هل العسو ينفع في هالزمن

[bohilal191]

السلام عليكم

اشرايكم في هالمقولة

[<اضرب واشرد>]

السلام عليكم

الضرب مايكون إلا في مراحل متأخرة
أولا التربية ثم التربية ، تكرار التعليم والنصح والقدوة
إذا مافادت .. نستعمل الشدة والغضب ، ثم الضرب غير المبرح

وهذا ماعلمنا إياه النبي عليه الصلاة والسلام في حديث الصلاة:
(مروهم بالصلاة لسبع ، واضربوهم عليها لعشر ..)

من يضرب ويزجر الأطفال دوما وأبدا وعلى أتفه الأمور، ماعنده حكمة ولافيه رحمة
ومن لايقوم إعوجاجهم بالشدة، وبالضرب إن إحتاج، ترك الخطأ فيهم يكبر ويتأصل ويصعب تغييره مستقبلا

أعتقد هناك سن معين للضرب .. بين 8 إلى 15
خطأ نضرب طفل دون 8 سنين مهما كان السبب .. يكفي تعليمه ورفع الصوت عليه إن لزم
وخطأ نضرب الإبن فوق 15 .. يكفي تعنيفه بالصوت والكلام ، وأساليب كمقاطعته فترة معينة ( 3 - 10 أيام ) أي معاملته كأنه غير موجود.

[يمامـة]

في زمننا هذا محد يستخدم العسو الكل محول على المكنسة الكهربائية

ما علينا من اللي كتبته فوق..

فلو رجعنا الى فكرة الموضوع الهدف بشكل عام تربوي اكثر من انه استخدام للضرب..
بمعنى اضرب بس لكن قبلها علمهم وربهم وان ما نفع فيهم اضربهم كحل اخير او كتنبيه سريع
بأن التكرار ممكن يولد نفس ردة الفعل..

فمثل ما قال اخونا اضرب واشرد التربية هي الاهم..
فاللي قادر يربي من غير ما يضرب ما نقدر نقول له ليش ما تضرب؟
لان الاهم ان الطفل يتربى ويعرف حدوده واللي له واللي عليه..

فالضرب مب مطلب اساسي للتربية ولكنه حل اخير لما تفشل الطرق الثانية..

اما بخصوص الضرب ما عندي عمر محدد للضرب.. ممكن جدا طفل عمره
سنة امسكه من يده وباطراف اصابعي اضربه على كفه واقول له
"تح.. عيب .. هاااا"
فالطفل اذكى من ان احنا نعتبره بهيمة وما يفهم ولازم نراعيه..

[لبيبة]

وعليكم السلام ورحمة الله وبركاته

عيال أول اللي ظنوا إن أهلهم ما ربوهم إلا بمساعدة العسو، تقديرهم غير صحيح،

وتربيتهم اللي طلعت عيالهم بالصورة اللي تعجبهم، ما كانت نتيجة للضرب،

هي نتيجة لقرب الوالدين من عيالهم، وتعليمهم الدين والأخلاق والقيم،

وهو ما يجب اتباعه مع أولادنا، أما الضرب لن يولد إلا الضرب،

والعنف يولد العنف.

[<اضرب واشرد>]

اما بخصوص الضرب ما عندي عمر محدد للضرب.. ممكن جدا طفل عمره
سنة امسكه من يده وباطراف اصابعي اضربه على كفه واقول له
"تح.. عيب .. هاااا"
فالطفل اذكى من ان احنا نعتبره بهيمة وما يفهم ولازم نراعيه..

أخت يمامة متفق .. وتعليق بسيط على المقتبس:
ما أعتبر المثال اللي ذكرتيه (ضرب) هو تنبيه وتعليم ..إلا إذا أوجعه أو بكّاه
هذي الطريقة اللي يفهم فيها أبو سنة أن الشي الفلاني لايلمسه

وعليكم السلام ورحمة الله وبركاته
عيال أول اللي ظنوا إن أهلهم ما ربوهم إلا بمساعدة العسو، تقديرهم غير صحيح،
وتربيتهم اللي طلعت عيالهم بالصورة اللي تعجبهم، ما كانت نتيجة للضرب،
هي نتيجة لقرب الوالدين من عيالهم، وتعليمهم الدين والأخلاق والقيم،
وهو ما يجب اتباعه مع أولادنا، أما الضرب لن يولد إلا الضرب،
والعنف يولد العنف.

بالضبط أول كان المربي قدوة وكانت البيئة تساعد
الحين البيئة نت وتلفزيون وأجناس البشر
وطرق التربية الخاطئة من ضرب وعنف يتوارثه الأبناء جيل بعد جيل ، فالولد يكبر ويضرب ابنه (الحفيد)
وضرب وتعنيف الأب للأم يورث مشاكل نفسيه للأبناء ، يكرهون الزواج للصورة الخاطئة والمشوهة التي ترسخت عنه

[qatara]

بيجونك الي يهرقطون الضرب والضرب

نعم ينفع
فابنك تامره بالصلاه لسبع وتضرب لعشر

زوجتك تنصحها وان لم يفد تهجرها وان لم يفد تضربها ضرب تاديب


فالله جل شائنه الذي بيده هداية جميع البشر
وضع الثواب والعقاب وجعل بينهم الاختيار

بيجونك الي راكبين موجة العلمانيه والتحرريه
بعطونك تبريرات ما انزل الله بها من سلطان

