بسم الله الرحمن الرحيم
بتكلم في هذي التجربة عن الوسائل العلاجية اللي استخدمتها وشنهي أفضل الحلول ..
عل وعسى تفيدكم مثل ما فادتني من بعد معاناة طويلة انتهت بفضل الله.
كنت دايماً أعاني من آلام في جسمي ما أعرف أسبابها، أحس إني مريضة ومو مريضة .. كسل .. خمول .. فتور ..
تعبت وأنا اروح للدكاترة محد كان يعطيني تشخيص سليم علشان يعطيني دواء يناسب مشكلتي ..!
وأنا ما خليت شي ماقريته بهالخصوص فوصلت إلى الاحتمالات الأربعة لمسببات هذي الالام:
ممكن يكون نقص فيتامين د
ممكن يكون دهون على الكبد وقصور في وظائف الكبد
ممكن يكون زعل واسباب نفسية
ممكن يكون نقص البوتاسيوم في العضلات
وللعلاج ..
كنت آخذ ماسكادول يريحني ويخدرني شوي
جربت السباحة .. كانت مفيدة وانفعتني بس لازم تكون ضمن نظام يومي اما سباحة وإما مشي يعني المهم إني ما اقطع الروتين.
وقبلها جربت العلاج الطبيعي علشان تسترخي العضلات ... فكانت الاستجابة بطيئة وتاخذ وقت طويل !
ومن فترة .. صابني –الله يجيركم- ألم شديد في الجنب اليمين .. من رقبتي لين باطن القدم .. فكانت الالام قوية عطلت مجرى حياتي ان وقفت وايد تعبت وان مشيت فترة بعد تعبت وان قعدت يبس ظهري .. وان نمت .. مثل الفلفل يشب بمكان الالم ووهج وحرارة... فقالوا احتمال يكون عرق النسا
خذت المسكنات العادية ... فكان أثرها بسيط
فاضطريت اخذ فولتارين في العضل و بعد بؤرة الالام مازالت تندح علي ..
فعطوني مسكن في الوريد ريحني 12 ساعة وبعد مازالت بؤرة الالم تندح.
وعقبها استمريت على بنادول جوينت ريحني فترة
لين الله هداني وألهمني أجرب العلاج السحري الرخيص اللي مافي أرخص منه ..ومتوفر في بيوتنا كلنا!!!
اللي هو
بديت أشرب ماي فيه قطرات من الليمون طول اليوم ..
هي بس 24 ساعة واختفت كل الالام من العظام والعضلات اللي اشكي منها من سنين بالإضافة الى مشكلة جنبي اليمين الأخيرة !
هذا غير النشاط والحيوية وليونة العضلات بشكل مب طبيعي
ومن استمريت على هالماي الحمدلله أنا بخير .. جسدياً ذهنياً نفسياً
شرب الماي والليمون يعتبر من أحد وسائل نزع السموم من الجسم واذابة الدهون .. وفكرته الرئيسية تعتمد على شنو ؟
تعتمد على حامضية الماي (PH) اللي نشربه .. بمعنى
حامضية ماي الحنفية العادي تقريباً 7,5 = حمضي
ماي الصحة= المياه المعدنية تقريباً 7 = معتدل
ماي زمزم 8-8,5 = قلوي
وكلنا نعرف ان ماي زمزم فيه خاصية علاجية استشفائية
لذلك كل ما كان الماي قلوي عندنا كل ماكان أحسن وأصح للجسم علشان يخلي الدم أيضاً قلوي وهذي النقطة المفيدة
وكل ما كان الدم حمضي يعني الجسم مريض عافنا الله وإياكم.
المهم ... وحدة من أسهل الطرق اللي ممكن تخلي الدم قلوي هو بضع قطرات من الليمون في كاس الماي أو عصر ليمونه وحده بالكثير في جيك الماي وخلوا القشر في الجيك واشربوا منه طول اليوم ... وخففوه بالماي كل ماحسيتو ان حموضته زايدة ..
وللي يعانون من حموضة المعدة ممكن تشربون هالماي عادي لكن اكلوا شي بعده أو شربوا شي بسيط غيره على اساس مايخلي حموضة الليمون تبقى ووتتضاعف وعقب اتحسون بالحارق.
هذا الماي بالليمون علاج لكثير من المشاكل والأمراض.
وفي يوتيوب الكثير من الفيديوهات اللي تتكلم عن هذا العلاج
هذي خلاصة تجربتي ... حبيت افيدكم بها يمكن حد يستفيد منها
واللي جرب فوايد الماي والليمون الصحية بدون آلام .. يفيدنا بها مشكوراً
أمنياتي لكم بموفور الصحة والعافية
روابط عديدة تتكلم عن فوائد الماي والليمون على اليوتيوب
http://www.youtube.com/results?search_query=%D8%B4%D8%B1%D8%A8+%D8%A7%D9% 84%D9%85%D8%A7%D8%A1+%D9%88%D8%A7%D9%84%D9%84%D9%8 A%D9%85%D9%88%D9%86