السلام عليكم ورحمة الله وبركاته
اول شي احب اذكركم ياللي بتردون على موضوعي " يجب رد السلام ولا بتأثمون " هذا الكلام اقتبسته من العضو " راجي العفو "
الحين ندخل في موضوعي المهم
طبعاً الكل عارف ان البيوت لها حرمه والملك الخاص له خصوصيه لابد أن تحترم .. هذا أمر مفروغ منه
ومن ناحيه ثانيه احنا في دوله اسلاميه خليجيه متمسكه بعاداتها وتقاليدها .. ومحد يرضى على نفسه ولا على هل بيته
طيب باقولكم الحين السالفه شنهي .. الله يسلمكم اشوف في الفتره الاخيره انتشرت هالطيارات اللي يطيرونها اصحابها بجهاز وللاسف هالطياره فيها كيمرا وممكن تطير في الفريج لمسافات .. يعني فلان قاعد ف حوش بيته يطير طيارته فوق بيوت الجيران ويوديها يمين ويسار وممكن تقطع مسافه مش صغيره ويقعد يتفرج على بيوت خلق الله ويشوف اللي رايح وراد .. يعني كأنه يراقب وممكن يسجل بعد
انزين افرض ان بيت فلان قاعدين فالحوش حريمهم او فوق السطح الخ وبدون شيله (غطاء راس) وانت طيرت طيارتك وصورتهم!!!
اول شي حط ف بالك هالشي حرام
ثاني شي عيب وانت ماترضاها حق هلك ليش ترضاها على غيرك؟
بعدين حتى من الناحيه القانونيه اذا مثلا الشرطه اقتحموا بيت فلان بدون اذن من النيابه او بدون تصريح فيكون اجراءهم باطل حتى لو فلان هذا عنده بلاوي وشافوا بلاويه بعد يطلع برائه .. تدرون ليش؟ لان البيوت بذات لها حرمه وممنوع انتهاكها
حتى من ناحية الشرع هالشي مذكور
فإن الله تعالى قال : " ولا تجسسوا " ، وقال تعالى : " وأتوا البيوت من أبوابها " ، وقال تعالى : " لا تدخلوا بيوتا غير بيوتكم حتى تستأنسوا وتسلموا على أهلها "
وبعد أظن ان هالطياره ممنوعه بس مادري شلون يدخلونها
وجب التنبيه والنصح
اعتقد الكلام واضح ووافي
اترك لكم التعليق