العضوية في شركات السياحة ، هل حقيقة أم نصب ؟؟؟

[toghma]

السلام عليكم ورحمة الله وبركاته

في البداية بحثت في المنتدى عن موضوع مشابه لموضوعي لكن للأسف ما لقيت ، وبنفس الوقت استغربت أن هالشئ محد تكلم عنه من قبل !!

هو مش موضوع ، كثر ما هو استفسار عن شركات السياحة واسلوب موظفينهم في البحث عن الزباين في المجمعات التجارية والجمعيات الاستهلاكية .
تفضل حضرتك ، جاوب على سؤال : اذكر لي واحد من عجائب الدنيا السبع ، امممم ( كتارا ) ـ صح
الف مبروك يا أفندم ، تشرف حضرتك مع المدام بكرة تحضر معانا جلسة بالشركة وتستلم جائزتك على طول عبارة عن عطر ماركة ( تستخدمه علشان تشيل المخفي من السيارة )

المهم ما أطول عليكم ، انا شفت من هالشركات كثير في الدوحة وفي دبي ، واخيرا أمس قدر واحد منهم يقنعني ويخليني ازورهم وسندروني ساعة ونصف ( او بالاحرى أنا إلي سندرتهم ) وشرحولي سالفتهم إلي هي باختصار ( تشترك معاهم في عضوية تتملك عن طريقها شاليه لمدة اسبوع فقط كل سنة !!! بعقد موثق من وزارة التجارة والخارجية ) وعقب بيأجرونه لك وسوالف وخرابيط وايد وايد .
والحلو بالموضوع انك يا توقع معاهم على العقد الحين الحين بمبلغ 39000 ، واذا بتطلع من عندهم وتفكر وترجع بكرة بتدفع 60000
تصدقون هالشئ ؟؟

الحين استفساري ، هل أحد منكم انقص عليه واشترك ؟ استفاد شئ ؟
لأن كان واضح من اسلوب الموظف ان السالفة كلها نصب في نصب

ممكن كل واحد يدلو بدلوه ، وياريت اصحاب الخبرة لو سمحتوا

اوه نسيت اقولكم ، جائزتي كانت تذاكر لأكوابارك وقالولي انهم خلصت للأسف ، واسبوع اقامة في شاليه خمس نجوم ، عطوني ورقة مختومة لاقامة 3 ليالي فقط في فندق 3 نجوم في تايلاند !!!! يعني تغسل ملابسك بنفسك وفي خصم على الصابون

[abdo222]

مرينا بنفس تجربتك ,,

الشركه هدفها تأجر لك او تبيع لك شقق او شاليهات ,, لو انت من النوع الي كل سنه تروح البلد الفلانيه راح تستفيد بشكل مشروط من عروضهم

1- لازم تدفع وتشتري الشقه او الشاليه بدون ما تشوفه (كان فيه عيوب او في مكان بعيد او او او ) والصور المرفقه ما تأكد الوضع الحالي للبضاعه الي بتشتريها

2- طريقه جذبهم للناس مقرفه ورخيصه ,, يغرونك انه في هديه عطور لك في المركز (لإغرائك بالحضور) واخر شيء يطلع خصم في مكان فلاني (اكوابارك مثلا) وهال التذاكر توزع للشركات اوريدي ووبلاش (يعني شيء جيد انك تستفيد منها ولاهي مخسرتهم شيء)

3- ماعرف الحكم الشرعي منها بس احس فيها لعب (انك تقول للشخص خذ هال البضاعه مني وادفع الحين ومب لازم تشيك عليها + لو اشتريتها مني بكره بتكون ضعف السعر) ,,, اسلوب ما يخليني اوثق بالشخص

4- استخدامهم للكذب والمبالغه في اشياء خلاني ما اوثق ب99% من كلامهم ( بنصوركم بالتلفزيون - و من بيستلم الهديه من المنصه )

وهذا انا دليت بدلوي ,,

[MAZEN37]

