اللي حصل أمس في شارع الوعب .... مهزله واستهتار ؟؟

[قلم صادق]

السلام عليكم ..

امس وانا راجعه مع ولدي الساعه 11 الا ربع بالليل اشوف قدام محطه بترول الوعب بالضبط 4 اولاد من عمر 12 لين 14 تقريبا يلعبون كوره في وسط الشارع العام

ولين طفت الاشاره يرمون الكوره لين رصيف الشارع الثاني ويركضون في وسط الشارع يلعبون فيها ويستعرضون لدرجه ان بعض السيارات في الشارع الثاني يضربون

لهم هرن .. والخطر لو جا حد مسرع من شارع الخدمات دخل بسرعه لشارع الوعب بيدعمهم اكيد لانهم في وسط الشارع يلعبون ..... بصراحه أحتريت وتنرفزت من الاستهتار باعمارهم واعمار غيرهم من السائقين واتصلت على 999 ( للاسف ) .. لفينا لهم ووقفت عندهم وهاوشتهم وقلت لهم اللي يتحرك منكم يا ويله انا بلغت الدوريه وهي الحين جايه وانا صورتكم فيديو ( والفيديو موجود عندي وهم يلعبون في وسط الشارع ) ...

المهم يوم كلمت 999 رد على وقلت له الموضوع قال خليهم واقفين انا الحين ببعث دوريه .. وانطر عقب اشوي الا يتصل واحد ثاني ويقولي شالموضوع !!! وأعيد له الموضوع وقال نفس الشي الحين بطرش دوريه !!!! والعيال واقفين الا واحد اللي اكبرهم ضخم واسمه راشد ومبين عليه التمرد يعاند ويستعرض مره ثانيه بعد ما عرف اني بلغت عنهم يستعرض في وسط الشارع من غير ما يبالي ويروح للشارع الثاني ويرجع ومعاها الكوره لدرجه انه فيه سياره مرت جنبه وقعدت تضرب هرن له ورفيجه يصوت عليه ياراشد خلاص تعال وهو يسوي نفسه مب مهتم .., واتصل مره ثالثه للدوريه !!! ويقولي صكي التليفون الحين اكيد هم يتصلون عليج ... ومافي خبر ؟؟؟ لين العيال اللي كانوا خايفين وينتظرون الدوريه ردت لهم القوه وقاموا يركضون وقطعوا الشارع ووقفوا كروه وراحوا .

المهم مرت نص ساعه ولا حياه لمن تنادي ( لا دوريه ولا هم يحزنون ) وولدي يطنز يقول يمه يمكن صكوا مايدامون ..وقلت ييمكن يجون واعطيهم الفيديو بس !!! بعد هالنطره الا يتصل واحد ويقول اختي انا مريت خمس مرات وما في شي !!! قلت له سلامتك ما صار انا واقفه ومشغلين ليتات الخطر ومافي حد غيرنا الشارع فاضي والمكان واضح قدام بترول الوعب بالضبط ولا سياره دوريه مرت ...؟؟؟ ويقول ( لاحظوا ) المشكله انه العمليات توهم معطينا البلاغ بس ابي اعرف ايش الموضوع بالضبط ؟؟؟؟ قلت له توك تقول مار خمس مرات .. والعمليات توهم مبلغينكم يعني لو واحد ذابح شخص كان شرحه وخلص وانتوا ما ستلمتوا البلاغ .. ضحك وقعد يعتذر ويقول اسمحيلنا على التأخير .. قلت ايش الفايده اذا الواحد شاف الغلط وحب انه يصلحه بس للاسف مايلقى اي تجاوب من المفروض اللي هم يعدلون ويقومون الاغلاط وقلت له ترى ياخوي اليد الوحده ما تصفق ,, لو واحد دعم شخص منهم حطيتوا الغلط على اللي يسوق مب على ها لمستهترين بأعمارهم .. قال والله معاج حق

وانا واقفه ومعطله نفسي ومتأخره على بيتي لين الساعه 11 ونص .... بس للامانه كان جدا محترم ومؤدب ويعتذر بس ايش الفايده .

الخلاصه اني قلت لنفسي مالي دعوا بشي مره ثانيه . والحمدلله على كل حال

[aloosh]

هم اختي محد يجي الى لما تحدث كارثه بعدين يجون الرقابه غايبه في الشوارع معا الاسف

[راجي الْعفو]

وعليك و رحمة الله ..

يحبذ ان تكون الدوريات منتشره في أنحاء البلاد وتقسيم الأوقات في ذلك ، حتى تسهل عملية اتخاذ الإجراءات المناسبه ..

وجزاج الله خير على حرصج ..

مع التحية ..

[MAZEN37]

مع احترامي
مية رجال مر عليهم ما تصرف انا رأي انه تقدير هالامور يخص الرجال
الحريم يكبرون السالفه

[قلم صادق]

aloosh

للاسف معاك حق

[قلم صادق]

راجي الْعفو

والله ياخوي طول هالوقت ولا دوريه ولا شي مع انه شارع رئيسي وهام لازم تكون فيه دوريه رايحه وجايه .... وللاسف وانا واقفه اللي كرزر كله اسياخ يشكح الرصيف علشان يرجع الشارع يعني ماقدرت تنطر الاشاره تفتح .. غريبه

[قلم صادق]

مع احترامي
مية رجال مر عليهم ما تصرف انا رأي انه تقدير هالامور يخص الرجال
الحريم يكبرون السالفه

اي نعم مروا رجال بس لللاسف ولا واحد وقف وسأل .... واذا انت تعتقد اني كبرت بالسالفه على اي اساس تحكم الا اذا كنت تنظر للمرأه نظره دون المستوى .. والمرأه يا أخي لاتقل عن الرجل بشئ وللاسف في هذا الزمن اللي يكبر ويوسع في السالفه هو الرجل .....

والله يشهد انه كل اللي كتبته هو اللي صار بالضبط ....

بس للاسف انه في ناس لين الحين تفكر بهذا الاسلوب ..

[MirusS]

يعطيج العافيه

[(بوطلال)]

ياختي للاسف اهمال الشرطه زاد الفتره الاخير اول الشرطه منتشرين في الفرجان والشوارع واي بلاغ ماياخذ دقايق الا هم واصلين عندج الحين للاسف اهماااااال بكل معنى الكلمه .

بخصوص هالنوعيه من لعيال الشرهه على اهليهم الي للاسف هادينهم في الشوارع ولايدرون عنهم الام مشغوله بكلام فاضي والاب اكيد في الحسا دام الموضوع امس .

[Rosy]

نفس اللي صار مع اهلي بنفس المكان , بس الاهل شافوهم الاسبوع اللي راح تقريبا . كانو يركضون بين السياير وهي تحرك