تكلفة مشروع؟

[المحاميه]

السلام عليكم

حابه اعرف كم تكون تكلفة مشروع تجاري مثل

اني اخذ وكالة شي مشهور (على سبيل المثال مطعم) وافتحله فرع اهني

هل نص مليون كافيه ولا اكثر ولا اقل؟


شكراً

[بو راشد 1]

أختي

انا فتحت مطعم تركي قبل 15 سنة تقريبا حروة هذا المبلغ, ما أعتقد ان المبلغ المذكور بيكفي في اسعار هذه الايام، نتمنى لك التوفيق.

[][ الوحيد ][]

مثال بس ,, Cheese Cake Factory وكاله كلفت فوق االعشره مليون بالرااحه حق وكاله الشرق الاوسط

و مطعم مشهور يبي له مكااان عدل و كبير و الاجار مابيكون اقل من 100 ألف فالشهر اذا مب اكثر و غير رواتب العمال و الديكور


المبلغ اللي انتي ذكرتيه مايجيب شي مشهور ابد

[أم هشام]

كلام الاخوان صحيح للاسف .. كان ليه محاولة التفكير فقط بالموضوع وانصدمت لما عرفت كم صاحب الوكالة طالب..
لكن اختي انتي ممكن تنجحي بشي معين يخلي اسم محلك مشهور حتى لو فتحتي مطعم او محل حلويات اذا تميزتي بالمنتج و طريقة العرض والسعر ...

[المحاميه]

متاكدين؟

يعني مثلا شي موجود ف دبي لو ابي افتح مثله ف مجمع ف كشك معقوله يكلف كثير؟

[qatar.syria]

أختي على حسب الوكالة ممكن المبلغ يكفي وزيادة .... مثلا صب واي طلب مبلغ 15000 دولار لاعطاء فرنشايز ... طبعا انا اتكلم عن فرنشايز واحد ،، ولا علم لي هل هناك وكيل حصري لقطر ام ممكن ان ياخذ ناس جدد محلات جديدة ؟
وشركة صب واي تقدر ان مبلغ 100 الف دولار يكون كافي لفتح فرنشايز جديد.
طبعا هذا الكلام لا ينطبق على باقي الماركات والوكالات ولكن الموضوع اجمالا يحتاج الى دراسة دقيقة وتفصيلية. والاهم من ذلك ان تتبعي الخطوات التالية قبل اخذ وكالة:
أولا : تحديد الوكالة التي ترغبين بالحصول عليها.
ثانيا: مراسلة الشركة الأم صاحبة الوكالة وسؤالها عن مبلغ الوكالة بالضبط .... مثلا بعض الشركات تعطي وكالة للدولة ككل مثلا وكالة التويوتا في السعودية وكيلها الحصري هو عبد اللطيف جميل ،،، ولكن شركات اخرى مثل صب واي تعطي ترخيص لفتح محلات فقط .
ثالثاً: تحديد تكاليف الوكالة في بلدك قطر، وما هي متطلبات الدولة والبلدية وغيرها من سجل تجاري وضرائب وإلى أخره.
رابعاً واخيرا عمل دراسة جدوى تفصيلية بذلك.
من وجهة نظري الشخصية لا أفضل أخذ وكالة من شركة ،،،، بل أقترح عليكي بناء اسمك الخاص بك وبيعه فيما بعد ... ولتوضيح الفكرة اكثر ممكن الحديث على الخاص بخصوص ذلك

[STAR2012]

عندي لك وكالة لمطعم امريكي مشهور لدية 106 فرع بامريكا وكندا وبيكون اول فرع في قطر يكلفك تقريبا 800 الف ريال شاملة كل شى من ديكور ومعدات وتدريب ووصفات خاصة ورسوم الفرنشايز

[مشتاقة لقطر]

حلوة الفكرة

[biz-qtr]

شوفي اختي موضوع انج تفتحين محل اهنيه ماخذه وكالته شي زين وبيخف عليج تعب الدعايه والاعلان من الصفر لان طبعا انتي بتاخذين شركه لها سوق في قطر ولها ناسها مثل ما سوو جيمبوري لملابس الاطفال وعندج كم محل بعد نفس النظام ما تعبو روحهم وايد بالدعايه لان في ناس وايد يشترون منهم اون لاين ويوم فتح في قطر كان Good news لهم...

لازم اذا بتاخذين وكاله تشوفين اول شي حجم الشريحه اللي تبين تستهدفينها واكيد تشوفين اذا المحل اللي بتفتحينه مطلوب منهم او لا
وحجم الشريحه تستاهل انج تفتحين لها المحل او العدد قليل
و ومعلومات وايد طبعا مع دراسه الجدوى بتعرفينها

نصيحتي ادخلي google وكتبي franchise opportunities بتطلع لج وايد مواقع شوفيها في وايد اشياء ممكن تاخذين وكالتها من مشاريع كبيره وصغيره وعقب حددي
واذا راسلتي هالشركات اساليهم اذا فيه ناس يطلبون منهم من قطر وشنو حجمهم وممكن هالمعلومه تضيفينها في دراستج للمشروع وعقب تقررين

لا تتسرعين في شي اخذي وقتج بالبحث والدراسه عشان لا تندمين
اتمنى أفدتج والله يوفقج...

[Bin Hood]

نصيحة ابتكري ماركة خاصة بكِ

لمطعم كوفي شوب محل كيك مخبز