وش الحل مع تعلق عيالنا بالاجهزه الحديثه!!!!!

[ابن البيطار]

مساكم الله بالخير .

تدرون ماباقي الا ايام معدوده ويبداء العام الدراسي الجديد ومثل مانتوا عارفين ان اغلب هدايانا لعيالنا بمناسبة الاجازه او اي مناسبه هي اجهزة التسليه الحديثه مثل الايباد والسامسونج والتاب والناب والجلكسي والكتكات والسوني والبوني يعني عدد اسماء وانواع من اليوم لبكره وللاسف احنا نشتريها لهم وفنفس الوقت نعاني من اثارها عليهم لكن ماباليد حيله لما تحرمهم منها وهم يشوفونها عند عيال عمهم وجيرانهم ماتقدر تحرمهم منها . وللاسف اثارها غريبه عجيبه غير الاثار الصحيه وتأثيرها عالنظر وعدم انتظام النوم والاكل تحصلهم متعلقين فيها بشكل غريب لدرجة الجنون والتسبه والخروج من العالم الارضي الى ملكوتهم الخاص شي غريب فعلا .

عالعموم اسف على الاطاله وعدم ترتيب الكلام لكن فعلا هي مشكله كبيره جدا ومابالغ لو قلت انها تصل الى حد الكارثه عند البعض .مادري الحين ماهو الحل برايكم لسحب هذه الاجهزه بطريقه ماتسبب لهم عقده او تذمر . وابي بصراحه ولو ممكن بعض من تجاربكم العمليه في التعامل مع عيالكم ومع هذه الاجهزه .

لاتحرمونا من ارائكم ومشاركاتكم الطيبه .

[alsoq]

شوف الاب والاهم هم من يقرر يملك جهاز او لا المساله مساله تعود
البعض الله يهديهم بنت او ولده عمره 16 سنه وجوال واايباد
المفروض ابياده ويكون في وقت معين ويغلق

الخطاء ليس منهم وانما من تربيه وضبط وربط

[Rider]

بالنسبة لي مايشوفون هالاجهزة الى في الاجازة

[aziz4z]

هو المفروض يكون أوقات معينة لهم حتى ولو في إجازة , و صدقني لو أنك تجلس وياهم , وتسولف معهم , صدقني راح يستمتعون بحديثك أكثر من هالاجهزة , عادة الاطفال اجتماعيين , بس احنا ماعطين ظهرنا حقهم , و كل واحد في حال , فمن الملل يروح لك حق هالاجهزة , و يروح يتعرف على ناس من عالم آخر , سواء حقيقين أو وهميين.
تلاقي الطفل أبوه هامله , و أمه مشغولة في شيء آخر , هالمسكين مع مين يجلس
في كاريكاتير عجبني

[عضوو]

التقنين والتحديد لأوقات الأستخدام

[Super Cool]

قرأت أمس ان استخدام الاجهزية اللمسية في عمر صغير يسبب عدم اكتمال قدرات الطفل الذهنية!!!

و ان الطفل اللي ما يستخدم اصابعة ككتابة أو طباعة على أقل تقدير يعاني من مشاكل في مشواره التعليمي

[qrt_trading]

أنا اعيالي يعرفون نظامي عدل في الإجازات اعطيهم ايباداتهم لكن الايباد ممنوع يدخل غرفة النوم، ومع بداية السنة الدراسية الايباد ينأخذ منهم وما يشوفونه إلا خميس من الساعة 6 المغرب والجمعه والسبت الساعة 6 المغرب كل واحد منهم امسلمني الايباد، صحيح في بداية كل عام داراسي يكون الموضوع صعب عليهم وممكن يصيحون علشانه بس مع نهاية الأسبوع الاول يكونون خلاص تعودوا على النظام ذي مره ثانية.

[حسن]

والله ياابن البيطار هذي بلوه يعيشها الكثيرمنا وانا منكم
كسرت اثنين ليالي وبعد فتره شريت اثنين مره ثانيه
اصبحو مدمنينها بشكل شي مهب طبيعي يااخي لو كان يحفظ قران كان خلصه
مادري انا بنفسي مهب عارف ايش الحل
رغم اني برع البلاد ولكن العجيب لا ارى هنا من يستخدمها من اطفال وحتى التلفونات
مافي اللا العرب وبالذات الخليجيني يمشون مسمرين في الشوارع
وكل واحد مايقدر يرفع راسه
عنبو شوفو هل التقدم والتطور والطبيعيه ابدا ويقولك نستفيد من السفر التعلم ونشوف حضاره الاخرين

علموني المصريين علم بالمتبلم يصبح ناسي

اذا لقيتو حل ساعدوني ولا انا معاكم اسبح في التيار غصب مهب طيب

[ابن البيطار]

شوف الاب والاهم هم من يقرر يملك جهاز او لا المساله مساله تعود
البعض الله يهديهم بنت او ولده عمره 16 سنه وجوال واايباد
المفروض ابياده ويكون في وقت معين ويغلق

الخطاء ليس منهم وانما من تربيه وضبط وربط

اي 16 سنه ياطويل العمر الحين بو8سنين عندهم هالاجهزه خلها على الله . وفعلا الام والاب لهم دور لكن التيار قوي ياخوي .

[ابن البيطار]

بالنسبة لي مايشوفون هالاجهزة الى في الاجازة

يعني نمنع الاجهزه عنهم في فترة الدراسه طيب لو صار تذمر او لاقدر الله ردة فعل عكسيه . ترى الامر وصل الى حد العشق والهيام مب شي طبيعي .

هو المفروض يكون أوقات معينة لهم حتى ولو في إجازة , و صدقني لو أنك تجلس وياهم , وتسولف معهم , صدقني راح يستمتعون بحديثك أكثر من هالاجهزة , عادة الاطفال اجتماعيين , بس احنا ماعطين ظهرنا حقهم , و كل واحد في حال , فمن الملل يروح لك حق هالاجهزة , و يروح يتعرف على ناس من عالم آخر , سواء حقيقين أو وهميين.
تلاقي الطفل أبوه هامله , و أمه مشغولة في شيء آخر , هالمسكين مع مين يجلس
في كاريكاتير عجبني

ياخوي عزيز صدقني اقعد وياهم واسولف لهم وهم يسمعون وكنهم قاعدين على نار وفي قلبهم يقولون متى يخلص عشان نستلم الجهاز . المشكله ان الحل الي تقول عنه ممكن يكون في البدايه لكن مع تعلق الطفل بالجهاز والهوس فيه ماينفع الحل .