لك مني راس المال و عطني شغل ..!>>> (تفضل موضوع نقاش و مشوره)

[jealous]

السلام عليكم ورحمة الله وبركاته

قال رسول الله صلى الله عليه وسلم " تسع اعشار الرزق في التجاره" او كم قال رسولنا الكريم.

مالكم في الطويله...

ابي مشورتكم ورايكم في افكار تجاريه سلسه ولاتحتاج الا سجل و محل وامور معقده, وفيها سهوله لاستعادة راس المال عند الحاجه..! ( انا شعرت وكانه لغز)

اعتقد اهل التجاره والسوق فاهمين مرادي.

عندي مبلغ 1,500,000 الف ريال ناوي احركه و مطلوب شخص ربي رازقه رجاحة عقل و فكر ويخاف الله يشغل المبلغ ويناصفني فالربح.

(في امكانيه لمضاعفة راس المال)

ارجوا يكون فيه نقاش وافكار في الموضوع واللي حاب يشتغل معاي يراسلني عالخاص.

فالي وفالكم التوفيق.

[captin]

مرحبا أخوي

أولا الله يوفقك ويسهل لك طريق الرزق الحلال دامك نويت التوكل على الله في طلب الرزق

بالنسبة للأنشطة اللي ما تبي فيها عوار راس مكتب او محل وموظفين وعمال واجراءات ومستندات
واقامات ومراكض للجوازات وادارة العمل ومشاكل عمال من شكاوي وهروب وسكر
وغيرها من امور ما يعرفها الا اللي في السوق .

عندك الشغل في العقار تشتري ارض في مكان ما وتبني عليها وتبيعها ومن بيعتها راح تستفيد اقل شي مبلغ 200 الف ريال
او أكثر في بعض المناطق او اذا ما تقتدر تشتري وتبني تشتري ارض وتخليها واذا صار ارتفاع في سعر العقار بمقدار مثلا 20 ريال للقدم تقدر
تبيعها وتيود فلوسها حق شروة ثانية .

بعض الشباب من هواة السيارات شغالين على البيع والشراء في السيارات والارقام خلال المواسم مع دخول الشتا يزيد الطلب على انواع من السيارات
او البعض اذا هاوي البحر يشتغل على الطرادات يشتري في الشتار تكون الطرادات رخيصة وشهر ابريل لما يبتدي موسم البحر يبيع يربح له مبلغ ما يقل عن 15 الف


من الامور المفيدة ايضا الشغل في الوساطة العقارية اذا كنت راعي علاقات وتروح مجالس كل اللي عليك انك تطلب عقارات من اصحابها وتاخذ بياناتها
وتمر تعرضها على الاشخاص المهتمين وهذا يتطلب اتصال وتواصل مع الطرفين طول اليوم في ناس تبي عقارات في مناطق معينة ويفترض يكون عندك معرفة
باسعار العقارات في كل المناطق ومتابع الاسعار .

ومن الامور اللي انصحك فيها مر على بنك قطر للتنمية وشوف احد من الشباب القطريين اللي ما سكين تمويل المشاريع للشباب القطري واساله
عن المشاريع اللي ممكن يمولها البنك وطبيعتها عشان تكون عندك دائرة موسعة من الافكار وبعدها تقرر اللي يناسبك .

موفق ان شاء الله

[jealous]

الله يجزاك خير وكلامك ذهب،بس اغلب المواضيع اللي ذكرتها تحتاج جهد وحركه وانا إنسان مشغول جدا وما عندي وقت أدير العمل.

الآخوان اللي راسلوني عالخاص أتمنى تنحط المواضيع في هالموضوع لتعم الفائده.

[H H]

ههههههههههههههههههههه مدري ليه اذا احد حط مثل هالمواضيع الكل يروحله خاص بدال مايجون ويدلون بدلوهم هنا!

