السلام عليكم ورحمه الله وبركاته ..
مساكم الله بالخير جميعآ
موضوعي اليوم عن كورنيش الدوحه ..
امس خذت العيال وام العيال قلت بروح الكورنيش لأن الجو كان حلو
وبالمره خذت لفه في احدى اللنجات
للأسف طرحت موضوع قبل عن مدخل اللنجات ولا صار شي بالموضوع
قطعه خشب وللأسف اي كلام في السيفتي ومعرض للسقوط
المهم موضوعي اليوم عن الوصاخه المحذوفه على الأرض
والله شي مؤسف
انصدمت من بعض الناس الي قاطين القمامه على الحشيش او في المواقف
اول ماوقفت بطلت باب سيارتي اشوف كيس شبس وماي وكيس مربوط محذوف
انزين لو مشيت خطوتين بتحصل حاويه القمامه
ياخي قطها في الحاويه
ليش هالتصرف البذيئ
كنت اتمنى اشوف هذا الشخص ولاكن للأسف شفت قاذوراته ولا شفت صاحب القاذورات
وبعدها نزلت من السياره اتمشى في ممشى الكورنيش وشفت نفس الشي
اكياس من الشبس او قواطي عصير
لاتقولون وين عامل النظافه والله العظيم حاويات القمامه في كل مكان متوافره وقريبه من بعض
حتى لو موجود عامل النظافه
هل هذا التصرف تصرف انساني وتصرف بشر ...؟
للأسف شي مؤسف ومحزن في بلادي وارى هذي الأشياء الغير حضاريه
مابي اقول انهم فقط اجانب او مقيمين الي يسوون جذي
رسالتي لكل شخص له مثل هذا التصرف
اتمنى منك ان تعدل تصرفك هذا
واسأل الله ان يحفظنا ويحمينا
اخوكم بومحمد المطاوعه