* ضحــــايا البرستيـــــج *

[hamadazoz]

كلام في قمه الروعههههه

[الجـــوديّ]

ماعندي عقدة البرستيج الحمدلله
اشيل شنطتي بنفسي انزل اغراضي من السياره بيدي اركب اي موديل واروح الدوام
مره خذيت دريول اجار سيارته قرنبع ودريشته مكسوره يوصلني الدوام لان هو الي حصلته ذيك الفتره ههههه
والله البساطه والثقه بالنفس اجمل بوايد من الاهتمام بالاخرين

هههههه أحاول أتخيلج في السيارة .... يا بطلة
البساطة نصف الجمال مثل مايقولون في مجمل حياتنا .. أو كأسلوب حياة .. يستمتع الانسان بحياته ويعيش لنفسه مو للناس
بس الحين البرستيج ماوقف على سيارة ...
يعني حتى البيالات والفناجيل وضيافة الناس دخل فيها البرستيج! فيه ناس صاير لهم هوس بهالسالفة !
يا أدوات معينة وأطقم معينة وإلا بيطيج وجهي قدام الناس ؟! مع فارق مستوى البيت ومستوى الأطقم هذي .. مافيه تكافيء أصلاً !
يا أغير كل سنة طقم الجلوس قبل رمضان وأغير ديكور المجلس وإلا بيطيح وجهي قدام الناس ؟!

يعني يحطون قيود على نفسهم ويربطون عمارهم بصناقل ما أنزل الله بها من سلطان !

[Super Cool]

ياخي استغرب لما شخص يربط حسن المظهر و الوقار بشيء يملكه...يعني لهالدرجة انت مافيك شي ينحب أو يحترم؟

حسّن مظهرك بخلقك...ارفع قدرك بعملك...أظهر نعمة ربك عليك بشكره و صدقتك

[الجـــوديّ]

واما بنعمـة ربك فحدث

ان الله يحب ان يرى اثر نعمته على عبده

لكن الموضوع اذا اصبح فيه نوع من المبالغه اصبح مرض وكذلك اللى يحمل

نفسه فوق طاقتهاا هذا عنده عقده نقص وقلة ثقه بالنفس ومحروم من لراحه

الجمال في البساطه الانيقه ان صح التعبير بدون تكلف والاستمتاع الحقيقى بالحياه

بانك تكون على طبيعتك مب تتصنع وتمثل عشان ترضى الناس وتعيش دور

مب دورك خل برستيجك في حدود امكانياتك بدون تكلف بترتاح .


الحقيقه البرستيج هو ضحيتنا مب احنا ضحاياها لان البعض فاهمينه غلط

مـوضوع مميـز ويستحق الرد

مرحباً بالأخ ناصر .. وشكراً على الإطراء..

نعم ... معيارنا المعنوي والروحي هي الآية الكريمة .. وأجد مداها واسع جداً ..

خاصة اللي مستواه بدون ديون يقدر يقتني افالون ولكن هو مُصر على الظهور ببرستيج عالي وما يرضى للمرسيدس بديل!

مثل هؤلاء فعلاً يشغلون حياتهم بأشياء مادية تضيف لهم قيمة "للفراغ" اللي هم فيه حتى لو ما كان هدفهم الاستعراض.


قريت مرة عن حياة أشهر مضارب أسهم في العالم الملياردير وارين بافيت ..

استغربت من بساطة حياته ولا عنده البهرجة اللي عندنا على انه ملياردير
والفلوس عنده هي محصلة مجهود وتعب ... على قد ما تعب على قد ماربح .... وبس
ضابط نفسه على مستوى فوق متوسط .. متعايش معاه ومناسبه ... مع أن اللي مثله يحق له يعيش ملك!

البرستيج برايي شي جميل وايجابي في حياتنا كمسلمين ويميزنا عن باقي الامم
لكننا بالمبالغات والتقليد الأعمى أفسدناه فافسد حياة الكثيرين الله يصلحهم.

[الجـــوديّ]

والله انا كانت عندي هالعقدة اول ما توظفت كان لازم اخذ سيارة بالشي الفلاني
عشان لما يخلص الدوام كل البنات ينزلون البيسمنت مع بعض وعاد تعالي جوفي
السيارات الكشخة والارقام المميزة حسيت انهم ينافسون الشباب لين فترة بسيطة غيرتها لاكثر من سبب ولله الحمد خذت سيارة زينه لكن نادر تلاقين بنت راكبتها هاليومين ولي اليوم وايد بنات يقولون لي غيريها وبعضهم يرفض يركبها رغم انها موديل السنة ..