عموماً , المبلغ الي معك جيد لكن انصحك بدال ماتعطيها احد يشغلها لك انك تتعلم بها اي نوع من انواع التجاره وبما انك ماتبي شغله فيها جهد وحركه
انصحك بسوق الاسهم (كإستثمار), حاول انك تخلي احد يدرسلك الشركات المدرجه فالسوق وافضل الفرص الاستثماريه فالشركات الي نموها عالي وتوزيعها مُجزي
وانصحك تستشير اكثر من محلل اساسي (هنا او من برا المنتدى) للوصول فالنهايه لافضل الخيارات , وتاخذ من هالخيارات افضل اثنين وتقول لهالمحلل يعطيك العافيه
وتجي هنا للشباب في قسم التحليل الفني وتسالهم عن افضل وقت وسعر لشراء السهم الفلاني كاستثمار وبيدلونك وباذن الله خلال فتره بسيطه بتلقى نفسك محقق ربح مُجزي
وفنفس الوقت تعلمت شوي عن اسواق المال وطرق الاستثمار فيها وخصوصا انها تناسبك كشخص مشغول ومايبي شي فيه مجهود وحركه ومتابعة


الله يوفقك

[تبوك]

شوف أخوي أنا مستعد أخل معاك ياصاحب الموضوع النص بالنص براس المال
بشرط التعب والجهد هم يكون النص بالنص ، اللي راح نفتحة ياطويل العمل مايكلف كل هالمبلغ اللي أنت ذكرته
بالكثير 700 الف ريال انت 350 و أنا 350 , كل اللي بنحتاجة مكتب بمكان زين وأجارة معقود مايتجاوز 10 آلاف بالشهر
ومصري براتب 4000 بالكثير وفراش ب1500 ، يعني عندك مصاريف ثابته 15 إلى 17 الف بالشهر
يعني مصاريف سنه كاملة 200 الف ريال تقريباً ، تبقى عندنا 500 ألف ريال لضمانات الإستيراد
المكتب عبارة عن وسيط لإستراد البضايع بكل انواعها
كل اللي عليك يكون عندك ناس ثقة في البلادين اللي بستورد منها البضاعة ، مثلاً في ناس واجد عندك تبي تستورد مواتر من أمريكا
لكن خايف يرسل فلوسة للديله وطارت فلوسك ياحسين هههههه
المرسيديس ال اس 500 عندنا ينباع حول ال600 الف ريال
وبمريكا من الشركة ب330 الف ريال حط عليه جمرك وشحن ورسوم يوصل السعر تقريباً
370 الف ريال ، تبيعه أنت ب400 ، 30 الف صافي مربح لك
طبعاً أحنى دور مكتبنا وسيط بس يعني قيمة السيارة 400 ، يسلمنا صاحب الطلبية 200 الف مقدم
وياخذ وصل و 200 الف بعد التسليم ، أحنى نرسل لفلوس كاملة والمندوب يخلص الاوراق الجمركية وتسجيل السيارة وأستلامها من الميناء
عجبته السيارة صاحب الطلبية يدفع باقي لفلوس وياخذ سيارته ويكون ربحنا 30 الف ، يعني من طلبية وحدة بس غطيت مصاريف شهرين
ماعجبته راح يسترجع نص العربون 100 الف ريال بس وهو بيكون الربحان ، لانه لوطلب السيارة من ديلر في امريكا وماعجبته
طارت ال400 الف مايرجعله منها شي ، لكن هنا خسر 100 الف بس ، وبتطلع علينا السيارة ب270 الف يابلاش لوتعرضها الف من بشتريها منك
وعندك المفروشات الرخام المعدات الثقيلة والتريلات

وشوف ان مبلغ 200 الف مصاريف على سنه تتقسم على اثنين تستاهل المجازفة ، بس الصراحة ما اعرف شلون اجراءات استخراج رخصة استيراد وتصدير
في بلديتنا

طبعاً ديلر ثقة من أمريكا ولندن و الصين عندي جاهزين
توهم الشباب طالبين فوج سوبرجارج مواصفات الخليج واصل لين البيت وبضمان سنتين من الفردان ب450 الف
أرخص من الشركة ب100 الف تقريباً
طبعاً المرسيدسات والبي أم تفرق معاك أكثر

[captin]

الله يجزاك خير وكلامك ذهب،بس اغلب المواضيع اللي ذكرتها تحتاج جهد وحركه وانا إنسان مشغول جدا وما عندي وقت أدير العمل.

