ايام العشر من ذي الحجه هي افضل ايام السنه
ياريت لو كل وزير او كل مسئول كبير في البلد يجتمع مع موظفينه وموظفاته ويحاول يحيي فكره من الافكار الحسنه التي تحث الناس على البذل والعطاء
حكومتنا الله يجزاها خير اسبقتنا وقامت تدعم الخراف السوريه والاردنية المنشأ واصبحت اسعارها 1080 للاردني و1350 ريال للسوري حتى يتسنى لجميع الناس احياء هذه الشعيره المقدسه(هذي الخرفان قبل الدعم اسعارها قريبه من ال1700 ريال) والحين عقب هالدعم صارت اسعارها في متناول الجميع
-------
مافي أي دوله في العالم حكومتهم قاعده اتساعدهم وتنفق من موازناتها علشان اتحث المواطنين على البذل والعطاء مثل دولتنا الحبيبه
( ياجماعه الدوله قاعده اتساهم معاكم واتشاركم الاجر في الاضاحي)
يعني اتجاه الحكومه ومساعيها كلها خيريه
-------
نفسي نسمع بكره ان في مسئول كبير في البلد فيه الخير في اجتمع مع مدراء الادارات وقال لهم استعدوا علشان يوم الخميس نبي انسوي طبق خيري نخصص ريعه والعائد منه للفقراء والمساكين والمضطهدين في كافة اصقاع المعموره كالتبرع لاخواننا في فلسطين او للعوائل النازحه الي تركيا من السوريين الذين لامأوى لهم ,
هذي الايام ياجماعه موسم والاجر فيها مضاعف وتختلف عن باقي ايام السنه
نبي مدراء الادارات ورؤساء الاقسام يساهمون في هالطبق الخيري اكثر من غيرهم علشان يكونون قدوه حق غيرهم ( خادم القوم سيدهم )
مب عيب هالسوالف ولازم نتغلب على هالشعور الدخيل علينا الي انسميه الحيا ومانبي واحد يقول لا استحي
الرسول صلى الله عليه وسلم كان يجمع ابنفسه الصدقات من المهاجرين والانصار( واحنا انقول لا عيب استحي ) شنو هالكلام ! وليش عيب واحنا شمسويين يعني علشان انقول عن هالشي عيب؟ احنا مب قاعدين نشحت بالعكس احنا قاعدين انحث وانشجع الناس على البذل والعطاء ومساعدة الفقراء والمساكين
-------
ونبي من كل موظف يخبر زوجته او بناته ( وخاصه الي يجيدون فن الطبخ)ان يبتدون ليلة الخميس يسوون حلويات وموالح وكيكات وفطاير او حتى لو يوم الخميس الصبح بعد يصير اذا كان عندهم فرصه.
نبي هريس وعصيد ومظروبه وبلاليط وجميع الاكلات الشعبيه والمحليه والعالميه وياريت يتم التركيز على الحلويات لانها لاتتعرض للفساد بسرعه
-------
ونبي تكون اسعار الاطباق والحلويات عاليه مب اسعار رمزيه (احنا مب في معصره علشان اندور على الرخيص) لان الغايه منها هو ابتغاء الاجر والثواب من الله
والرسول صلى الله عليه وسلم قال (من خاف أدلج، ومن أدلج بلغ المنزل، إلا إن سلعة الله غالية، ألا إن سلعة الله الجنة ) يعني الي يبي الجنه عليه بالنوط الازرق ابو 500 على صحن الفطاير هههههه
يعني صحن القيمات اذا ينباع برع اب20 نبي اتكون تسعيرته في الطبق الخيري اب100 ريال او اكثر
-------
المشكله ان مشاهير الفن والغناء من النصارى قاعدين يعرضون ملابسهم الداخليه للمزاد العلني والناس قاعده اتنافس واتزايد لين مايوصلونهم ملايين وعقب يتبرعون بالعائد منها للكنيسه
-------
واحنا يالمسلمين نستحي نوقف ونشرف على أي مشروع خيري لانها (فشيله)
انزين هذول الكفار ماستحوا وهم على باطل واحنا المسلمين الي على حق ليش صايرين حياويين اكثر من اللازم؟
-------
والله لو يقعد واحد من المسؤولين الكبار في البلد ويشرف على هالطبق الخيري ان الناس بتدفع على قطعة البسبوسه 10000 ريال
-------
الناس فيهم خير بس يبون احد يشجعهم ويحمسهم ويبون يشوفون رؤسائهم في العمل يقومون على خدمة هالمشروع الخيري مب كل واحد من المسؤولين اول مايبتدى هالطبق الخيري الا وسكر عليه مكتبه او راح بيته.
