كم تكلفة اسبانيا لمدة سبوع ( الاندلس )

[الاستاندر]

السلام عليكم
شباب انا مالي خبره في اوربا وحاب اعرف لان مابي اوهق نفسي اودي مبلغ كبير ولا اقصر على عمري اودي شي بسيط
انا حاب اروح اسبوع معاي اخوي وولد عمي بس حاب اعرف مصروف الشخص بنفسه كم
مابي مدريد ولا برشلونه
انا خاطري اشوف مناطق تاريخيه اسلامية مناطق الاندلس
مثل مالقة وقرطبه واشبيليا وغراناطه ( قصر الحمراء )
يعني جدولي بيكون متاحف ومعالم اثريه بما اني من عشاق تاريخ الاندلس ومتعمق في تاريخها من سنتين

وشلون فنادقهم ومواصلاتهم
يعني ابي واحد يرتب لي جدول حلو واسامي فنادق حلوه وكم تكلفة الشخص من غير تذاكر طبعا

[حمد 2002]

انصحك اتراسل الاخ (( غير البشر )) تراه عنده خبره ومايقصر ويعتبر موسوعه بهالأمور ،،،

تحيااااااااااتي لك والله ايوفقك ان شاء الله

[Chambray]

هلا الغالي

انت كم حاط في بالك ميزانية

باقولك شئ

دام انكم شباب .. فموضوع الميزانية انت الي تقدر تتحكم فيه بنفسك

2000 يورو انت و 2000 يورو ولد عمك
صدقني كافيه وبتزيد

لمدة 10 ايام

شرايك

طبعاً من غير ( تذاكر السفر )

انا اتكلم عن الفنادق وعن المأكل والمشرب والرحلات ، نعم 20 الف ريال تكفي لمدة 10 ايام

لان انا اذا اسافر رحلة شبابيه

آخر شئ افكر فيه هو ( الفندق )
اسكن في فندق بونجمتين .. واموري طيبه

استخدم المواصلات العامة من باصات وقطارات واعيش حياه السائحين الاجانب واموري ممتازة

اكل من المطاعم الشعبيه ( شوارما ) - ( بيتزا ) واشياء حلوه ومب غلط كل يومين او 3 اروح مطعم فاخر كم بيكلفني !! 100 يورو لشخصين ما اعتقد هههههه


انت هدفك يالغالي الاندلس

مابين ( الميرا - غرناطة - ملقا - ماربيا - قرطبة ) الخ الخ الخ


واذا تبي المتعه .. استأجر سيارة واستمتع


انتوا شباب لاتشيل هم الميزانية ابداً ..

لكن نصيحة ..
2000 يورو حطها ميزانية الجيب
و فوقها 4000 يورو ( خلها احتياط مابين بطاقة البنك وبطاقة الفيزا كارد ) لاتستخدمها إلا لوقت الحاجه القصوى ..

مع اني اعتقد 2 بتكفيهم 4000 يورو وبتزيد بعد

اذا طلعت الفيزا وحجزت طيرانك .. كلمني ارتب لك الرحلة

على فكرة .. الاندلس من احلى مناطق اسبانيا .. ولا تصدق الي يقولك ( برشلونه ومدريد ) والله مافيهم شئ ومملين

انا يالشمال الاسباني ( خيخون وسان سبيستيان وبلباو وماحولها )
ولا الجنوب الاسباني ( الاندلس )
او ( الجزر الاسبانية ) ابيزا - مايوركا - جزر الكناري ..


وللمعلومية :
اسبانيا تعتبر من ارخص الدول الاوروبية بالمقارنه مع فرنسا وسويسرا وانجلترا ..

اهم شئ حط في بالك ان الوناسه مش في الفندق ..
لان ربعنا الله يهديهم يحجز لك في فنادق فخمه تكلف 500 يورو و 800 يورو في الليله
ويقول لك ترا البلاد غاليه واقل شئ يبيلك 100 الف

وانا اقولك اذا كان آخر اهتمامك الفندق .. فازهل الباقي ..
ومش معناته تحجز في اخس فنادق اسبانيا
بالعكس في فنادق رخيصه ونضيفه
مثل سلسله فنادق ibis سلسله فنادق ميركور ، نوفيتيل .. اسعارهم معقوله في حدود 40 - 120 يورو في اليوم .. ونظاف وحلوين جداً ..
بس مافيهم رفاهيه مثل بركه سباحه وسبا وعمال يشلون الشنط ويدلعونك ..
في هالفنادق اخدم نفسك بنفسك .. وارقد رقده هنيه مرتاحه ..واطلع وارجع تحصل غرفتك مرتبه ونظيفه .. وامورك عسل