فانضر للدول الغربيه تعليم بدون ادب
ينتج عنه علماء لاكن مجرمين ويستخدمون العلم في الجريمه

لانهم تاسسو بدون ضرب تاديبي

الاب عندهم لا قوامة له ولا هيبه كانه اصغرهم عمرا

والادب رحمه

قطع يد السارق رحمه به وبالمجتمع

رجم الزاني رحمه به وبالمجتمع
الخ

والله اعلى واعلم

[الزعفراني]

اذا ما ترنه على اذنه ما راح يصطلب .. مره في العمر زين حق الذكريات

[نفسي عزيزه]

قبل اذا تاخرت في البحر ، سبوح مع الربع ، ادخل البيت اتلشط تلشط بالعسو من امي الله يطول بعمرها وانخش بالحمام ساعه لين راحت اطلع انخش بالغرفه
من وين بتجي المياعه والظهر والريول مخططه بالعسو وواير الغساله

اهم شي التربيه مش الضرب بأعتقادي

[الجـــوديّ]

ماينفع في الأمور العادية ... لأن الدنيا تغيرت .. وأساليب التفام القديمة تلاشت وحل محلها محلها اساليب جديدة

كلام بالهدوء والحوار والاقناع .. حسب ماتعلموا من المدرسة وبعض البيوت متفهمة

لكن فيه أمور كبيرة ... اايد فيها الضرب علشان يعرف ان الضرب معناتها تعديت على الخطوط الحمراء ..

وهذا الضرب له ولحياته مهوب تشفي أو نزعة عصبية ..

منها الضرب على الصلاة واحترام الوالدين والكبار وتوقيرهم .

[JN000N]

المقصد من المقوله مب العسو بحد ذاته
هو المقصد بالفترة الزمينة الي كان العسو شي اساسي ف كل بيت
اي التربية ذاك الوقت غير


في واحد الله يطول بعمره قال انه كان شيطان يوم صغير كل شي غلط يسويه ومره كان متعلبش ف الحدايد ف الحوش وسمع اخوه يقول ان ابوهم جا البيت هو من الخرعه يبي ينزل من الحدايد شار الثوب وتم متعلق وهو يحاول ينزل طاح وتزلغ تعور وانشق ثوبه
وهو قعد يصيح لان كان متألم بس الابو وقتها يوم شافه جاه وضربه ضربه وحده خلاه يزيد ف صيحته وقاله هذي عشان تتوب تتعلق ف الحدايد مره ثانيه
يقول من عقبها ماسويت الحركة لان خفت ان وراها عقاب وقتها النصيحة مهما نصحني ابوي ان اوقف عن هالشي ماكنت بستوعب حجم الخطر الي بيصيدني لو كملت عليه ف عقب الضربه عرفت ان بيجيني عقاب لو عدتها ماسويتها وماكررتها
ويقول ان تربية ابوهم لهم علمتهم يطلبون رضاه ويدورونه دواره لين الابو جا من الدوام يتراكضون هو واخوانه من اول واحد يفتح الباب لابوه عشان يرضى عليه ومن يقول يبي ماي كلهم يتسابقون من يجيب له ماي
يقول تعلمنا ان كسب رضى الوالدين مب الشي السهل ولازم نتعب عشانه مب لانهم اهلنا ويحبونا وواجب عليهم يرضون لا لانهم هم الوالدين ومهما كانو يحبونا لازم احنا ندور رضاهم
يقول انا نفسي ماكنت مقتنع باسلوب ابوي ف التربية واقول هالشي غلط ولازم ابين لعيالي مدى حنيتي وحبي وحناني لهم وكل شي يبونه اسويه لهم وصح بحدود ولكن ماقسى مثل ماقسى ابوي يقول قلت مابمشي على تربية ابوي وبربي عيالي بالتربية الحديثة
بعد هالعمر يقول اجي عند باب البيت بالسياره ولدي واقف عند الباب يكلم ربعه وانا اطق هرن انطر الدريول يفتح لي الباب
اقول لبنتي ابي ماي تقوم هي تقول لاختها روحي جيبي لابوي ماي ويتهاوشون كل وحده تقول للثانيه هو قالج انتي
يقول بنتي هي تتزمر علي وتزعل وعارفة اني براضيها وبجيب الي تبيه لاني احبها
يقول ازعل عليهم اعصب مايجوني يطلبون رضاي يتمون هم بعد كم يوم مايكلموني يقعدون وياي بس كلامهم معاي قليل كأني انا الي اطلب رضاهم علي

يقول الحين اقارن بين تربية ابوي ونتيجة تربيته وتربيتي ونتيجتها وعرفت الفرق
عرفت ان ابوي كان يحبني وايد ولكن عنده اولويات بدل مايكون حنون بالدوجة الاولى كان قاسي وبالدرجة الثانيه حنون والقسوة تختلف ماقصد الكره والعداوه بس قسوة الاب الي يبي الخير لعياله ويبي مصلحتهم


كلامه كان تفصيلي وكان عنده امثله وايد وكنت مستمتعه وانا اسمع له وعرفت وقتها ان لما يقسى الوالدين مرات على الابناء تكون قسوتهم بداعي الحب مهما فهم الابناء وقتها قسوتهم غلط مردهم بيجي يوم وبيعرفون شكثر والدينهم يحبونهم وعلموهم احسن تعليم وتربيه