ماهو رائيكم في من يحذف ابنائه ويسافر مع زوجته

[مشاكل]

السلام عليكم ورحمة الله وبركاته

تقبل الله منا ومنكم الصيام والقيام وصالح الاعمال والله اسأل ان يجعلنا من عتقائه من النار

انتشرت في الاونه الاخيرة ظاهرة تنافي صفة التواصل والترابط الاجتماعي ،،، الا وهي سفر الزوج مع زوجته من غير الابناء

بعضهم يابلفيت عايش الرومنسية
وبعضهم من اجل التوفير والبخل
والبعض الاخر يقول مانبي سندارة

وكلها مبررات لاتسمح ابداً بحذف الابناء على الاقارب وحرمانهم من الاستمتاع بالسفر ومتعة الجمعة والتواصل مع العائلة التي يفترض ان تكون من باب اولى للابناء لغرس مفاهيم الترابط الاجتماعي ومكافئتهم بعد نجاحهم فالدراسة وازالة الضغوط النفسية التي وقعت عليهم خلال عام دراسي كامل ،،، علاوةً على مايتسفيده الابناء في السفر من صفات اخرى كالاعتماد على النفس والتعرف على حضارات الدول الاخرى ،، ناهيك عن التقارب الاكبر الذي يحصل بين الاب والام مع ابنائهم اثناء السفر عن اي وقت اخر .

انها قمة الانانية يمارسها هؤلاء الاباء والامهات ضد ابنائهم ،،

ترى السالفة دين ،،، وكما تدين تدان
الايام تمشي بسرعة ،، وبكره اذا كبرتوا وشيبتوا واسفهوكم عيالكم وزوجاتهم وقطوكم على الخدم محبوسين بين اربع اطوف ،،، وقتئذٍ لاينفع الندم

والله من وراء القصد

[ضوى]

ارفض هالشي جملة وتفصيلا ، الا في السفر للعمرة لانه الصغار يربطونك في صلاة الفجر وماتقدر تروح الحرم ، طبعا اتكلم عن الصغار اقل منظ¨ سنين ، غير هذا لازم كتاكيتي معاي بكل مكان

[MAZEN37]

حسب نوع السفره ومدتها وبالنهايه مافي ناس تحذف ابنائها
وانا من رائي لو الامور مرتبه من حق الزوج والزوجه

[abu m7md]

الرد على الموضوع يحتاج لسطور كثيره بمصلطحات عملاقه



ياريت تحدد وين يحذفونهم فالبيت ولا عند اقارب
واين مكان السفر لدوله عربيه ام غربيه


بنتظارك

[alsoq]

لو كانت السفره اروبا او دوله اجنبيه من الافضل عدم اخذ الاولاد
واذا واحد بيحط اولاده تاكد انه عند الجد او الجده فقط
وايش فيها لو الرجل سافر معا زوجته ناس ناضجين وعاقلين ويبي يقضي قعدات منفرده معا زوجته يحسسها بالحب والامان وياخذون راحتهم من بعد عمل مظني طول السنه

[qatara]

ان سافر بروحه

سندرتوه

وان وداها قلتو وعياله

الواجب يخليها عند عيالها ويسافر

تبهدل الرجل من الدلع الا شيل الا حط الا خل الا ود

ما كذب من قال شاورها وخالفها

[ولد العرب]

هلا اخوي مشاكل انا ماقد سويتها ولكن بسويها بحول الله وقوته
بحط اعيالي عند امي ولا اختي ولا خالتهم وبالعكس بيستانسون العيال مع الاهل واترك مصرفهم عن الاهل
محتاج تغير بالسفره والراحه وحنا ماقصرنا معهم بالسفرات وغيرها ومحتاج اغير جو مع الاهل
اما ياولد اعقل انت اكل ياهوووو البس واخلص يام العيال مشينا الصبح نبي نشوف الطبيعه ترد بنام سهروني عيالك
لا بالله يامشااكل فكنا وخلهم عند اهلي

[نيساني]

لو كانت السفره اروبا او دوله اجنبيه من الافضل عدم اخذ الاولاد
واذا واحد بيحط اولاده تاكد انه عند الجد او الجده فقط
وايش فيها لو الرجل سافر معا زوجته ناس ناضجين وعاقلين ويبي يقضي قعدات منفرده معا زوجته يحسسها بالحب والامان وياخذون راحتهم من بعد عمل مظني طول السنه

وعليكم السلام ورحمة الله وبركاته

الصراحه هالرد وافي

بعدين يحط عياله عند هله جماعته شالمشكله اليهال سنداره بالنسبه لي اسافر بروحي واخليهم عند امهم عيال وين تاخذهم تايلند والا اسبانيا والا الموزونبيق!!!

وبس والله

[رنان]

انا اشوف ان الموضوع عادي جدا والربط بين الدين وهذا الموضوع ماله علاقه

[لبيبة]

أهلي ما تعاملوا معاي وإخواني بهالمعاملة، ولا احنا نعامل عيالنا فيها،

ولا أشوف إنها صح لأن لو جرى على العيال شي لا سمح الله بيندمون أشد الندم،

والله بيسألهم وين ضيعوا هالأمانة، وبعدين ليش هم ينبسطون وعيالهم لا؟!

يتركونهم والدمعة في عيونهم؟!

المفروض وناستهم تكون في إنهم يشوفون الفرحة في عيون عيالهم ويشاركونهم،

والديني جزاهم الله عنا خير الجزاء وجعلنا من البارين بهم والله ما قصروا معانا وشاركونا في كل لحظة،

واحنا على خطاهم ونشارك عيالنا الحمد لله، وهذا اللي أشوفه صح.