-------
وعلشان ينجح هالمشروع نبي قطريات بعد الي يبيعون مب بس يخلون خداماتهم الي يبيعون وهم يراقبونهم من ابعيد ( لانهم يستحون)
-------
تدرون ان لو الي يبيعون قطريات وقطريين ان الاسعار بتولع ناااااار وبيكون العائد من هالطبق الخيري كبيرر جدااا وبيخدم اكبر شريحه ممكنه من المساكين.
اذا بتحطين الخدامه اتبيع بدالج سعر صحن القيمات بيكون 100 ريال اما لو انتي بعتيه بدالها بيكون سعره 2000 ريال هههههههه
ومافيها شي لو بعض الشباب يقعدون ويشرفون على بعض اطباقهم لان هذا يأثر على نفسية المشتري ويخليه يدفع اكثر
------
والي تستحي مب مشكله خلها قاعده عند خدامتها بس مب اتروح عنها واتخليها ابروحها( التسويق فن مب حيالله )
------
تدرون ان في بعض الموظفين والمدراء في بينهم وبين بعضهم شحناء ولما يجمعهم هالطبق الخيري انهم بيشترون من بعضهم وبيتصافون وبينزع الله سبحانه وتعالى هالشحناء والعداوات الي بينهم وكل ذلك ببركة هالمشروع الخيري
------
ياجماعه نبي الشمروع يكون في هالايام مب في أي يوم في السنه
يوم الخميس يوم جدا مناسب لانه بيصادف اخر يوم دوام وهو من ضمن ايام العشره من ذي الحجه وبيكون له انطباع واثر ايجابي على كل الي بيساهمون فيه
-----
هالمشاريع ماتطلع عائد او ريع كبير اذا كانت في سائر ايام السنه
هذي ايااام تضاعف فيها الحسنان والمفروض نغتنمها في اقامة هالمشاريع مب نختار أي يوم وانسوي فيه طبق وخلاص
-----
اكثر المشاريع والاطباق الخيريه الغير ناجحه كانت تفتقد للتنظيم والتسويق واختيار الوقت المناسب
-----
وفي النهايه نبي يكون في منافسه بين الوزارات والادارات ونبي أي اداره اتقيم مثل هالمشاريع انهم تقدم دعوه لسائر موظفي الوزاره ونبي يكون وقت بدء هالطبق الخير مثلا بعد صلاة الظهر علشان ماتتعطل مصالح ونبي حتى المراجعين يدخلون ويساهمون في الطبق الخيري
نهاية الدوام وقت حلو ومافي زحمه ووقت غدا وكل الناس تبي تدفع علشان تاكل
ونبي من كل شخص يقول حق اهل بيته اليوم باجيب لكم اكل من مشروع الطبق الخيري ( علشان ماينقط الاكل او يزيد ) والزايد من مشروع الطبق الخيري يتم توزيعه بالمجان على العمال والمساكين
واعذوني على الاطاله ومنتظر مشاكراتكم واقتراحاتكم وشكرا لكم
|
رد مع اقتباس
المشاركة الأصلية كتبت بواسطة يمامـة
