السلام عليكم ورحمة الله وبركاته
لستوا ممن يزف الاخبار اولا باول ولستوا ممن يتفاخر بالطليعه , ولكن هناك عبره احب اقولها لبعض اخواني ......
اليوم الفير على الساعه 1.30 تقريبا بتاريخ 15/04/2014 وانا راجع من الرويس كنت امرن سيارتي
كنت مابين سرعة 140 - 150 وكان الطريق فاضي
المهم
يوم وصلت عند جسر الخور بتجاه الدوحة واشوف على يمين الخط سياره فيكسار مقلوب عنده مجموعه شباب
استغفر الله
نزلت بنية اني ابي اسوي اي شي كمساعده
جيتهم امشي بسرعه ياشر لي شخص عنده الشرطي بانه راعي السياره توفى .....
طالعة السياره متعجنه ومقلوبه حاولت اشوف داخلها مب قادر سئلتهم فيه حد قالوا نشوف غتره وعقال لكن الرجال لابس رياضه قلت لهم ممكن يكون له الغتره والعقال ومنزلهم ومبدل ولابس رياضه
المهم رحت صوب راعي الموتر
اخواني والله تمنيت اني اجلت هذا المشوار ولكن مقدر ومكتوب
منظر الولد مادري اشلون اوصفه
صغير سن ووسيم . شعر طويل ملابس مرتبة. فيه ضربه بس فالخشم ودم
قلت بقلبي معقوله متوفي منها. وتذكر تدريباتي التطوعيه في مجال الاسعاف الاولي.
خذيت لفه عليه واشوف عند الحوض شي منتفخ
يوم رفعت الشماغ الي عليه ولا حوضه مكسور والفخذ منتهي وعنده كسر في الساق من النص واصابعه مفروكه فالارض شكله طالع من الموتر وتم يزحف
الطامه يوم جيت ابي اعدل راسه ولا دم من فمه واذنه...
اعطاني واحد من الشباب التلفون اكلم الاسعاف وقال لي استاذن من الشرطي حق التنفس الصناعي
اخواني اول مابديت كشفت الصدر لاحول ولا قوة الا بالله
الصدر متقطع تشطيب لكن المصيبه مافيه قطرة دم طالعه منه بس عند راسه
مسكة صدره وارص شي بسيط فاصابعي السبابه والوسطى واسمع عظامه تتقرطب ( تفرقع )
واحد من الشباب قال خلك منه متوفي
لكن فيه قاعدة تقول نخرج باقل الخسائر.
طلبت فاين ونظفت فمة
اول ماجيت بسوي تنفس صناعي نسيت كل شي.....
وبلحظة تذكرت وطلبت من الشباب يشيك على الصدر ينتفخ ولا لا مع التنفس
اخواني والله العظيم اني انفخ اسمع صوت فقاقيع مب راضي الصدر يتسقبل طبعا نسيت اسكر خشمه
وياشر واحد منهم على اني اسكر خشمه
وياليتني ماسكرته فالنفخه الثاني قلت بنفخ وماهمني وانا اسكر خشمه ويطلع الدم من اذنه
اخواني انا هنا فقدت الامل وتميت ادعي وغطيت ويهه واشار عليه بعض الشباب اني اخليه مكشوف
اوصلت الاسعاف
بارك الله فيهم
سئلني قلت له الي صار
قال كلمه حلوه للحين اسمعها.. مافيش شي اسمه خلاص كله بيد ربنا نعمل عملنا
نقطه حوار
اخواني شكل الحادث غريب ومحد يصدقه لكن انا اعرف كيف صار الحادث ولا ابي اتكلم ولا بسوي نفسي فيلسوف
لكني ياخواني
هذا ولد من الشباب الصغير ( ادري الموت مايعرف صغير او كبير ولكن ناخذ بالاسباب ) راح بلمح البصر وبسبب دابه الله سخرها لنى لنركبها لتنقلنا لا لنقتل انفسنا
اخواني الى متى نشوف ولا نتعض
اخواني الام لو تفقد ولدها مستعده تفدي بعمرها بس لأجله مابي اقول مرض او مكروه ....
اخواني خلونى نفكر في من يفكر فينا
لا ناخذ الدينا انها لعب ولهوى ونغم وحب
الله ميزنا بين سائل المخلوقات بالعقل. وباشياء كثيره ليش نستخدمها بمضرتنا
اكتب موضوعي والى الان صور الولد مافارقتني
اكتب موضوعي واتخيل نفسي الى الان وانا اسوي له تنفس صناعي
اكتب موضوعي وانا اقول الله يصبره امه واهله
اكتب موضوعي وانا اقول انا لله وانا اليه راجعون
لا اله الا انت سبحانك اني كنت من الظالمين
اخوكم
ابومحمد
|
رد مع اقتباس
