اتحب!! من فينا مايحب، حب الام الاب الاخ الاخت الابن والابنة…وانوسع النطاق شوي ويكون للاصدقاء…ويحلى اكثر ويكون للعشيقة…اممم…لاتفهموني غلط…ف العشيقة تصلح للأثنين، الزوجة او غير الزوجة…لما اتحب البنت اتكون عشيقة لانك تعشقها واتموت في دباديبها…كانت زوجة او غيرها…بس لحظة لحظة…ليه احس انكم مب امركزين معاي…لما قلت عشيقة حسيت ان كل واحد سرح…امممم مو غلط…وهذا شي طبيعي…ف الانسان مايقدر يعيش بدون حب…ف الحب يبني ويرسخ العادات السليمة والصحيحة للمجتمع…بس هذا مو موضوعنا…
الزواج…احتمالين يا انه جنة او قرادة…وفي احتمال ثالث وهو الرمادي انك اتكون عايش بس مب عايش…يعني اسم متزوج وفعل غير متزوج…يعني صحيح انك عالاوراق متزوج…لكن مجرد شي رسمي او انكون واضحين اكثر وهو رخصة اتجيب عيال بطريقة
شرعية فقط…يعني لو قعدته مع زوجته بروحهم ف الصالة بتسمع صوت شخير صرصور الليل…
وهذا هو موضوعنا…
ع ايام الشيبان والاوليين…كانت اغلب حياتهم ف البحر او البحث عن الرزق…والزوجة تهتم بالبيت واتقوم فيه واتربي العيال…ف قليل اتحصل بينهم اي تواصل او تشيت تشات يعني محادثة…بناء ع طبيعة حياتهم الصعبة…ورغم ذلك اتحصل منهم من كان عاشق لزوجته وعايش قصة حب ماتنتهي…ومن القصص القديمة الكثير…
لكن في وقتنا الحالي…اتشوف اغلب الشباب يعيش اتعس وقته مع زوجته او ف البيت…ودوم اتحصله ف المجالس او القهاوي او يسافر مع ربعه…يرفه عن نفسه ويبتعد عن بيته…وتلقاه يدور اي مشكلة او زلة عشان يتهاوش او يطلع من البيت…
تسأله عسى ماشر يابوفلان؟!…يقول ماتوفقت ف الزواج…والحمدلله ع كل حال…طيب هل هي مضايقتك؟ يقول لا…هل هي ماتقوم بواجبها اتجاهك؟! يقول لا…طيب شسالفة؟ قال ياخي مافي سوالف بينا…شلون؟ يعني لما انا افتح مواضيع هي ماعندها خلفية عنها!…مثل وشو؟ قال ماتعرف شي عن المواتر!!
من فترة سألت سؤال لمجموعة من الشباب وكان كالتالي
’هل تفضل تطلع تتعشى مع زوجتك بروحكم ولا مع عيالكم؟ وليش؟
طبعا في كم واحد قال بروحنا والسبب مايبغي ازعاج اليهال، وهو اغلب وقته مع الجوال…
ومنهم الحبّيبة…يقول انا ادور اي فرصة عشان اطلع مع زوجتي…اذا انت فاضي باقط عيالي عندك …
اما الأغلبية اجاباتهم كانت طبعا مع عيالنا، والسبب ان لو قعدت انا وياها بروحنا مافي مواضيع نتكلم فيها وبنتملل، ف وجود اليهال يسلينا!!
..
بالنسبة لوجهة نظري
محد ينكر ان هناك ظروف تتحكم بالعلاقات بين الأشخاص…وهناك توافق بين البشر
وحديث الرسول عليه الصلاة والسلام
(الأرواح جنود مجندة، ما تعارف منها ائتلف، وما تنافر منها اختلف)
ودام انكم للحين مع بعض ف هذا يعني ان في بينكم علاقة وجذب…
ف هذا لايعني انك توقف مكتوف الايدي واتقول هذا نصيبي!
لازم تبذل جهد واتفكر واتدور حل…
اولاً : لانك انسان وتحتاج لصحبة اتشاركك افراحك واحزانك…تستانس معاك لفرحت واتخفف عنك لحزنت
ثانيا: عيالكم…بديهي بيتأثرون بعلاقتك مع امهم…ف كل ماكانت علاقتكم اكثر ترابط وحب وتفاهم …بيكون اسهل لكم ف التربية…ويخرج لكم جيل سليم نفسيا ومتماسك ومترابط…
وهذا كله بينفعكم ف المستقبل…ويطرح البركة ف عيالكم…
بعكس اللي كل يوم هواش مع زوجته ومتزاعلين دوم ومافي اي علاقة ود بينهم وهذا تأثيره جدا سلبي عالطفل واكثر سوء ف التأثير من اللي فاقد احد ابويه…
ثالثا…ماتبغي اتعيش سعيد؟ مستانس؟ ترجع البيت وانت مشتاق اتشوف طلة زوجتك وابتسامتها؟؟
كل هالامور لازم اتكون دافع لك تبذل جهد وتسعى انك تكسر الحاجز اللي انبنى بينك وبين زوجتك…
وأكون صريح معاك…المشكلة فيك انت…اغلب الشباب تربى وعاش ع هذا الاسلوب من الحياة…يعني لو ترجع كم سنة من حياته…قبل لايتزوج…تلقاه دوم مع ربعه…وهياته…ومجالس وغيره…يعني امه وخواته يشوفونه وقت الاكل…او النوم…وباقي حياته بره البيت…
وهذي مشكلة مجتمعنا الخليجي…والمشكلة ف ازدياد…قبل كانت الهياته مقصورة عالشباب…اما الحين ف صارت للشباب والبنات…وهذا الامر بتكون عواقبه وخيمة ف المستقبل اذا ماتداركناها…
ف انت لازم اتغير من اسلوب حياتك…افتح مواضيع اتهمها واتشد انتباهها…يا اخي صدقني انت خلها تفتح حلجها مرة صدقني ماراح اتسكره…بس انت عطها مجال وبتدعي لي…قلت بتدعي لي مب علي…
من الآخر…
اذا تبغي اتعيش حياتك سعيد…اتخذ زوجتك صديقتك…
الموضوع لمن يهمه الأمر…ولناس يهمني امرهم جدا جدا جدا…
|
رد مع اقتباس
المشاركة الأصلية كتبت بواسطة ضوى
