..!!.. [ رمضــــان والنــــاس والوقـــــت ] ..!!..
السلام عليكم ورحمة الله وبركاته ,,
بداية أحب أقولكم اني كتبت هالموضوع بتمعن شديد وحاولت اختصر قدر المستطاع لاني عارفة معظم اذا مش الكل مايحب يقرأ المواضيع الطويلة .
وفالاخير لو قريتوه كامل صدقوني بتطلعون باستفادة ماتقل عن 10%
::
تصدقون إني أنا وبيتنا (اخواني أمي أبوي ) مانطلع ف رمضان الا للسحور أو للجمعية ؟ راحة بال تامة , ورمضان بالنسبة لنا وقت عبادة وراحة نفسية
مو ضغط نفسي ايش اشتري ,, ومن وين ,, ومتى , وزحمة , متى اروح , شكثر انطر ؟
الكلام هذا موجه للرجال وللنساء واخص فيه النساء لان مشاويرنا في رمضان أكثر من الرجال ( لحد ينكر )
الحين احنا بمنتصف شهر أبريل , مابقى على رمضان الكثير ولكن فيه وقت الواحد يجهز يشتري يخلص أموره عشان يكون (باله مرتاح ف رمضان ووقته للعبادة وصلة الرحم والامور المهمة الاخرى )
ما اقدر افتي للرجال واقول لهم ايش ممكن يجهزون من اللآن عشان يتفرغون برمضان بس تقدرون انتو كاعضاء تفيدون بعض فالموضوع .,
راح اتكلم للنساء :
التخطيط لمشتريات رمضان بطريقة صحيحة توفر عليج :
الوقت
الجهد
والأهم ؟ الفلوس !
ابتدي من الحين ,,
ولا حد منكن يحاول يقنعني ان في موديلات فنتك غريبة عجيبة بتنزل ف رمضان عن الحين ؟
ترى فرق المدة شهر وشوي ؟ فـ/ لحد يلعب براسكم ويقول انتظري لرمضان بتنزل كولكشات حلوة !
- عبايات فصلي من الحين بتوفرين :
( وقت , وتقدرين تضبطين قياسها بدون ضغط , وغير جذي بتوفرين مبلغ لان المحل او المصممة تكون اسعارهم عادية مقارنة بموسم رمضان . )
- جلابيات ؟ اذا بامكان تسافرين احد دول الخليج نصيحتي سافري ويك اند واشتري قد ماتبين خصوصاً ان المعارض حالياُ قائمة بالبحرين والكويت والجلابيات عندهم ببلاش .
ماتقدرين تسافرين ؟ في وقت روحي السوق من الحين اشتري القطع وفصليها وريحي نفسج .
باختصار عشان ما اطيل الحديث ( اي شي يخص مشتريات اشتري من الحين وخليه على جنب لرمضان )
واتكلم عن كل شي بالتفاصيل الصغيرة حتى لو حلق او اكسسوار شعر !
حتى الفوالة ؟ اطلبيها قبل رمضان باسبوع وحددي انج تبينها فاليوم الفلاني . (وياكثر هالامور بالانستقرام)
بالنسبة للكماليات الجمالية : (الصالون) وهو خوف وهاجس كل بنت في هالفترة !
من الحين اضمني لنفسج :
- حناية (احجزي ثنتين عشان لو وحدة انكبتج )
- الأمور الأخرى
- قص صبغات شعر الخ ... من الحين سوي حجوزاتج .
باختصار سالفة انتظار الصالون المتعبة والذبح والهواش ف الصالون والاعصاب
وهذا دوري وافوت فطوري وفوق هذا اغلب الشغل مايطلع مضبوط بسبب الزحمة .
صدقوني حتى التسريحات اللي تروحون لها الصالون الفجر من اليوتيوب تتعلمونها ..
او انج تتعاملين مع ناس معينين وخلاص انتي زبونه مفضله عندهم وتبديج على الكل وتقدرين تكسبين الحنايات او اللي يسوون الشعر بهدايا بسيطة مثل جلابية ولا شنطة ماتبينها وراح تكونين وايد مفضلة عندها لدرجة تبديج على اي زحمة ( تجربة شخصية)
----------------
فحوى موضوعي :
التجهيزات القبلية لرمضان راح تريحكم نفسياً . وعن تجربه شخصية :
انا هذا رابع رمضان اسوي جذي حتى الصالون ما ادخله برمضان ابداً وعلمت اهلي وصرنا من الناس اللي مانتعب نفسيا برمضان ونقول ياربي زحمة متى يمدينا نشتري ونسوي .
يفضل انكم تسوون لستة وتكتبون فيها بالتفصيل انتو ايش محتاجين وتحددون تاريخ معين حق كل شي .
اتمنى لو شخص واحد يجرب هالطريقة لرمضان السنة . صدقوني بتحسون بفرق كبيييييييير .
والله يبلغنا رمضان ان شاء الله
|
رد مع اقتباس
المشاركة الأصلية كتبت بواسطة راجي الْعفو