وعندج موضوع اللبس عيب وحدة تلبس شنطة براند بس من السكند لاين
والا البراندات العادية مثل ريفر ايلاند او زارا ..

مادري شخصيا ما عندي هالبرستيج او هالهوس ولله الحمد

أهنيج إنج قدرتي تمشين على هوى عقلج مب هوى نفسج ..
الله يهداهم الحريم اللي ماشيين وراء هالسوالف تأثيرهم السلبي كبير على اللي حواليهم وللأسف
اساس الماركات كانت ان الناس تبي تستخدم شي كوالتي يدوم معاها
لكن مع هالانفتاح على اسواق العالم انقلبت الاية ...
وصارت الماركة لموسم واحد ويللاه قطها وجيب الأحدث والأجدد
والتسابق على منهي الاولى اللي بتشيل شنطة الموسم الجديد والتفاخر بأنها الأولى omg!!

فيه ناس تتأزم نفسياً إذا ماتوفرت لها مقومات البرستيج ..!
الراتب حول العشرين
الشوز بخمسة والشنطة باثنعش .. والباقي هبابه لأغراض الجمعية ....والسكن غرفة وصالة ببيت أهل الزوج !!!
اشجاب لجاب !

وفيه ناس ماشاء الله من زود قناعتهم هم "ماركة" وعارفين يكيفون وضعهم على مستوى وسطي
حتى اللي حواليهم يحبون يقلدونهم لأنهم منسجمين مع نفسهم. الله يكثر من امثالهم


شكراً العلياا على المشاركة الطيبة ،،

[الجـــوديّ]

اهتمام الانسان بتصرفاته وشكله الخارجي متطلب اجتماعي مهم جدا لا يمكن اغفاله وهو يندرج تحت مسمى (self-esteem) وهو امر محمود اجتماعيا .

لكن طريقة التصرف او تناول الناس في التعبير عن انفسهم تختلف من شخص الى اخر . فهناك المتطرف وهناك المعتدل وشتان بينهم .

وعادة من يقوم بتصرفات اجتماعية مبالغ فيها فهو في حقيقة الامر والاغلب يحاول ان يخفي او يغطي على صفة او خلل ما في شخصيته منبوذه اجتماعيا !

البرستيج او أي مسمى اخر يندرج تحت تلك التصرفات امر يبقى متطلب ومقبول اجتماعيا طالما ان لم يحد عن جادة العقل والمنطق والذوق الذي صنف المجتمع افرادة على انه مطلوب .

وفي النهايه الجميع يسوق نفسه بطريقته ويبقى القبول امر مختلف فيه بين المجتمع .

يعطيك العافيه

شكراً قبطان سلفر على المشاركة المفصلية
فعلا الناس اللي تبالغ في البرستيج تطلب احترام وقبول المجتمع لها ..
ولكن استفحال هذا المبدأ و طفوه على السطح تطور من مطلب فاصبح هاجس واستفحل إلى مرض
وبنستثني منه صغار السن لأنهم بعد ما وصلوا إلى سن النضج ..

صار المجتمع القطري السمة الغالبة فيه الزبو والمفوشر للأسف !
حتى هالشي مشهور عند التجار وأصحب المحلات ووصل إلى أسواق الدول المجاورة ..
المراة القطرية مثلاً ما تكاسر .. تنحرج أو برستيجها ما يسمح لها
أو انها بتشتري باي مبلغ المهم يكون حلو وأنيق وراقي واخر موضة
وارتفعي يا اسعار بشكل جنوني !


يعني هالتصرفات وين واحترام الذات وين ...
ضاعت الطاسة وما عاد فيه محددات واضحة الواحد يستند عليها
فنكون في صراع حتى لو صامت وبنظرات العيون من الازدراء أو الانتقاد.

مؤسف أن تكون هذي ثقافة مجتمع مما يولد الهشاشة فيه .. ويكون سهل الاتجاه مع هبوب أي رياح جديدة !

[يمامـة]

التقيد ضمن برستيج معين مافيه ضرر ما لم هالبرستيج ما تسبب في سحب الانسان من بساطته..
فمتى ما اصبح البرستيج عائق لكسب النفس راحات كثيرة .. فيجب التخلي عنه ...