واجازة سعيده مقدماً

[الاستاندر]

تسلم الغالي والله ردك جميل وعجبني شوف انا عن نفسي
الفندق اهم شي يكون نظيف ومرتب مالي في برج السباحه والسابا انا ابي اطلع اتمشى ماحب قعدة الفندق
احنا 3 يعني تقول 6000 يورو تكفي
وبنحصل فندق فيه غرف كبير حق 3 اشخاص او شقق
وثاني شي الفيزا والماستر موجودين اكيد
بس لو تعطيني اكثر عن التنقل اذا مثلا سكنت في ماربيا وحبيت ازور المناطق القريبه وارجع نفس اليوم اقدر ولا كل منطقه اقعد فيها وابي اعرف شلون نظام الباصات السياحية وشنو المناطق الي مالي حاجه ازورها
وفي مطاعم عربيه او لا
والغالي انا مخطط على بداية او نص تسعه اكيد بستعين فيك في جدول السفره قبلها هههههههههه

[ذيب ازغوى]

يالربع اللي يعرف سواقيين عررب في اسباانياا في مدريد او برشلونه يعطيني ارقاامهم

[Chambray]

تسلم الغالي والله ردك جميل وعجبني شوف انا عن نفسي
الفندق اهم شي يكون نظيف ومرتب مالي في برج السباحه والسابا انا ابي اطلع اتمشى ماحب قعدة الفندق
احنا 3 يعني تقول 6000 يورو تكفي
وبنحصل فندق فيه غرف كبير حق 3 اشخاص او شقق
وثاني شي الفيزا والماستر موجودين اكيد
بس لو تعطيني اكثر عن التنقل اذا مثلا سكنت في ماربيا وحبيت ازور المناطق القريبه وارجع نفس اليوم اقدر ولا كل منطقه اقعد فيها وابي اعرف شلون نظام الباصات السياحية وشنو المناطق الي مالي حاجه ازورها
وفي مطاعم عربيه او لا
والغالي انا مخطط على بداية او نص تسعه اكيد بستعين فيك في جدول السفره قبلها هههههههههه

حلو .. اذا انتوا 3 ( ميزانية 6000 يورو ممتازة ) حق 11 ليله - 12 يوم
فلنفترض ( معدل الليله في الفنادق 150 يورو ) يعني يبيلكم 1500 يورو على جنب
لاتنسى الفنادق الرخيصه عاده تكون مهيئة لشخصين فقط ، لذلك لو صارتوا 4 اشخاص بتكون الاسعار افضل ..

عموماً 150 يورو ان شاء الله بتحصل فنادق طيبه فيها وبتكفيكم باذن الله

النصيحة
استئجار سيارة ..
وانسى موضوع الباصات ( لانكم قروب 3 اشخاص )

الزامي تحددون قطية يوميه فالنفترض تكون ( 300 يورو ) وتكون عند شخص واحد منكم
يعني كل واحد يدفع 100 يورو يومياً

والشخص الي بتكون عنده القطيه ( هو يتكفل بكل شئ )
مثلاً :
عشى - غدى - كوفي - فواكه - ماي
بترول سيارة
تذاكر زيارة متاحف
تذاكر مدن الترفيه
تذاكر الاماكن السياحية
رسوم مواقف السيارة

وان نقص شئ كل واحد يزيد 50 يورو في نفس اليوم


ويسمى هذا الشخص ( أمير الرحلة ) انتوا تحددونه من والمفروض يكون هو الي عنده الترتيب .. مثلاً اليوم بنروح المكان الفلاني . اليوم بنروح المكان الفلاني ، محد يعترض .. لان الترتيب عند امير الرحلة ..


