اللهُمْ خِفّافاً لا لنْا ولا عَليّنا لا نؤُذيِ ولا نُؤذى، لا نَجّرح ولا نُجرح، لا نَهيّنْ ولا نُهانْ، اللهُمَ عَبُوراً خَفيّفَاً لا نُشّقيِ بأحدً ولا يُشّقى بنا أحد
ما عليج من همر .............> اصله متسبب.. ما قد قريت لج انج تقولين اضربوا لمجرد الضرب
كل اللي اشوفه انج تتكلمين عن الضرب التأديبي في مقابل عدم الالتفات الى ما يؤمن فيه الكثيرين
عن الحالة النفسية للطفل او المراهق على حساب تأديبه وتقويمه وتهذيبه..
ومن ثم خليني أقول لج سالفتي مع اخر العنقود..............> اعجبتني ومن ثم
بما انه آخر العنقود ومثله مثل أبناء قطر الاوفياء تعود يشرب كرك ويطلبه وهو في السيارة
وبشكل عام لما أكون وياه او ابوه يكون وياه .. كل همنا ان نحرص ان القلاص يكون بعيد عنه
حتى لو تمينا ما سكينه بايادينا لين يدفى وعقب نسلمه إياه..
وفي اول مواجهة له مع كوب الشاي الحار ولأنه مب متعود أصلا يدبر عمره في مثل هالمواقف
وخاصة لما الشارع يكون مب مستوي.. كانت النتيجة انه ماسك كوب الشاي مثل ما يمسكون قلاص الماي البارد
اول حركتين للسيارة وهو قاعد جدام مع الدريول سمعنا صراخه.. والشاي على ريوله .. فطلبت من الدريول يوقف
على طول وقلت له انزل تعال صوبي.. وصبيت عليه ماي من مطارة صحة عندي وبللت له ملابسه..
شافتني اختي وقالت لي هذي نتيجة التربية .. الياهل مب معتمد على نفسه
بالفعل الاحظه حتى مطارة الماي يعطيني إياها يقول لي لو سمحتي افتيحها
وبكل سعادة وسرور انفذ له مطالبه اللي اشوفها بسيطة جدا.. ولكن في الأخير اثارها مصائبية جدا..
فموضوعج يلامس حقيقة واقعة أحاول في الفترات الأخيرة اني ما اخلي يحتاج المسادة بداع ومن غير داع..
بس اعتقد هرمنا يا اختي والعواطفي بدت تتجمع في شخصه الكريم ...........> اعجبتين بشخصه الكريم بعد..