لماذا بورصه دبي بذات رجعت الى مستويات خياليه .. وتغلبت على اي بورصه خليجيه اخرى ! ..؟

[المخلب]

السلام عليكم


الصراحه اليوم الواحد مستانس ومشغل الراديو بالسياره ..

قلنا نشغل الام بي سي .. (( علشان قرب موعد افتتاح البورصه السعوديه .. - قلنا نطمش شوي ونسمع وش اخبارها <<< والله من زمان قاطع ماتابعها .. - المهم .. >>>))

المهم الله يسلمكم .. وانا جالس اسمع دقت جرس البورصه .. وبدايتها انخفاض ! << كما كنت اضن .. مو مشكله .. ماشوف الا المذيعه تكلم المراسله .. تقولها : "ممكن تحكينا وتاخدينا جولي على مؤشرات البورصات الخليجيي ازا ممكن ! "

طبعا بدت بالكويت ,بعدها قطر , ابوظبي , عمان والبحرين ثم وقفت على دبي ! ..

وهنا موضوعنا ..


بورصه دبي (( على حسب كلام المذيعه )) وصلت لمرحله ماقبل 2004 !! ( اي مرحله الاسعار قبل قبل الارتفاع .. !! ) يعني نقدر نقول ان بورصه دبي للاسف انخفست .. !!!

اكيد هناك اسباب .. ! لكن اسبابها فيها لخبطه وربكه ! ..

والله الواحد يحزن لما يشوف الاقتصاد العمراني بدبي في ابدع مايكون ! .. ولكن لما يشاهد الاقتصاد البورصوي لدبي ! يشوفه مايسوى (( هل يوميين ! )) ..

اضن هناك عده اسباب .. ويمكن اقدر الخص الي اعرفه بنقاط مختصره .. ( وياريت الي عنده اي معرفه زياده يفرزها ! ) ..

1- سحب سيوله الخليجيين .. وبذات السعوديين الذين كانوا يرفعون البورصه الي مستويات كبيره جدا !! ..

2- فتح مجال الاكتتابات لغير المواطنيين .. مما شكل ربكه اقتصاديه في البلد ! (( لان اغلب المتواجدين في دبي من الاسيوين !! الذين لا يضمنون بقائهم في البلد .. فيبيعون باول سعر يطرح - سواء كان ربحان بربح ! او خسران بربح !! - ..

3- الاكتتبات الي حصلت في دبي - وخاصه الشركات الجديده - كانت اغلبها شركات مشابهه لشركات متوفره بالسوق الاماراتي ! وشبه مكرره !! ..

4- عدم اعلان اغلب الشركات شراء اسهمها .. خوفا من الوقوع في سعر غير مرغوب لدى المستثمرين ولن يتكرر الا بعد مده طويله من الزمن - خاصه ان من شروط شراء الاسهم للشركات في دبي !! ان تشتري الاسهم ولا تبيعها الا بفتره طويله ( والله ناسي الفتره ) لكن ما تستطيع ان تبيع الاسهم بفتره قصيره ! او خلال ايام معدوده من شرائها لاسهمها ..!!

وايظا ان يجب على الشركات الاعلان بالجرائد الرسميه قبل الشراء بواقع 3 ايام قبل الشراء !! .. .. وذلك يعطي فتره للهوامير ! ( واصحاب القوه ) على رفع سعر السهم قبل الاعلان - لانه عنده عيون في بعض الشركات تخبره الي بيصير ! - مما يؤدي الى رفع سعر السهم الى معدلات قصوى ! ثم بعد الشراء يهبط هبوط جامد الى القاع .. ( مما يؤدي الى خوف الشركات من شراء الاسهم على هذه الاسعار ! <<< مع العلم انها اسهم شركتها ! ) ..


5- عدم ثقه المستثمر في بورصه دبي بعد النكسه التي صارت لهم ! ..

هذا ما اعرفه ( او ماتوصلت اليه بشكل عام ! ) ولكن ان لدى ايا" منكم اضافات ياريت نطلع عليها .. ! - ومنكم نستفيد - ..



(( طبعا عارف من هل القسم مو للبورصات الخليجيه لكن للنقاش وليكون لنا خبره وفائده ايظا ! .. )) ..

[الأختصاصي]

الف شكر اخوي المخلب على الطرح والتوضيح بالنسبه للبورصات
من نواحي الاقتصاديه فعلا كلامك صحيح نشوف العمران في ازدهار ما شاء الله
ولاكن لما نشوف الاسعار بالبورصه نقول الله يستر
جنه العمران في بلد والبورصه في جنوب افريقيا

[TRESURYSTOCK]

شكرا لك المخلب على الطرح الحلوووووو ..

1- ليش كل ما ارتفعت الاسهم في البورصات الخليجية قلنا ان السبب هي السيوله اللي جاية من خارج البلد اللي فيه البورصة ... يعني اشرت الى ان الانخفاض اللي صار في بورصة دبي منذ شهور ماضية هو سببه سحب المستثمرين الخليجين وخاصة السعوديين سيولتهم من السوق.. وسمعنا الكلام نفسة لما انخفضت اسعار الاسهم عندنا في الدوحة وان الاجانب والخليجين اسحبواا سيولتهم من البورصة علشان كذي انهارت .. وانا اختلف معاك في هالرأي ....
لما كانت بورصة دبي ترتفع في نفس الوقت كان فيه ارتفاع في كلا من بورصتي السعودية وقطر ، يعني مب بالضروره ان الارتفاع راجع لسيوله خارجية . والدليل شفنا الاسبوع قبل الماضي كيف وصل حجم التداول في الدوحة في يوم واحد الى المليار في حين ان تداول الاسبوع الماضي لليوم الواحد ما تعدى 500 مليون في اكثر الايام .

