الحلقة الاولى
مثل كل يوم.. آم حسين تسوي غدا بوحسين وتطرشه له الدكان
لان يكون عنده شغل ولا يمديه يعود يتغدى ويرجع دكانه
في ذاك اليوم وهي تطبخ غداه تذكرت ان السفرطاس ناسية بوحسين ف الدكان ومارجعه معاه
آم حسين: حسوون.. حسوون
حسين: ها يمه
ام حسين: زتك روح الدكان ييب السفرطاس من عند ابوك خل انجب له الغدا الحين بيسويلي سالفه تاخرت عليه
حسين: انزين بروح اييبه
وراح حسين صوب دكان ابوه، وهو ف الطريق شاف ريال يتلفت جنه ضايع
حسين: عمي شفيك من تدور؟
الغريب: ادور بيت سليمان العود
حسين: انا بوديك بيته ادله..
وراح حسين مع الغريب يوصله بيت سليمان وشاف اليهال عند الباب يلعبون وقعد يلعب معاهم ونسى ان امه تنطره فالبيت
في هالوقت بوحسين كان ينطر غداه ومستغرب شوله تاخرت مرته ولا انتبه ان السفرطاس اصلا عنده فالدكان، يوم اذن العصر راح يصلي وقال قبل يرجع الدكان بيمر على البيت
ام حسين: حسبي الله على عدوك ياحسون وين ذلفت ابوك ماتغدى للحين
بوحسين: السلام عليكم
ام حسين: عليكم السلام
بوحسين: ام حسين خوج غدى وصلني اليوم
ام حسين: يابو احسين انت الله يهداك ناسي السفرطاس فالدكان وطرشت لك حسون اييبه من عندك وللحين مارجع
بوحسين: لالا اقولج خوش غدى جنه قهوة حارب
……………..
حلقة اليوم بها 3 نقاط
السؤال الاول:
ما هو السفرطاس؟
السؤال الثاني:
مامعنى كلمة زتك؟
السؤال الثالث:
ماهي قصة قهوة حارب؟ يرجى ذكر القصة كامله
وبالتوفيق لكم جميعا