السياحة في تايلند

[اشراقة الشمس]

السلام عليكم
أخواني أخواتي أعضاء المنتدى
عندنا اجازة و نبغى نطلع رحلة عائلية و في معنا عيال صغار تنصحونا في تايلند ؟ هل هي مناسبة للعوائل ؟ و نبغى أماكن تكون ملتزمة نوعا ما ،ما نبي معابد بوذا و لا نبي أماكن فيها تعري ؟ وإذا تايلند لا شو تنصحونا بغيرها مثلا المالديف أو اندونيسيا ؟و جزاكم الله خيرا

[لـبـيـه]

مع العيال انصح بماليزيا وبدون منافس بلنسبه لشرق اسيا

تايلند حلوه لاكن للتشري لاكن ماليزيا احلى للسياحه

[لـبـيـه]

توني راد من تايلند من اسبوعين اذا قررتي وتبين ا استفسار انا حاضر

[للصبر اخر]

لو ميزانيتك زيينه انصحك سنغافورا والسكن بسنتوزا
افضل من ماليزيا وتايلاند
او السكن في بوكيت التايلانديه او بيننج الماليزيه

[سعود.]

سفرة عائلية ( ماليزيا ) افضل دولة اسلاميه

[(عبدالله)]

تايلند لها طعم
وماليزيا لها طعم
وسنغافورة لها طعم


أنا رحت تايلند في شهر ابريل2015 لمدة أسبوعين مع العيال وكان البرنامج كالتالي:

بوكيت ( 4 ليالي): سياحة شواطئ
تشيانغ ماي (3 ليالي): سياحة غابات وسفاري
وبانكوك (5 ليالي): تسوق وفحص شامل في مستشفى بانكوك الملكي- لو رجع بي الزمن ما تميت أكثر من يومين لأن بانكوك كئيبة

الطيران: الرحلات الدولية ع القطرية الذهاب (الدوحة-بوكيت) والعودة (بانكوك-الدوحة)
أما الرحلات الداخلية كانت (بوكيت-تشيانق ماي) و (تشيانق ماي-بانكوك)

دائماً من المطار إلى الفندق خذوا من كاونتر التاكسي أول ما تطلعون من المطار بسعر ثابت ولا تخلون حد يقص عليكم من المكاتب داخل المطار أو أي كداد

بوكيت:
سكنت في منطقة باتونق بيتش في منتجع أماري.. المنتجع ممتاز من حيث الأمان وبعده عن الضجيج وتوفر المرافق فيها من برك سباحة وشاطئ خاص ومكان للأطفال مع جليسة خاصة بهم وأصناف أكل حلال. بالإضافة إلى ان خارج الفندق مسافة مشي 5 دقايق توصلون الشاطئ وفي محلات متنوعة وغسيل ملابس بالكيلو (عشان تعملون حسابكم ما تشيلون وايد ملابس لليهال خاصة الكيلو ب50-60 بات استلام بعد 24 ساعة) وفي اشهر مول (جانقسيلون) هناك مسافة 5 دقايق بالتوك توك التوصيلة ب200 بات فيه مطاعم ومحلات ويتحق الزيارة وبرع الملول في مطاعم عربية وحلال.
الرحلات الشاطئية متنوعة مثل بي بي ايلاند وجزيرة جيمس بوند ..إلخ
الرحلات ممكن تنسقونها مع أي كشك تنظيم رحلات أنا تعاملت مع العجوز (ما أذكر اسمها) كشكها يبعد 200 متر عن جانقسيلون أفضل الأسعار وأرتب الرحلات.

تشيانق ماي
سكنت في منطقة نايت بازار فندق 5 نجوم المطاعم العربية حولي
والرحلات كانت محمية النمور ومحمية الفيلة ومدرسة القرود وأماكن ثانية نسيتها

بانكوك
مدينة ألعاب نسيت اسمها
مستشفى بانكوك الملكي للفحص
التسوق في باراقون و محلات تسوق متعددة معروفة
والاكل اخذ سفري من شارع العرب ولا اودي الاهل هناك .. أشهر مطعم مطعم بودبة


والله يوفقكم

[بومتعب]

عن تجربة شخصية بعد زيارة كل من هونغ كونغ وماليزيا وسانغافورة وبانكوك

استطيع ان ارتب هذه الاماكن من الافضل ثم الاسواء

1- سانغافورة
2- هونغ كونغ
3- ماليزيا
4- بانكوك

مع ملاحظة اذا كنت متعود على نظام ونظافة مثل اوروبا ... فرايح تجد بانكوك زبالة ... رطوبة ... ووساخة .... وريحة زهيوية ... خاصة في المناطق والاحياء الشعبية .... هذا بالنسبة للسياحة ....

