إختلاف المستوى التعليمي بين الزوج و الزوجة ( للنقاش ) ..

[بصمة قطرية]

السلام عليكم

عادي جدا لو في حب واحترام متبادل .,

الشهاده بس في السي في .,

وانا اقولج المثقف والواعي اهم من الجامعي اللي ما يدري وين الله قاطه .,

وشخصيا نعم اقبل يكون اقل او اعلي مني ., لان واثقه من طريقه تفكيري ., ومتاكده اني اقدر اغيره للي ابيه .,

ويسلموو

و عليكم السلام و الرحمة ..

بالنسبة للحب و الإحترام صعب نتكلم عنه
لأن الموضوع ما يتكلم عن بعد الزواج
الحب و الإحترام و المودة و الإلفة هالأشياء تجي بعد الزواج

وجهة نظرج أشوفها سليمة
لأني مقتنعه بأن الرجل بأخلاقه مش بشهادته ..
و الواقع أثبت هالشي ..

في نسوان غيروا من أزواجهم و شجعوهم
كملوا تعليمهم و أنا شخصياً عندي مثال ..
زوجة أخوي حاصلة على الماجستير و زوجها كان إعدادي بس
شجعته كمل الثانوية و إن شاءالله الله يوفقه و يكمل جامعة ..

نورتي عزيزتي ..

[بصمة قطرية]

اعرف ناس الله يستر عليهم عندنا في الفريج

الرجال عنده اعدادية ( طبعا من كم سنة هالسالفة ) وزوجته دكتورة اكاديمية

كانت تصارخ عليه لدرجة تحرجه امام خواتها واهلها وتنعتها بكل انواع الاهانات الشخصية ... مشكلته ان شخصيته ضعيفه من الاساس

المهم بعد فترة شافته يتغير بطريقة غريبة لين ما صعقها وتزوج عليها واهانها وجاب زوجنه وسكنها عندها ....

رجولة في غير محلها وضعف في غير محله من الاساس

طبعا هذا موقف شخصي ولا يعمم

ضعف شخصية مثل ما قالت ..
و أكيد في حالات ثانية يكون فيها الرجال ضعيف شخصية
يخلي المرة تستقوي عليه ..
( الخيل من خيالها )

حياك الله أخوي ..

[بصمة قطرية]

فالمعادلة التعليمية مهمة خاصة هالايام في ظل المتغيرات التكنولوجية والانفساخ العام ..... قصدي الانفتاح

اما قبل فالنفوس كانت طيبة

يعني الزمن تغير وتغيرت القلوب ..!!

[بصمة قطرية]

نبي الله امي
واغلب من حوله يقروون


اعتقد لا يوجد اي دخل بتاتا

فالزوجه صاحبة الابتدائيه نفس تفكير الزوجه الدكتوره


فطرة الله واحده


الاساس هو الموده والرحمه وطاعة الزوج

بما امر الله

ويكون انجح زواج باذن الله ان تحققت هذه الشروط

عليه الصلاة و السلام ..
صحيح كتارا ..
المودة و الرحمة و طاعة الزوج بعد الزواج ..
قبل الرواج في فترة الخطبة
المهم النظر لأخلاق المتقدم قبل شهاداته ..
و هاي اللي يخلي الزواج ناجح ..
البعض يعتبر الشهادة عائق ..!!
و يشوف إن المهم يكون من نفس مستواي مش أقل ..
و الشهادة عمرها ما تجيب السعادة ..

حياك الله كتارا ..

[بصمة قطرية]

انا باقولكم من منظوري كا رجل يجب ان تكون المراءه متعلمه وكل ما كانت متعلمه كل ما كانت افضل

وجهة نظر أحترمها أخوي
و من حقك تختار الزوجة اللي تناسب فكرك ..
حياك الله ..

[بصمة قطرية]

صباح النور ..

عائق لشنو بالضبط ؟!!

قبل كان الرجال يقول مافي حوار

بيني وبين زوجتي لان زوجته مش متعلمه

والاخ فيلسوف زمانه ..

