بسم الله الرحمن الرحيم
موقف حصل لي اليوم وتبين لي معدن الناس ياحيف على الرفاقه
سيارتن عن منة الناس تغنيك .... ..............موديلها ماهو بالحيل ضروري
مادامها تمشي وتقضي مقاضيك ... اهون من حاجه الناس وضرب الصدوري
بديت بالابيات هذي لان هذا ماحصل لي للاسف اليوم وانا رايحه لدوامي
وبعد ماقربت من شغلي مابقى الا الشارع العام وقفت بي السيارة ولعاد تحركت
وقمت واتصلت بصديقة عمر وسنين معاي في المكتب واستفزعت بها قلت فلانه وين انتي قالت في المكتب
يعني وصلت وحضرت من بدري وقلت تكفين سيارتي تعطلت وانا واقفه في الشارع تقدرين تجين توصليني
لدوام
وردت وقالت : مااقدر زححححمه وسيارتي في المواقف واخاف اطلعها ولا احصل موقف ثاني
قلت طيب جزيتي كل خير .. وسكرت
وفريت الجوال على الاخرى نفس الشي صداقه عمر وعشرة وكلنا وشربنا مع بعض وقلت فلانه وينج
قالت في الدوام قاعده اتقهوى مع البنات قلت تقدرين تجيني تاخذيني توصليني للدوام سيارتي واقفه
ومعترضه نص الشارع قالت وهي تضحك تعالي مشي قلت شلون اجي مشي اقطع الشارع وزحمه وحر
ومستحيه وردت وقالت بصراحه سيارتي مسكرين عليها مااقدر اطلعها... قلت طيب وثواني قالت اطرش لج الفراش
يعني الفراش بجيني مشي والا ايش ؟؟ قلت لها خلاص بدبر حالي
وبس للاسف تميت واقفه ساعه .. لين مااتصلت بالثالثه وقالت ابشري انا في البيت وجايتج ثواني
ووصلتني وجزاها كل خير ,,,
سؤالي هل انعدمت الفزعه والمروه من بعض الناس خاصه انك معاشرهم سنين طويلة وبينكم علاقه وطيده
في اسهل موقف تخلوا عنك ياحيف والله على الرفاقه
تذكرت ابيات ...
مال الرفيق الا رفيقه ليا اعتاز ... اما نفع ولا بلاش الرفاقه
احدن لنا في مكسر الساق معكاز.. وحنا له المعكاز في كسر ساقه
بعض العرب اسكب على صحبته قاز..احرق غلاه ولايهمك فراقه
,
,
ويهمني مشاركتكم واراكم ,
اختكم / الماريه