اتحف باللي موقفه دايمن كاش

وسلم على باقي العرب وانت ماشي

كلن على ما يسر الرب معتاش

وانا مثل غيري على الله معاشي

الصاحب اللي ماخذ الطيب من لاش

هذا سبب صبري وسر انتعاشي

عين له الحاف و عين له فراش

بيني وبينه انسجام و تماشي

فعلن جميل و وجه أبيض من الشاش

والله كريم و بارق الخير ناشي

ومن لا يحوش الطيب يا عنك ما حاش

لدوه عديمين الضماير طناشي

و ما دام لك من يلحق العلم لشاش

صم المتون و خل عنك الحواشي

و من جا على لاشي يرجع على ماش

ماذكر في روس الضبا له عراشي

والمجهمه ماهي من وضح الادباش

والمرجله ماهي بمرشي وراشي

ومن باعنا بشوي بعناه ببلاش

اما نصير اخوان ولا بلاشي

ومن لايقدر عشرة العمر لا عاش

حلمن تبدد في مخدة افراشي

عناية الدكتور واجهزة الانعاش

ما فادت اللي باع دمه بلاشي

لولا العدل ما قام في دار الاحباش

ما لاذو اصحاب النبي في النجاشي

لولا الحسد والناس وابليس يعتاش

ما طار باسرار المحبين واشي

راحت علاقات العرب طاش ماطاش

بعض الاوادم مثل بعض المواشي

يا مدعي صدق الغلا وانت غشاش

لا تنتقد مشي الجمل وانت حاشي

يوم الكلام المختصر يبري الجاش

ابديت ما كنيت في وسط جاشي