هالايام مع التلفونات الذكيه من مايعرف

اي شي في اي مكان عن كل شي ؟!!

الكل يفتي ويتكلم في كل المواضيع

تبي حوار تحاور انت وياها ابيض

وذهبي ولا ازرق واسود ..


المهم المره تقرا وتكتب عشان

تدرس عيالها ..

اكثر من جيه بذخ ..

واقل من جيه عذر حق الزوجه

الثانيه ..

مساء الخير ..
عائق للتفكير ..
بس إنت وضحت الفكرة
خلاص وصلت الفكرة ..
و كلامك صحيح
و الدليل شوف عقول الأطفال الحين
ما في شي ما يعرفونه
عكس طفولتنا البريئة ..

حياك الله همر ..

[بصمة قطرية]

جزاكي الله خيررر يالشيخه

انا ضد هالمقوله

الرجال يعيبه كل شي

مب فقط جيبه

اخلاقه
وتربيته
وشخصيته


وبخصوص الموضوع
خلاص الحين اغلب الناس يعرفون يدرسون عيالهم حتى لو ماعندهم شهادات

امي الله يحفظها لي شهادتها ابتدائي
وماشاءالله عليها درستنا كلنا فالبيت
وبعض الاحيان نجيب مدرسيين

لين ولله الحمد الحين تدرس عيالي وتعلمهم

الله يطول ف عمرها وعمر امهاتكم

وابوي الله يرحمه كان يحفظنا القرأن ويعلمنا امور الدين وامور اخرى
رغم هو كفيف البصر
من عمره 18 صار اعمى فديته
الله يرحمه ويغفرله ويرحم جميع موتى المسلمين يارب

تحياتي لج ع الموضوع الطيب اختي الكريمه

الله يرحم الوالد
و يطول بعمر الوالدة و يعطيها الصحة و العافية
ما شاءالله عليها ..
صدقت بومحمد
المهم الشخص يقرا و يكتب يعرف يدرس ..
يا ما خريجين عمرهم ما درسوا عيالهم ..!!
الشهادة عمرها ما كنت عائق ..
العائق هو التفكير
الدين و الأخلاق مطلوبة قبل كل شي طبعاً ..

حياك الله بومحمد ..

[بصمة قطرية]

خل اطرح وجهة نظري من كل الزوايا


مش مع ولا ضد لحالات

في شباب تخرجوا من الثانويه العامه واشتغلوا وخذو دورات وهم يشتغلون بس ماكلمو بكالوريس ( بعضهم ودهم يكملون وبعضهم ظروفهم عيت وفي بعضهم مب حول التعليم كلش)
مانقدر نحكم على شخصية هالشاب الا من العشره معاه ( هل معناته بس الثانويه الي مانقدر نحكم عليه؟) لا طبعا لان حتى الجامعي مهما وصل بشهاداته يمكن يكون شهاده على ورق والا المخ فاضي

انا ضد الريال الي يرضى بالامر الواقع ويقول راح علي الزمن وما قدر اكمل وخل اشوف عيالي
لان هو قدوة عياله وعياله نادر واحد فيهم يمكن يتعدى ابوه
لازم يكون طموح يفكر ف المستقبل التعليم مايعرف سن متى ما الواحد يبي يكمل ياخذ بكالوريس حتى لو عمره اربعين خل ياخذ
يبي ماستر وعمره خمسين؟ شعاد خله ياخذها
لكن ما يفكر ان خلاص هذي نهاية طريقه التعليمي

بالنسبة لعشرتهم او الموافقه على الارتباط فيهم

ياما جامعي او دكتور ماكان أُهل انه يضم بيته او انه يشجع مرته على التعليم في نفس الوقت ياما شاب بشهادة ثانويه وقف مع زوجته وخلاها تكمل لحد ما وصلت دكتوره
ولنا ف بعض سيدات المجتمع القطري خير مثال
لكن العيب مرات ما يكون ف الرجل مرات اتكون المره نفسها ما تستاهل واحد يشجعها
لان عادي يجي واحد ثانويه عامه راح مع مرته كم سنه برا تغرب عن هله عشان هي تبي تكمل ويوم رجعت قالتله خلاص طلقني مابيك
يعني هو مجرد اداه وهني مانقدر نعمم على مجتمع لانهم حالات شاذه مريضه