هذي نقطة

النقطة الثانية ..
استئجار السيارة لفترة 12 يوم


الرحلة كالتالي
تبدئها من ملقا وتأجر السيارة من ملقا
وتجلسون فيها ليله وحده فقط
ثم الانطلاق إلى مدينة cadiz
مدينة قادس تعتبر من مدن الاندلس .. تجلسون فيها ( ليلتين )
ومنها إلى sevilla
تسمى باللغة العربية مدينة اشبيلية
وهي من مدن الاندلس .. هالمدينة انصحك تجلس فيها ( ليلتين ) جميله

ومنها إلى مدينة cordoba
مدينة قرطبة ، تعتبر من اهم مدن الاندلس .. حيث كانت مدينة الدولة الاموية .. وبها مسجد قرطبة ، والحي اليهودي ، ومدينة الزهراء والحمامات العربية ، كأنك في المغرب من جمال آثارها الاسلامية
انصحك بالجلوس بها ( ليلتين )

ومنها إلى مدينة granada
غرناطة ،، نعم تستحق الجلوس بها ( ليلتين ) جميلة وبها الاثار الاسلامية ، وقصر الحمراء البيازين و جنه العريف .. وجوها عليل غرناطة لارتفاعها النسبي عن سطح البحر 700 متر تقريباً ..

ومنها إلى مدينة Malaga
مدينة ملقا
والجلوس بها ( 3 ليالي )

وتستطيعون زيارة مدينة طنجة بالمغرب بالسيارة ..

ومنها تسلم السيارة في المطار وانت راجع إلى الدوحة

رحلة صدقني ماراح تنساها ابداً ..

طبعاً لاننسى ان القطرية مالها خط مباشر إلى ملقا للاسف

لذلك سوف تضطر إلى التالي :-
اما حجز تذكرة ( دوحة - برشلونه - دوحة ) ومن ثم تاخذ رحلة داخليه ( برشلونه - ملقا - برشلونه ) وتزيد ليلتين ( لان ليله لازم تريح فيها في برشلونه ) وليله العوده لازم تريح فيها في برشلونه )

او انك تاخذ طيران غير مباشر
مثلاً :
التركية
الدوحة - اسطنبول - ملقا
والعودة نفس الشي
ملقا - اسطنبول - الدوحة


او الالمانية
الدوحة - فرانكفورت - ملقا


او البريطانية
الدوحة - لندن - ملقا

يالربع اللي يعرف سواقيين عررب في اسباانياا في مدريد او برشلونه يعطيني ارقاامهم

للاسف يالغالي انا ماعرف ارقام سواقين في اسبانيا .. لاني دائماً اجي بسيارتي من فرنسا حتى الجزر اروح بسيارتي ( اشحنها في الباخره ) ..
لذلك النصيحة انك تأجر سيارة بنفسك احسن من السواقين

[Chambray]

المسافات بالسيارة

ملقا - قادس
( 240 كيلو ) ساعتين ونص

قادس - اشبيليه
( 130 كيلو ) ساعة ونصف


اشبيلية - قرطبة
( 140 كيلو ) ساعة ونصف

قرطبة - غرناطة
يوجد طريقين ( طريق جبلي رائع ) 160 كيلو ( ساعتين قيادة )
او طريق هاي وي ( 200 كيلو ) ونفس الوقت ( ساعتين قيادة )


غرناطة - ملقا
130 كيلو ( ساعه ونصف )

المسافات مثل ماتلاحظ بسيطة جداً .. وسهله
ومافيها تعب ابداً ..

انت انوي .. ونرتب لك السكن باذن الله

ازهلهااا

[آنــه]

من قرطبه إلى غرناطه و بدون توقف ثلاث ساعات إلا ربع بالضبط بالسيارة و لحد قصر الحمرا .. شهر 11 انا كنت هناك ... وعن الفنادق في فندق أظن تابعه للماريوت اسمها ac تقريبا هذا اسمها أسعارهم زينه حق الميزانية المحدودة

[Chambray]

من قرطبه إلى غرناطه و بدون توقف ثلاث ساعات إلا ربع بالضبط بالسيارة و لحد قصر الحمرا .. شهر 11 انا كنت هناك ... وعن الفنادق في فندق أظن تابعه للماريوت اسمها ac تقريبا هذا اسمها أسعارهم زينه حق الميزانية المحدودة

كم كنتوا تسوقون ؟؟ واي طريق سلكتوا ؟؟
لان في 3 طرق توصل بين المدينتين

[آنــه]

كم كنتوا تسوقون ؟؟ واي طريق سلكتوا ؟؟
لان في 3 طرق توصل بين المدينتين

طريق الخدمه المدفوع الاجر ( الجبلي ) و كانت السرعه اللي موجوده على الشارع نفسه ما نزيد عن القانون