اعتقد ان السيوله متوفره في كل دول الخليج .. لكن وين اللي يقنع المستثمر الخليجي للدخول في الاستثمار في البورصات والاسهم مره ثانية ......... وشوف العمران اللي حاصل في الدوحة ويعطيك اكبر دليل على وجود السيوله في البنوك وعند المستثمرين ..

2- النقطه الثانية اللي اشرت لها هي ان الشركات اللي تم طرحها في دبي لها نفس نشاط الشركات الموجوده في البورصة ..... واعتقد ان الحاصل في قطر نفس الشي يعني الشركات الاخيره اللي انطرحت لها نفس نشاط الشركات الموجوده مثل ( بروه و العقارية - اسمنت الخليج والاسمنت القائمة - الريان والمصرف والدولي ) والشركات الاخرى مثل بنيان السلام وغيرها جاي في الطريق .

يا ترى شنو السبب اذا ......؟؟؟؟؟؟؟؟؟؟؟؟

وتحياتي لكم .......... اخوكم .

[المستثمر22]

انا اعتقد ان بورصه دبى تنقصها الشفافيه
وادارة السوق عندهم مو قاعد تبذل اى مجهوود للانعاش السوق
على حسب كلام الاخوه بالامارات
ولا هل يعقل ان بورصه دبى عاصمه الخليج الاقتصاديه هذى حالتها

[عتيج الصوف]

شكرا يالمخلب على موضوعك الهام ,,,,واقول ان من مشاكل شوق الأمارات الشراء على المكشوف وهذا سبب مباشر للمضاربات اليوميه وكان هذا من الأسباب وكذلك للأشاره الى اموال الخليجيين وبالذات الأمير الوليد بن طلال سحب سيوله ضخمه من اسواق الأمارات....
واعتقد ان مكررات ارباحهم ومؤشرات الأسهم ممتازه في الوقت الحالي ولااتوقع لو حصل هبوط ان يكون كبيرا الا لا قدر الله استجدت امور سياسيه خطيره والله اعلم

[ملك السوق]

السلام عليكم..لا تنسى اكتتاب شركة الخليج للملاحه وتأثيره السلبي على السوق وهذاالتأثير السلبي للاسف يحصل في كل اكتتاب في معظم الاسواق الخليجيه وخصوصا سوق دبي وابوظبي(مع العلم ان الاقبال على الاكتتاب لازال دون المتوقع)..ولاتنسى بعد(الصيف)..وكميه وقيمة التداول(القليله جدا) اثناء الصيف..واخيرا التشاؤم وعدم الثقه والاوضاع السياسيه..واعتقد الان فرصه ذهبيه للدخول في اسواق الامارات ولكن بشرط ان تعرف اين تضع( فليساتك)

[نمر بن عدوان]

السالفه اكبر ...

لما نعرف اقتصاد دبي على وشو قايم اساسا بنعرف ليش انهارت البورصه...

احنا نقول اقتصاد قوي لكن شنو اساس هالاقتصاد اذا دول الخليج الثانيه مثل قطر والكويت والسعوديه اقتصادها قايم على البترول والغاز والصناعات المختلفه شوفوا البحرين اقتصادها ضعيف مع ان عندهم انفتاح اقتصادي واستقطاب للشركات العالميه شوفوا عمان شمعنى دبي اقتصادها قوي ..

اذا عرفنا اساس هالاقتصاد بنعرف ليش انهارت البورصه عندهم...



اخوي المخلب سمعت عن غسيل الاموال؟؟

[المخلب]

اشكر الجميع ..

والصراحه الي يصير بسوق الدبي اقل ما يقال عليه : (( تحطيم للسوق ! )) ..

طبعا مثل ماتفضلتوا جميعا ووضحتوا لكن الاسباب الاساسيه للاسف نشوفها مخفيه وبشكل كبير ..

اما بالنسبه لاخوي : ابو السنافر .. غسيل الاموال والله عندي خلفيه بسيطه عنها ! لكن ماعرفها بشكل موسع (( للاسف )) .. !! - ياريت تشرحها لنا ان امكن -


شكرا لكم ..

[Khalid222]

لا تنسون الي صار في سوق دبي سنة 1998 يوم انهار السوق وبعد 8 سنوات رجع طلع مرة ثانية... الي كانو في السوق وشافو الي صار 1998 من حقهم يخافون ويسيلون قبل لا تصير مصيبة ثانية... اقتصاد دبي قوي.. والكل يعرف بان لدبي القيادة وهي السباقة لكل التطور الحاصل بالمنطقة .. ولكن العوامل النفسية لها تاثير كبير في سوق الاسهم ... ويمكن نشوف ارتفاع ولكن بعد ان تعود الثقة الى المستثمر بان ماحدث في ال 1998 لن يحدث مرة ثانية..

[CNBC]

اشكر الجميع ..

والصراحه الي يصير بسوق الدبي اقل ما يقال عليه : (( تحطيم للسوق ! )) ..

طبعا مثل ماتفضلتوا جميعا ووضحتوا لكن الاسباب الاساسيه للاسف نشوفها مخفيه وبشكل كبير ..

اما بالنسبه لاخوي : ابو السنافر .. غسيل الاموال والله عندي خلفيه بسيطه عنها ! لكن ماعرفها بشكل موسع (( للاسف )) .. !! - ياريت تشرحها لنا ان امكن -


شكرا لكم ..

كان منذ فترة حديث على قناة سما من قبل محللين بان الذي أدئ لهذا النزول هو أن هناك أقاويل لغسيل اموال المافيا وذكر في عده منتديات امراتية متخصصة