ابي طريقة القهوة العربية المضبوطه

[الـخـور]

السلام عليكم ورحمة الله


ممكن تفيدوني كيف اسوي قهوة عربية ...درجة اولى ..

بالمقادير .. وطريقة الغلي .. جزاكم الله خير

[للصبر اخر]

توني اشوف موضوع بالنت عن قهوه للي مايعرف يسوي
موفرينها مثل النسكافيه ٣ في ١
اعذرني ما اقدر افيدك لاني ما اشربهاا

[كلاسيك قطر]

بسم الله الرحمن الرحيم

السلام عليكم ورحمة الله وبر كاته

حبيت اليوم انقل لكم طريقة صحيحة ومضمونه لعمل القهوه العربية

جبت لكم اليوم طريقة القهوة العربيه أتمنى تعجبكم,,


المقادير:

5 ملاعق شاهي مليانة بن هرري محموس بني فاتح مطحون ناعم,,

2 ملعقة شاهي هيل ,,

شوية زعفران,,

حليب كوفي ميت,, اذا لم يوجد نضع قطرات حليب بوني سائل او اي نوع,,



الطريقة:

نقيس مقدار دلة القهوة ماء ,, ونزيد على مقدار الدلة بيالة ماء,,ونحطها بالأبريق ونضعها عالنار ونضيف البن,,

ونتركها تغلي الى أن يتقطع قلبها ,, لمدة ربع ساعة أقل شئ,,وإذا القهوة مطحونة طحن خشن مو ناعم ,,

نزيد الوقت عن ربع ساعة,,



في الدلة نحط شوية حليب تقريبا 1ملعقة شاي ,,و2 ملعقة هيل,, وشوية زعفران,,





بعدين نصب القهوة في الدلة ,,وتمتعي بأحلى قهوة عند كل رشفة فنجان







منقوووووول

[alsoq]

القهوه العربيه لا ينفع معها الكوفي ميت

هيل
زعفران
قهوه

ولذه القهوه يعتمد على حمسه القهوة

اذا كان محموسه زياده يطلع طعمها قوي وكل ما خفت الحمسه قل طعم المذاق

[للصبر اخر]

انا اخذها للوالده من محل في سوق العلي
وما اشربها لن فيها مسماار

[مخطط قطري]

حياك المجلس وبعلمك شلون يسونها المقهوي عندي من ستاف الديوان سابقا

[قطرية مثقفة]

انا اخذها للوالده من محل في سوق العلي
وما اشربها لن فيها مسماار

صلالة في سوق العلي قهوته عجيبه وفرش

[Aaziz]

بعطيك طريقتي الي تعلمتها من الشيبان و للحين مستمر عليها .

حمسه القهوه لازم تكون محموسه شوي زياده ، يعني حبات القهوه تكون مايله للبني اكثر من اللون الاشقر او الاقرب للبيج .

بالنسبه للهيل يكون مطحون طحن خفيف جدا جدا . يعني يادوب الحبه تنكسر مرتين او ثلاث

المسمار وهذا على حسب الرغبه يكون مطحون ناعم .

و الطريقه كالتالي و المقادير تقريبيه للدله متوسطه الحجم

اولا: نحط الماء في الدله الاولى و الي تكون اكبر حجم من الدله الثانيه المخصصه للهيل .
وحاليا الناس يستخدمون الابريق الخاص بالقهوه ،، الي هو موجود على اليسار في هذي الصوره (ويسمى المطباخة) و تختلف التسميه من ناس لناس



تحط فيها ماء مقدار اكثر من النصف بقليل

وتخليه لين يغلي .. و تبعده عن النار عند اضافه مسحوق القهوه عشان مايفوح فوق .
الكميه تكون مقدار فنجالين قهوه و نص من الفناجيل الحجم العادي .
وتخليه يطبخ على نار هاديه لمده تقريبا 5 دقائق من الغليان و تضيف المسمار كميه قليله جدا (مقدار ملعقه او نص ملعقه شاي صغيره)

بعدين تبعده عن النار لحد ماتركد القهوه في قاع الدله و تنزل ترسبات القهوه الى الاسفل .

تروح للدله الثانيه (وتسمى المبهارة) و تضع فيها مقدار فنجال قهوه من الهيل .

و تشخل القهوه الي خليتها تركد شوي في الدله الي فيها هيل .. الي موجوده في الصوره على اليمين .. وهنا ركز ،، الهيل يطبخ مره وحده فقط عشان مايصير طعمه قوي و يحرق اللسان .. و تضيف شوي زعفران للدله ..
وكذا تكون القهوه جاهزه .. تقدر تصب من الدله هذي (الي فيها الهيل) مباشره باستخدام الشخال المعروف وهو من اللليف . او انك تصب القهوه في الدله المنزليه العاديه (الزمزمية او الترمس)

وهذي الطريقه الي اعرفها ولا احب القهوه الا بهذي الطريقه .

ولا افضل القهوه الي يحطون معاها حليب او نكهات اضافيه .. مجرد قهوه و مسمار خفيف و هيل و شي بسيط زعفران .

[الـخـور]

توني اشوف موضوع بالنت عن قهوه للي مايعرف يسوي
موفرينها مثل النسكافيه 3 في 1
اعذرني ما اقدر افيدك لاني ما اشربهاا

يكفي مرورك .. وجزاج الله خير

[الـخـور]

كلاسيك قطر ، السوق ..

مشكورين على الطرق >> راح اجرب ان شاء الله ...
بس اعتقد الحليب ماينفع مع القهوة العربية