قريب لي جاني وقالي تعال فكني من الورطه
رحت معاه مكتبهم بشارع البنوك ودخلنا نفسخ العقد قال لازم تدفع 30 بالميه خصم ومني مناك ويا باشا ويا افندم صارت 3000 ودفعنا وقفانا يقمر عيش وطلعنا
بس الي لفت انتباهي انهم يخلون الزبون يوقع عاى تقريبا 20 ورقه يعني يورطونه بالتواقيع وانا ما عجبني الوضع صراحه وما انصح احد يوقع على اي ورقه وعقب ما يروح البيت يقعد يفكر ويستنتج انه استعجل

[أغلى البـشر]

نصب x نصب

[بن غيث]

نظام التايم شير
عبارة عن نصب مثل ما أذكروا الشباب

لكنه قانوني .. ويقدرون يورطونك في شغﻻت كثيرة قانونية
ارجوا من الجميع الحذر منهم وعدم التعاقد معهم مهما كانت المغريات ..

[كاشف الغطاء]

مب كل الشركات تعبانة لكن الشركات اللي جذي اسلوبهم تعبانين ومنها اللي في حمد الكبير واللي في بروة مادري اذا نفسها ولا لا بس سوالف تعال ودست على بلاطة الحظ ولا لك جائزة اهني اعرف ان السالفة خربانة شخصيا تعاملت مع شركة باز اللي كانوا في لاند مارك تعاملهم محترم إلى الآن واستفدت شخصيا بس استفادة بسيطة وتعاملهم حلال وحاطين توضيح في الكتيب مالهم

[S_Alkuwari]

قريب لي جاني وقالي تعال فكني من الورطه
رحت معاه مكتبهم بشارع البنوك ودخلنا نفسخ العقد قال لازم تدفع 30 بالميه خصم ومني مناك ويا باشا ويا افندم صارت 3000 ودفعنا وقفانا يقمر عيش وطلعنا
بس الي لفت انتباهي انهم يخلون الزبون يوقع عاى تقريبا 20 ورقه يعني يورطونه بالتواقيع وانا ما عجبني الوضع صراحه وما انصح احد يوقع على اي ورقه وعقب ما يروح البيت يقعد يفكر ويستنتج انه استعجل

السلام عليكم

اخوي انا عندي ناس متوهقين مع (شركة ......) في شارع البنوك ومايدرون هل هي شركة نصب ولا شغلها في السليم والحين يبون يفسخون العقد بس مب عارفين شلون
ومثل ماقلت لازم تدفع 30 بالمية، انت شلون قدرت تخليهم يوافقون على ال 3000؟
وعلى فكرة العقود المصدقة للحين ماجات من مصر على كلامهم يبيلها وقت!

[STAR]

نفس الكلام امس مريت فيه...شركة....مصري استلمني عند السينما في الستي وقالي فزتي معانا بجائزة عبارة عن فندق ل 4 ايام في تايلند او مصر او لبنان لج حرية الاختيار..وسألني شنهي اقوى عضلة في جسم الانسان!؟!!
وقالي لي عطر فرنسي استلمه اليوم عندهم في شارع البنوك...

وقالي تعالي شرفينا حضرتك انتي وزوجك وشوفوا لمحة عن شركتنا وقال هي عبارة عنسياحة وسفر..ماجاب طاري تملك لشقق..عاد شكلي بطنش ومب رايحة

[وحيد-الشوق]

لحد يروح انا نشب لي الاخ العربي صوب سينما فيلاجيو وكنت مصدع يومها ومشيت معاه وسجل رقمي وكل شيء ووعدتهم اني بروح واليوم الثاني احلى سحبه ههههههه بعدين اتصلت فيني وحده وقالت معاك فلانه من شركة.... وانتظرك اليوم ومقر شركتنا ولازم تجينا وبعد سحبت عليهم ههههههه

لاتصدقون هالكذابين حسبي الله عليهم

[STAR]

لحد يروح انا نشب لي الاخ العربي صوب سينما فيلاجيو وكنت مصدع يومها ومشيت معاه وسجل رقمي وكل شيء ووعدتهم اني بروح واليوم الثاني احلى سحبه ههههههه بعدين اتصلت فيني وحده وقالت معاك فلانه من شركة....وانتظرك اليوم ومقر شركتنا ولازم تجينا وبعد سحبت عليهم ههههههه

لاتصدقون هالكذابين حسبي الله عليهم

شكرا ع النصيحة لكن فعلا في. حد استفادمنهم والا كله نصب في نصب؟!