كم من وحده تزوجت واحد اعداديه شهادته وهي الي ساعدته ووقفت معاه وخلته يكمل والحين عنده ماستر وف اعلى المناصب يشتغل
كم من وحده وقفت مع زوجها ف عثراته وحتى التدريس درسته لانها ماترضى تكون هي جامعيه وهو ثانويه عامه

مستحيل نحكم على شخصية رجل من تعلميه ( ولو ان التعليم والثقافه تهذب السلوك والاسلوب ف معظم الاحيان)
لكن مرات يكون الشخص ماقدر يكمل الجامعه بس رجل والنعم فيه وف اخلاقه وتربيته


وشكرا

مشاركتج ممتازة جنون
نظرتي للموضوع نظرة شمولية ..
نورتي حبيبتي ،،

[بصمة قطرية]

الاختلاف الكبير في المستوى التعليمي بين الزوجين عموماً ممكن يسبب فجوة بين الزوجين ..

وأنا اتكلم عن فارق كبيييير مثلاً الزوج عنده ماستر أو دكتوراه والزوجة أمية !


لكن أيضاً في المقابل هناك عوامل أخرى تدخل في الموضوع منها طبيعة تفكير كل طرف ..

وطبيعة شخصيته .. هل هو من النوع المنفتح فكرياً ؟

هل هو من النوع اللي يمتلك رؤية مميزة للأمور .. ويرى ويحلل ما وراء الظاهر من الأشياء ؟

هل هو من النوع المرن في النقاش والحوار ؟

أحياناً هذه الصفات تتوفر في شخص تعليمه عادي جداً .. وتمكنه من ردم الفجوة والهوة بينه وبين الطرف الآخر ..

والعكس صحيح .. كثيراً ما صادفنا من المتعلمين حاملي الشهادات جهلاً فكرياً .. وضحالة في الرؤية للأمور وقلة ثقافة وووعي !


وأحياناً أخرى يكون الفارق الكبير في التعليم بالفعل دالاً على قلة الوعي ويلعب دوراً في تصعيب لغة الحوار بين الزوجين ..

والحوار المقصود ليس مجرد الحديث العادي .. أو القدرة على تدريس الأبناء مثل ما قال همر ..

لكن الحوار المقصود هو الحوار الذي يمتلك آليه لخلق أرضية مشتركة بين الزوجين في كل شؤون حياتهم ..


لذا باختصار .. أرى أن الفارق التعليمي الكبير بين الأزواج في العموم نعم من الممكن أن يخلق هوة بينهما ..

ولكن يجب أن نأخذ في الاعتبار عوامل شخصية وفكرية أخرى .. تلعب دوراً مهماً في حدوث التقارب والانسجام بين الزوجين


شكراً بصمة على الموضوع

العفو حبيبتي نور ..
عجبني ردج و تحليلج للأمر ..
يعني في الأخير نتفق على أن تفكير الشخص
ما تصنعه شهادة ..

نورتي حبيبتي ..

[بنت شرق]

الوالد والوالده غير متعلمين وما فرقت معاهم ،،،وهالايام على حسب الشخصية الشخص العادي وتطلعاته وحسن عشرته ومتطلباته ،،،المشكلة انه الرجل تتغير تطلعاته
لنوعية المره الي يبيها بعد المنصب والفلوس ،،، مايبيها الراكزه العاقلة الي مجابله عيالها وبيتها ،،،يبي يأخذ الي بخاطره
وبصراحه عدم التكافؤ يصب لصالح المرأة اذا كان زوجها اقل تعليما او شخصية او منصب
ومرات يصير ضدها فقط اذا طلعت عينه وهزئته ،،، ينتهز الفرصة لينتقم ،،،لكرامته