الآخوان اللي راسلوني عالخاص أتمنى تنحط المواضيع في هالموضوع لتعم الفائده.

في هاذي الحالة اخوي ما لك الا الأنشطة العقارية وانشطة الاسهم والسندات

الانشطة العقارية انك تشتري ارض وتبنيها وتأجر وتنتفع بالعائد من الايجار يمكن في السنة تحتاج تسوي
صيانة للعقار او اذا كانت أرض وارتفع سعرها تبيعها وتستفيد من الربح .
بس هالايام لاتشتري عقار تريث العقارات في هبوط وبيكون هبوط ملحوظ خلال الستة اشهر القادمة


اما بالنسبة للأسهم والسندات فهي استثمارات ورقية الاسهم أكثر مخاطرة من السندات
مثل ما تشوف احوال البورصة عندنا تشتري سهم بسعر 60 ريال وثاني يوم تلقاه بسعر 40 تخسر 20 ريال
خلال اسبوع.

السندات الحكومية أكثر ضمانا لأن السندات تكون بضمان الدولة

اذا كنت تبي عائد يتراوح بين 4 و 6 % في السندات الحكومية مر على مصرف قطر الاسلامي واسألهم عن السندات الحكومية
و أسأل بالتحديد عن السندات التابعة لحكومة أبوظبي لأن عائدها أكبر من أي سندات .

بالتوفيق أخوي .

[jealous]

h h و تبوك و aptin
مشكورين عالمشاركه الطيبه

ان شاء الله اليوم بمر على المصرف وبشوف موضوع السندات وايضا بستفسر عن الزكاه اذا كانت يستوجب اخراجها او لا لان نسبة الزكاه 2.5 % واربحاح السندات كما تفضلت 4-6 بالميه ناقص الزكاه يعني يابو زيد كانك ماغزيت

وبخصوص الاسهم لي تجارب فيها كثيره وللاسف باتت بالفشل وحلفت اني ما ارجع لها الا اذا كان اكتتاب حلال %100.

وبالنسبه لموضوع الاستيراد فكره ناجحه و ونقدر نبلش بدون مكتب كبدايه نجيب سيارات لنا ونعرضها للبيع اذا حاب تواصل معاي عالخاص.

اللي عنده افكار بعد يطرحها للنقاش.. الموضوع شيق دام فيه سوالف بهانس ههههههه

[قمة]

السلام عليكم

كل مشروع ينفع ... وبما أن السوق القطري في اتساع وتطور مستمر فأنا أقترح - من حيث إلمامي بالموضوع - إنشاء شركة تعمل بمجال تكنولوجيا المعلومات وتقديم حلول للمكاتب تتمثل بخدمات تسويقية وحلول تقنية ومكتبية ..

من خلال هذه الخطوة سيكون من السهولة بإذن الله تأسيس وإعداد أي مشروع مستقبلي آخر ..

المبلغ المعروض ما شاء الله كبير جداً ويمكنك به عمل مجموعة شركات ..

المشروع الذي أقترحه عليك تكلفة تأسيسه وتشغيله بسيطة نسبياً لأن الأساس هو تقديم خدمات وإقامة علاقات ..

رأس المال المطلوب (للتأسيس والتشغيل) 350,000 ر.ق

عدد الموظفين = 4 أشخاص .... (يتم اختيارهم بعناية وحسب التوصيف الوظيفي لكل وظيفة)

لدي دراسة عن المشروع ،،، وأنا في الحقيقة أبحث حاليا عن:
- كفيل (بالاسم فقط)
- أو شريك جاد (بالاسم والتمويل والعمل)


هذا ما لدي وأنا على استعداد للنقاش والتواصل

وبالتوفيق للجميع

[jealous]

اخوي قمه أشكرك عالمشاركه الطيب
ارسلي رقمك عالخاص

[بنت المدينا]

^^^^^^^^^

اخوي الخااص عندك ممتلئ مايستقبل رسايل