السلام عليكم
من فترة كتبت عن إدارة البريد وعن اللخبطة اللي تصير بين موظفي الفرز والتوزيع بوضع رسائل وطرود بالغلط بصناديق أخرى والأدهى في حال أن يكون الطرد بالبريد العادي يعني شخص ما عنده أمانة ياخذه ويمشي طالما الإستلام بدون أي توقيع بعلم الوصول !
وطبعاً صارت لي أكثر من قصة قبل باستلامي بريد وطرود لغيري والعكس والحمد لله رجعت لي أغراضي ورجعت لهم أغراضهم بأمانة الأشخاص ومجهودهم الشخصي بتوصيلها لي .. وكله هذا بدون علم البريد بأنهم تسببوا بخطأ وأتعبوا مشتريكهم ..
المهم ..
اليوم حاولت أفتح صندوقي .. ما رضى يفتح ..مرة مرتين المهم ..أسمع الصوت وأذهب للصندوق ألاقيه مغلق.. تتبعت الصوت لقيت الصندوق اللي يفتح صندوق ثاني برقم مختلف ! والرسائل اللي فيه بإسم وحدة .. المهم بعد عدة محاولات ..ذهبت للموظف التابع لقاريء صندوقي .. غير موجود ..وبعد فترة ضربت جرس الإستدعاء ..وجاني واحد آسيوي قاعد يمضغ وياكل وايده متسخة ما قدر يمسك كرتي .. وقال لي راجع قسم المشتركين وقال لي ان المشكلة شكوا منها الكثير ..رحت قسم المشتركين ..أيضاً استغرب وقال لي روح عند صندوقك بيجيك مهندس بخمس دقايق بس .. وبالفعل جاني مهندس فلبيني كل اللي سواه أخذني مرة ثانية عند الشخص وخلاه يعطيني ورقة لاستلام بريدي .
سألت المهندس : طيب وبعدين ؟ ليش ما تصلح الخلل ؟ قال لي بكرا ان شاء الله بيصير أوكي . طيب أنا صندوقي مليان رسائل وطرورد واشعارات .. لو غيري فتح الصندوق اليوم واخذها أو بكرا وصلني شي واخده غيري .. من المسؤول ؟
قلت خلني أكتب شكوى واضعها بصندوق الشكاوي .. رحت لقيت صندوق الشكاوي مسكرين فتحته باحكام بلاصق يعني مافي مجال تحط فيه ورقة !
يا إدارة البريد معقولة مافي منكم شخص يدخل المنتدى أوتوصله هالشكاوي ؟!
تحياتي