[Dana’1]

كل ديره لها طابعها الخاص
من ناحية النظافه والرقي سنغافورة ماليزيا تايلاند

شوف تايلاند بانكوك زيينه مو بطاله أبدا ورخيييصه أهم شي لا تطب شارع نانا ( المشهور بشارع العـرب) للأسف على اسمه من أقذر وواوسخ ما رأيت في تايلاند طبيته مره او مرتين بالكثيير ولا عاد عدتها الا بالمرور بالتكسي اجباري!

عالم سفاري
كلـها حيوانات وعروض يعطونك جدول بالعروض بالساعات تمر عليها وحده وحده
عرض الدلفين عرض فيله عرض القرود عرض فقمه وعرض نجوم الحرب وعرض هوليوود
يبغالها مشي بس^_^

دريم وورلد
ملاهي ومطاعم وحديقة فيها المعالم المشهوره بالعالم
العابهم عاديه اذا الاطفال كبار12سنه كذا اما دون بتكون اوك

السوق العايم ما اقولك نظيف بس ممكن ينبسطون لان راح يركبون الفيله يلعبون مع النمور ويصورون معهم

مجمع mbk تسوق ومطاعم والعاب بس الكترونيه وفيها لعبه وحده مرعبه شوي تفس فكره فيلم ساو
وفيها بعد بليارد وبولينج ويسوون خوش شوربة توم يوم ^_^هذا إذا سكر كل شي وماعندك شي وحاب تتسلى فيها لان بالويكند هي الوحيده تطول
والمنطقة حول هالمول كلها مولات واسواق خارجيه زينه

وفيه أسياتوك وهو سوق ليلي يفتح بس بالليل بس نظيف ويم نهر وفيه زي عين لندن ومطاعم
http://www.thaiasiatique.com/index.php/en


وفيه طبعا الجزر سواء تروح لها بالطياره مثل بوكيت وساموي للي عندهم وقت وحابين يستخدمون التنقل الداخلي أو بالسياره عن طريق بتايا عشان جزيره كولان تروحون لبتايا بدري تاخذ ليلتين او ثلاث بالكثثير في بتايا والافضل فندق هيلتون عشان ماتضطر تطلع بالشارع لان الفندق له مدخل على مول كبير فيه كل شي
وطبعا تطلع من الفندق عالميناء وتاخذ تكت عشان تروح للجزيره تبعد تقريبا40-45 بالعباره الحكوميه العاديه وتاخذ اقل وقت بالعباره السريعه
من الصبح وتردون قبل المغرب مافيها الا السبحه بالبحر والالعاب البحريه زي البانانا وكذا
فيها مبيت بس أنا اشوف صد رد واجد عليها^_^


وبانكوك فندق الانتركونتننتال زين



ومثل ماقالت الاخت للصبر أخر إذا الميزانيه أوك سنغافورة حلوه وراقيه تلق وسنتوزا حلوه

[Mubarak7]

شوف تايلاند بانكوك زيينه مو بطاله أبدا ورخيييصه أهم شي لا تطب شارع نانا ( المشهور بشارع العـرب) للأسف على اسمه من أقذر وواوسخ ما رأيت في تايلاند طبيته مره او مرتين بالكثيير ولا عاد عدتها الا بالمرور بالتكسي اجباري!

زعلاتني جدا هل كلمة مع الاسف بكل دولة لزم هل الاسم يرتبط باماكن قذرة
-----
كل شرق اسيا حلو بس بنسبه لي سنغافورة و ماليزيا اجمل الخيارات كرحلة عائلية ان شاء الله يفيدونك اكثر عن تايلند
ا

[Al-Kuwari]

مارحت تايلند

رحت ماليزيا وسنغافورا والمالديف

سنغافورا شي خيالي بلد نظيف ومرتب بلد اوروبي اللهم رطوبة

انصح بسنغافورا وبقوة ومثل ماذكرت احدى الاخوات فوق اسكنوا في سنتوزا ولاتفوتون يونفيرسال ستوديو

انا سكنت بمارينا باي فندق حلو وفخم لكن ما انصح فيه زحمه على طول
وبسنتوزا سكنت في فندق كابيلا , افضل فندق سكنت فيه فحياتي خدمة سبع نجوم , قبل ماتطلب الشي يجيك شلون ماتدري ولو طلبت اي شي يلبونك لك بدون نقاش
لدرجة اخر يوم لي طيارتي سبع بالليل فقلت اذا في مجال اخذ ليت شيك اوت يعني عال2 او 3 , سألني الموظف متى طيارتك قلت له سبع بالليل , قالي بخليك لين خمس المغرب قبل رحلتك بساعتين اوك ؟ قلت له تمام ومادفعني ريال واحد زيادة

انصح بالفندق كابيلا وبقوة


بخصوص ماليزيا فهي حلوة بس مقارنة بسنغافورة جداً عادية
المالديف ما انصح ابداً كعوايل كل شي غالي واليهال يمكن يتمللون لان الانشطة قليلة

تروحون وترجعون بالسلامة