قرار الزامي باستخدام الباص لطلبه المدارس !!!

[حسن]

السلام عليكم ورحمه الله وبركاته

طرحت العام موضوع بيجب فرض قرار الزامي لاستخدام الباصات للمدارس
وهذا انا اطرحه مره اخرى لعل من يستجيب القدر في صدور هذا القرار

استوقفتني تغريده من ساعات للمرزوقي ويقول عجز المجلس عن اصدار بالزاميه
الباصات واستخدامه للطلبه لتخفيف الزحمه

ومن خلال شبكه الاسهم القطريه نريد ايصال صوتنا الى الجهات المسؤله
والمعانه اليوميه في كل بيت واسره قطريه

ومميزات هذا القرار كثيره لاتعد ولا تحصى

منها اجتماعي ومنها سياسي


ماارايكم بهذا القرار لو اصبح واقع كم من الفوائد اللتي سوف نجنيها وتجنيها الدوله
على المستوى المحلي وعلى والمستوى الامني وعلى المستوى السياسي
وعلى المستوى الاجتماعي

اتمنى مشاركتكم بهذا الموضوع وسماع ارائكم القيمه

لكي تضاف الى الخطط الاستراتيجيه للدوله في المرحله القادمه



وفي جعبتي الكثيرمن الاقتراحات ومن المميزات ولكن
حبه حبه



تحياتي لكم

[وحيد-الشوق]

صح انه بيكون حل لتخفيف الزحمة بس مانقدر نجبر الطلاب او اهاليهم باستخدام الباصات الباصات تصير فيها مشاكل وفيها عيال هيلق وغير متربيين مع احترامي

[ودي أكون]

لا صعبه اخوي حسن ..

الباص بلف فيهم لف من صباح الله خير ولين مايلقط كل الطلاب شوف مساكين شلون بيهلكون ..

وغير هذا اذا واحد تعب او رجع/ زوع .. يلا يالباص رد مكان ماجيت ..

وغير هذا اذا محد كان فالبيت او الخدامه ما افتحت الباب .. يا ينطر الباص يا يرد مره ثانيه او يرده المدرسه الخ ..

لا الباص مو حل اخوي .. مع احترامي لقلمك الناشف

[النهار]

صح انه بيكون حل لتخفيف الزحمة بس مانقدر نجبر الطلاب او اهاليهم باستخدام الباصات الباصات تصير فيها مشاكل وفيها عيال هيلق وغير متربيين مع احترامي

اسمح لي اخوي الهيلق بس موجدين في الباص مو الهليق موجدين معاهم في المدرسه يالله تعال حلي لي المعادله الباص بالكثير ساعه ولا ساعه ونصف
وفي المدرسه حوالي 5 الي 6 ساعات
الاقتراح جيد بوعلي وخاصه للمرحله الابتدائيه والاعداديه عيال الثانويه اكثرهم يسوقون بدون لياسن او بالكشه انا بيتي جنب مدرسه ثانويه
اشوفهم طول اليوم مع مواترهم برع المدرسه ( شاردين ) كل موتر فيه من 3 الي 4 طلاب

[Dana’1]

لو كان توزييع المدارس عالأحياء بطريقة رائعة ومن ثم توزيع الطلبه عليها بطريقة أروع لكان قلت قدام أنا معك
أنا مو ضد الباصات للطلاب أبدا وسبق وسجلت بنتي بالباص
بس بمثل هالوضع وهالتوزيع صعب شوي بسبب التأخير وغيرة
غير كذا محد يقدر يلزم الي عيالهم بمدارس خاصة لان الباصات بفلوس ومو الكل ملزوم يدفع قيمه الباص وهو يقدر يمر بالسيارة وياخذ عياله

وحاليا الوسيلتين متاحة والخيار لولي الأمر بما يتناسب معه وهذا هو الأفضل

[حسن]

صح انه بيكون حل لتخفيف الزحمة بس مانقدر نجبر الطلاب او اهاليهم باستخدام الباصات الباصات تصير فيها مشاكل وفيها عيال هيلق وغير متربيين مع احترامي