[wesam82]

بيض بالجبن بـ 2 ريال
ايقز وذ تشيز بـ 15ريال

شباتي عسل 2 ريال
بان كيك وذ هوني 20 ريال

نسكافه حليب 1 ريال
قراند لاتيه 17 ريال

خل برستيجك ينفعك

[الجـــوديّ]

ميمي برستيج ههههه

البرستيج اخر همي بس الوجاهة الاجتماعية مطلوبة جنبا الى جنب البساطة والذوق والرقي ، يعني شي مب منطقي عندي لكزس واركب عراوي عشان اقول للناس اني مب مهتمة بالشكل اهم شي المضمون ! في نفس الوقت عادي اركب الهيلوكس اذا مضطرة وماعندي سيارة تقضي مشاويري غيرها ،
الواحد لازم يحافظ على مظهره الاجتماعي مش لاجل البرستيج لا من اجل الشخص نفسه يعني شي معنوي اكثر من انه شي مادي

ههههه ... ذكرتيني بميمي جمال ..........


اختصرتي الموضوع كله ضوى ..
المكانة مطلوبة واظهار النعمة مطلوب وبنفس الوقت أعيش كل ذي علشاني أنا مب علشان الناس..
واعتقد ان تجاوز هالشي كقيمة معنوية ثابته يجعل الانسان متزن نفسياً وفكرياً ..
ويكون تركيزه على أشياء أخرى تضيف له قيمة معنوية مضافة وليس مجرد اشياء وكماليات.

للعلم بعد اختي جاكلين المشاهير الاجانب عندهم ناني متعلمة تعليم عالي حتى تربي عيالهم واكثر الوقت في البيت عندهم ، هذا كلام جوليا روبرتس وانجلينا وكيم وكمن واحدة مايحضرني الاسم

والله في هالزمن أصبحت التربية صعبة .. نحتاج المربين ونبيهم على حلة ... ...
مب من باب المباهاة (بنشوف الدفعة الاولى من مربيات الاكاديمية اشبيسوون !)

وترا فيه من الأسر الثرية بقطر من تجعل لابنائها مربين منذ نعومة أظفارهم يعلمونهم اللغات واصول التعامل واللباقة والاتيكيت.
هذا تقليد متوارث عندهم مب شي جديد .


شكراً ضوى ... نورتي

[الجـــوديّ]

صحيح قبطان هي نوع من الشعور ان هناك نقص لابد تغطيته ولا الناس بتقول عني شي

فهي عقده نفسيه بشكل اجتماعي مقبول جدا

كل مازادت ثقة الشخص بنفسه وبتصالحه وسلامه الذاتي مع نفسه لمارس حياته وفق مايرضيه كتقدير ذاتي لا صلة له بالاخرين
اسافر اوروبا لرغبه في ارضاء ذاتي انا وليس لاشعر الاخرين اني البنت الواو التي تسافر
ارتدي اللبس الذي يشعرني برضا وليس حتى يقال اني البنت الكشيخه
اقوم باعمالي بنفسي لاني لا انتظر تعليق بأن شوفوها بنت الفلاني راقيه خدمها يسوون لها كل شي

هذه هي المباديء التي يجب ان تكون متأصله في الشخص فكريا بدون ماينظر لرأي الاخر فيه

تقوللي وحدة من اللي يحبون يظهرون ببرستيج عالي .. على الرغم من أن مستواهم أصلاً عالي (مادري شسالفتهم!)

المهم .. انها زارت قريبتها في دولة مجاورة
من سنع هذي المراة وعدالها .. ضيفتهم بوفيه طويل عريض من وإلى وكله من شغل يدها ومن أنظف وأحسن وألذ ما يكون
على الرغم ان هذي المراة ماعندها شغالة وهي موظفة وأم عيال!

فكانت صاحبتنا القطرية تمدح البوفيه ومستغربه منها ان شلون هالمراة اضبطت المعادلة الصعبة
وان احنا يا اهل قطر ذبحنا البرستيج اللي نركض له .. ونبي ضيافتنا غير .. ومن عند الطباخة الفلانية ..
ومادري شنو من التاجرة الفلانية وصرف مبالغ كبيرة على نتائج مرات تكون متواضعة .. بالمقارنة مع بوفيه المراة راعية البيت !


هذا البرستيج المزيف وهذي سواياه .. خلا حريم وايد مجرد خيالات مآته ... حرمهم يعيشون على طبيعتهم !