حصرياً تقرير سفرتي (المانيا،زلامسي،فرنسا،سويسرا،دبي)
السلام عليكم ورحمة الله وبركاته
صباحكم ورد
أتقدم بكل الشكر لأخوي (( غيــــــــر البشر)) على مساعدته لي بخصوص الفنادق في اوروبا (( شكـــــــراً غير البشر)) والله يعطيك العافيه بصراحه تستاهل تكون مشرف على قسم السياحه والسفر.
بداية الموضوع أتكلم عن طريقة الحجز التذاكر خذناها من الريجنسي والفنادق حجزناها من موقع booking ، ونصيحه للي يبي يحجز لايحجز من هالموقع اذا تبون اختارو الفنادق الي عندهم وادخلو موقع الفندق الرئيسي بيكون أرخص بوايد وأضمن ، المشكله الي صادفتنا حجزنا من موقع بوكينغ على فندق في ميونخ وللاسف يوم رحنا لقيناهم حاطينا في الفرع الثاني للفندق وماوصف لكم شنو كان ويوم كلمناهم ردهم كان هذاك الفندق فل واحنا حطيناكم في الفرع الثاني هذا غير مكانه في الدواعيس والشارع الي صوبه كله مفاصيخ وديسكوات وخرابيط وبليل السكاره نسمعهم تحت يتهاوشون ، وثاني شي موقع بوكينغ خذ علينا عموله وكانت فوق 10 الاف ريال طبعاً يوم ردينا واتصلنا على الموقع نفسه وكان اسلوبهم جداً جداً سيئ في التعامل قالو هذي قوانينا وخلاص ماراح نرجع لكم شيء يحطون لكم شيء وياخذون شيء.
نبدأ التقرير
بتاريخ 9/8/2013م ( والي وافق ثاني يوم عيد الفطر ) كانت بداية سفرتي الى
( المانيا – فرنسا – فينا-سويسرا)
ونزلت الصور الي اقدر عليها وان شاء الله تستمتعون بالمناظر
قعدنا في المانيا تحديدا في ميونخ ( 5 أيام ) ، بالنسبة للاسعار غاليه وايد الماركات عندهم والي يبي يروح المانيا يجرب يروح ( دوسيلدولف) مكان هادي وحلو وكل شيء رخيص حتى الماركات اسبوعياً تنزل بضاعه جديده .
وهالتمثال من المعدن عجبني شكله والصوره الثانيه مكتوب ان واحد ميت في هالمكان مادري اذا مقتول او منتحر
وهذي صناعة يدويه وايد وايد حلوه واسعارها جداً رمزيه ب يورو وفي ب 5 يورو و7 و 10 لو عندنا كانو سووها ب200 ريال
كنت كل يوم قبل لانام لازم أطلب حليب ساخن يوم اتصلت خدمة الغرف او انزل المطعم اقولهم ابي حليب ساخن وهم منصدمين ههههههههههه على بالهم ياهل
وهذي وجبتي اليوميه مع اني ماحب المعكرونيه بس حلوه اعجبتني مافي غيرها شاسوي
وهالكوفي قعدته في الهوا خارجيه ويوم رحت اطلب اخترت هالثلاث انواع هههههههههههه عشان اجربها
رحنا زلامسي رحنا الصبح وردينا بليل نسيت صور الثلج الي حطيتها فوق في منطقه في زلامسي بس نسيت اسمها ماركز في الاسماء
سبحان الله طق المطر مطر خفيف وعلى طول طلع قوس قزح
والحين ننطلق الى مدينة الملاهي (( يوروبا بارك)) وقعدنا فيها 3 أيام سكنا في فندق في مدينة الملاهي نفسها أسمه الأندلسي رووووووووووووووعه وتصميمه اسباني واتركم مع الصور
وهالمنظر مجابل الغرف
مادري اشسالفتي وايد اشوف اشياء على شكل قلوب ، هذي الوده لصقت فيها وقاعده اصور واصور ابي اسوي تصوير احترافي والناس يمشون ويطالعوني هههههههههه
المهم وجان تطلع نعالت سندريلا مقااااااااااااااسي
هالصور كأنها صجيه خفت منها اول يوم وصلنا على الساعه 9 بليل ورحنا ناخذ جوله في الملاهي ودخلت مكان كله صور ومجسمات صج صج تخرعت احسهم كلهم شاكي
وايد تكلمت نكمل الصور هالالعاب لعبتها
وهاللعبه خلت قلبي يروح في بلعومي من قو النزله والخرعه
اما هاللعبه مصيبه قصو علي وقالو والله ماتخرع لاتخافين وخبركم رحتها بليل ماتبين ركبت وياليتني ماركبت تميت اصارخ واتشهد طول اللعبه اول مره اركب لعبه واصارخ بس صج تخوف انا اصارخ وهم يضحكون حسيت قلبي بيوقف اخر شيء قعدت اسب الي مشغل اللعبه واقول خلاص خلاص باموت
كانت رحله ممتعه في مدينة الملاهي ، وبعدها انطلقنا الى منطقه على حدود فرنسا اسمها (( ستراسبورغ وقعدنا فيها 5 أيام)) كل شيء رخيص فيها حتى الماركات وساعات الروليكس، تفضلو الصور
هذي سيارة واحد من شيوخ الامارات وهي السياره الوحيده في العالم كان ساكن معانا في نفس الفندق بس ماعرفت من هو بس كان وايد متواضع ومحد عرف انه من الشيوخ الا يوم سالنا في اللوبي هذي سيارة للعرض والا شنو وقالو لنا.
وباقي الصور أكل ههههههههههههههه
كل يوم الصبح لازم هوت شوكليت او كابتشينو
واخر وجهة الى سويسرا ماعجبني شيء فيها غير انترلاكن والطبيعه المهم قعدنا فيها اسبوع وكل شيء غالي ومبالغين فيه وايد (( المانيا وفرنسا ارخص))
هالنهر بااااااااااااااااااااااارد شربت منه اشوي
هذي مقابرهم كأنها حديقة ورد
واحلى ريلاكس مع الشاي الاخضر بالفواكه الي يطير عليها النحل مادري وين البلديه عنهم
رحنا الكونتر والا الموظفه شافت عددنا كبير ومارضت تشتغل ولاتنادي حد يساعدها فقالت كل شيء القطريه بتتكفل فيه حتى سكنكم في الفندق والتذاكر وصكت الكونتر واسحبت علينا طلع كلامهما كله كذب ويوم كلمنا القطريه في الدوحه قالو احنا مالنا خص وطبعا المطار يصكر الساعه 12 بليل اضطرينا نحجز في فندق المطار لان على كلام الموظفه ثاني يوم بنسافر اكيد وطبعا بعد قصت علينا المهم دفعنا للغرف في يومين فوق 30 الف ريال
وسكنا في فندق المطار حسيت كأني في فلم الريال الي انحبس في المطار يومين لان حظرتهم القطريه المحترمين شالو يدهم من السالفه وحطو الغلط علينا وماكان في حجز
والحمدلله رجعنا بالسلامه بتاريخ 29/8/2013م
وهذي اهم مشترياتي
وهذي سفره سريعه لدبي الاسبوع الي طاف
قلتلكم مادري اشقصتي مع القلوب شوفو اشفت من الطياره
ان شاء الله تكونون استمتعتو بالصور
|
رد مع اقتباس
المشاركة الأصلية كتبت بواسطة شبح الصمت