مرحبا ياوحيد الشوق
بالقانون يجبرون مثل ماوضعت القوانين الاخري والدول المتقدمه
احنا مهب احسن منهم
وكل وقت وله ظروفه وقوانينه
مشكله المشاكل بسيطه جدا ولها حل بسيط في تقويم السلوك
وذا على الهواش ياما شفت هواشهم مع السواقين والله ان احيانا
يضربهم ضرب
ترا عندي صوره تذذكرتها وموجده ياهل مطلع جسمه من السياره وهو مع السواق
طالعين من المدرسه !!!
فا اللي يقول انه السواق اضمن اعتقد لو في احصائيات حقيقه
تصدر عن مشاكل الطلبه والطالبات مع السواقين
كان بتشوف البلاوي ولكن ماندري عنها يااما التكتم من قبل الاهل او الجهات الرسميه

شكرا لك يالغالي

[غير البشر]

يسوونها الكبار ويطيحون فيها الصغار

بس بوعلي الاطفال مالهم ذنب يمكن بعظهم يوصلون الساعه 3 العصر لو بالباص
وخبرك احنا عندنا

نشتغل بدون تخطيط او تخطيط غلط
ونحمل الخطأ الاطفال وتطيح في راسهم

الا اذا بطلعونهم الساعه 12 او 12 ونص بالكثير ممكن يصير

وتدري احنا عندنا تعذيب لطلاب المدارس
مايطلعون من المدرسه الا لين ينشفون طاقتهم

[حسن]

لا صعبه اخوي حسن ..

الباص بلف فيهم لف من صباح الله خير ولين مايلقط كل الطلاب شوف مساكين شلون بيهلكون ..

وغير هذا اذا واحد تعب او رجع/ زوع .. يلا يالباص رد مكان ماجيت ..

وغير هذا اذا محد كان فالبيت او الخدامه ما افتحت الباب .. يا ينطر الباص يا يرد مره ثانيه او يرده المدرسه الخ ..

لا الباص مو حل اخوي .. مع احترامي لقلمك الناشف

اولا ضحكتيني على قلمي الناشف

هاهاهاها

شاسوي يتفاعل مع الحدث احيانا ناشف واحيانا مدمر واحيانا رومانسي

احيانا ماتفهمين من شي




لا لا لا لا

انتي تكلمتى عن افتراضيات وليس عن حقيقه
انا اقولك
ولدي العام طول السنه يوصله الباص
الساعه 1 و35 دقيقه هو في البيت
بحكم نحن نتبع مدرستنا اللي بمنطقتنا وبعدين شنهي المشكله نزيد عدد الباصات
لكل مدرسه ونخليها صغيره
وبالنسبه للمريض ولا شي حالات نادره واذا حصل شي ادراه المدرسه هي المسؤله عنه

شكرا لك ياودي اكون

[نفسي عزيزه]

حق الهواش بالباص هههههه

الله ايام قبل ياحسن يوصلنا علي بن ناصر النعيمي ولازحمه ولا شي كلنا بالباص ووناسه واذا شاف حباره لحقها بالباص مال المدرسه ههههههه وكان المنجد قبل واول ماصار الجيش الحافي طرد وراها واحنا مستانسين

الحين سيارات وزحمه وعفسه كل واحد بيروح بموتره

[شيخ الديرة]

أنا كنت عايش في دولة غربية وكان عندي أطفال بالمدارس, لم يكن الباص أجباري, مادري منين جبت أجباري أخوي أبو علي.

هناك حل وسط, اللي يريد يروح ويجي بغير الباص, يخصصون محطة صعود ونزول قبل المدرسة ومسافة عنها حتى لا يكون هناك فوضى على باب المدرسة. الصبح ينزلوهم أهلهم هناك, وياخذوهم الظهر من هناك, وحافلة مكوكية مخصصة من المدرسة توصلهم من والى تلك المحطة.