عشان تنظف المعده
ومن الم ظهري نسيت الم المعده
وكان تأثير المخدر فيني لمدة يوم كامل
وكنت اخذ كل 12 ساعه ابرة مسكنه لالم الظهر
وكانوا يعطوني مضاد في المغذي وابرة اعتقد لسيلان الدم
ثاني يوم خفت الآلام كلها علي بنسبة 40٪
بس الحمدلله ماصرت ارجع دم ونزلوني سوولي تلفزيون والحمدلله ماكان فيه اي تسريب وقالولي انه العملية ناجحه الحمدلله
بس تميت في المستشفى لاني ماكنت اكل ولا اسرب وعايش عالمغذي بس شربت ثاني يوم المغرب 10 مل ماي .. وقمت شوي امشي في الممر في المستشفى عشان الغازات اللي دخلوها وقت العمليه
ثالث يوم جابولي شوربه شفافه مافيها لاطعم ولا لون ولا ريحه شربت تقريبا نص استكانه وغثت علي
وطلعت من المستشفى ورجعت البيت
وصف لي الدكتور مكمل غذائي هو شي نفس الحليب البودر احطه مع ماي واشرب كوب يوميا
مع فيتامينات عباره عن شراب
وحبوب اخذها قبل الاكل عشان اللوعه
وحبوب اخذها عشان الحارج
تميت اشرب سوائل صافيه لمدة اسبوع مع عصير تفاح او عصير عنب بس يكون العنب حلو مب حامض لانه الحامض كلش مب زين لهالعملية
عقب اسبوع رحت لأخصائية التغذية وعطتني جدول امشي عليه
عقب عشر ايام رحت للدكتور محمد وكنت نازل بس سبعه كيلو .. الحمدلله وايد اوكي بس في ناس ينزلون تسعه انا اتوقع اني مانزلت مثلهم لاني مامشيت الصراحه الجو والرطوبه مايساعدون
بس من امس بديت امشي بس بديت احس بآلام بالخاصره من قلة الماي .. لاني من كثر ماشربت ماي اول اسبوع كرهته وصرت ماحبه ..
اليوم صار لي 13 يوم ونزلت تسعه كيلو
ومن يومين بديت احس باليوع واذا اشوف اكل يدخل في خاطري بس ماقدر اكله لاني ليلحين اشرب السوائل الغليظه
ولين كملت عشرين يوم عالعملية ببدأ آكل مهروس مثل الهريس والمضروبه وعيش لين مع روب
ولين اكمل الشهر ابدا آكل الاكل العادي بس بكميات قليله ولازم امضغه عدل

واخر شي لازم اقول له
الصراحه مستشفى العمادي عندهم اهتمام ورعايه كبيره للمريض .. والدكاتره يوميا يمرون ثلاث مرات عالمريض يطمنون عليه
وماشالله عالدكتور محمد سوالي العمليه بدون جراحه ومافي اي اثار اللهم شق طوله تقريبا واحد سم جنب السر و واحد فوقه وثلاث نقط موزعين عالبطن عطاني لهم مرهم والحمدلله بدوا يختفون

ادري طولت وايد بس كنت حاب اعطيكم تفاصيل
ونبدأ الاسئله اذا حد عده