السلام عليكم و رحمة الله
صبحكم / مساكم الله بالخير
السالفة إني قعدت مع وحدة في الصالون .. المرة كورية .. طبعاً شافتني مسلمة ( الحمد لله ) .. و من خلال الحديث
سألتني : ليش الرجال عندكم يعدد في الزوجات و الحريم لا ؟؟
و انتو راضيين بهالشي ؟؟ يعني ما تحسون إنه ظلم في حقكم ؟؟
طبعاً هي كانت تسأل وتتناقش بهدوء .. مب بطريقة هجومية .. و الانطباع اللي جاني .. أنها تبي تفهم الفكرة من التعدد
أنا حاولت أجاوبها على قد ما قدرت
قلت لها أول شي : هذا الشي تشريع من الله سبحانه .. و احنا كمسلمين .. عندنا إيمان عميق وثقة .. بأن ربنا ما يشرع شي إلا و فيه مصلحتنا
لأن الله خلقنا و خلق كل شي .. وهو أعلم بخلقه .. و بما فيه الصالح للجميع
ثانياً : الرجل ليس كالمرأة .. عنده رغبات فطرية .. و المرأة أيضاً عندها .. لكن رغبة الرجل أقوى
فبدل من أنه يتزوج وحدة و يتخذ له عشيقات .. الله شرع له يتزوج و يعدد .. بشرط العدل في كل شي ( ما عدا أمور القلب )
و صحيح المرأة تغار وتتضايق .. لكن ربي يأجرها على صبرها و إعفافها لزوجها
وإذا ما كانت من النوع اللي يتحمل .. لها الحق في الانفصال
ثالثاً : ليش الرجل يعدد والمرأة لا ؟؟ لأن الأنساب بتختلط و بتضيع .. و الرجل عنده القدرة على أنه يعتني بعدد من النساء والأبناء .. بينما الحريم ما يقدرون ( هذا لو حدث أصلاً هالشي ..أي لمجرد الافتراض )
رابعاً : الإسلام وصى بالتكاثر وزيادة النسل .. والتعدد يخدم هذا الغرض
تقريباً .. هذا مجمل اللي قلته لها
لكن بعد أحس إني ما وصلت الفكرة عدل
لو كنتو مكاني : ايش بتردون عليها ؟؟
مع مراعاة عدم الهواش و الحدة في الكلام
وتحياتي للجميع