.. الـصـــــــــــــــراحـة !

[sweet qatar]

الصراحة وقت الغضب تجرح

لأنج وان كنتي صادقة .. فانتي تختارين الأسوأ عشان تحذفينه في وجه الخصم

مثل ما قال الكابتن سلفر .. لين الكلام والتلطف مب عيب

موب عييييييب .. وشكرآ

علي الموضوع المميز والمختلف

[لبيبة]

وعليكم السلام ورحمة الله وبركاته

الصراحة يا جنون، انا وحدة صريحة ودايركت،

ما احب اخلي الاشياء تتراكم في نفسي او نفس غيري بدون ما اتصارح،

الوضوح حلو في كل العلاقات الإنسانية،

وأكثر شي تعبني هو وجود ناس مروا علي في حياتي عندهم هواية انهم يمسكون علي زلاتي او هفواتي ويراكمونها في نفوسهم وبعدين يحصل الانفجار،

هالشي جدا متعب،

ليش يعني ما نحل الأمور ونصفي النفوس قبل لتتشابك وتتعقد وتوصل لدرجة ما نتخيلها والموضوع يكون أبسط مما نتخيله،

كثير من المشاكل قامت على سوء الظن وسوء الفهم،

ولو نراجع الأمور كان اتضحت جوانب سوء الفهم بين الأطراف،

الصراحة جدا جميلة، لكن مع الحفاظ على مستوى لائق من اللباقة والأدب.

[The Master]

الصراحة.…بهرتني طريقة الطرح والاسلوب وانتقاء الكلمات اللي تمت عن طريق جنون..احييك الصراحة وعجبني.…شكرا لك

لكن
لا اتفق معاك ف الفكرة ابدا
احترم رايك
ولي عودة…
I need go deal with some business ha3

[ريم الشمال]

الصراحة وقت الغضب قد تتحول إلى سكين ينغرس في قلب من يتلقى صراحتك كفرد
لذلك خط الرجعه فيها محفوف بالمخاطر لأن تجميل الجرح بعد حدوثه قد يزيل أثاره السطحية ولكن هناك اثر عميق لامس القلب لايمكن أزالته
وهذا يدفع الكثير إلى اتخاذ طريق الدبلوماسية في ايصال ما نريد حتى ولو كان ما نريد ايصاله هو الحقيقة
اهتمام الأنسان بتجميل كلماته ليس ثقافة حاضرة وليدة اليوم فهي معروفه منذوا زمن بعيد نتعلمها حسب نوع التربية التي نتلقاها في بيوتنا
لأن الصراحة هدف نحققه عن طريق اسلوب يتم انتهاجه من قبل افراد يتمتعون بنوع من الذكاء الاجتماعي لإيصال ما يريدون

[بصمة قطرية]

مثل ما قالوا الصراحة راحة ..
جنوووون
تعتقدين في الوقت الحالي
هل ممكن الشخص يتقبل الصراحة ..!!
ما تحسين إن الكثير يرفضون الصراحة
وممكن يتهمونج بإنج ( غير لبقة )
وما تحترمين غيرج و تقولين كلام المفروض ما تقولينه
و تتدخلين في أشياء ما تعنيج ..
كل هاي لمجرد إنج قلتي الصراحة ..!!!
الصراحة حلوة
بس لازم الواحد يختار التوقيت المناسب
مش وسط مشاحنات يجي و يقط له كم كلمة
و يقول أنا صريح ..!!!
مستحيل تكون هاي صراحة ..
لأن هالشخص مثل اللي يصطاد في الماء العكر
كان ينتظر فرصة عشان يقط فنبلة تحت مسمى ( الصراحة ) ..
الصراحة لما تجي تنتقدني مثلاً بأدب و إحترام
تبين لي شي ممكن أنا غافلة عنه و الأهم يكون بيني و بينك ..

تحياتي جنون على الموضوع الحلو ..

[العقل المدمر]

غالباً وقت الغضب الصراحة تكون مزودة ببهارات القهر
مب شرط المعصب يقول الصج .. ممكن يجذب من العصبية وينكر ويتبلى

الصراحة مطلوبة .. مب في كل شي .. في الأشياء المهمة فقط
خصوصا إذا كانت عن وجهة نظري مثلا عن شي حلو والا مب حلو
ليش اقول مب حلو حق شخص فرحان فيه ؟ لا حلو واستانس وعليك بالعافية

في الأشياء المهمة .. الصراحة مطلوبة ولكن بتجميل الكلام
شخصيا افضل استخدم اسلوب النفي لاني احسه اخف
مب حلو اهون من كريه .. مب عدل اهون من عوي
مب صح اهون من غلط .. مب ذكي اهون من غبي

[الجـــوديّ]

الكلام سهل جنون ..
الحين محد يتقبل الصراحة الا الصريح مع نفسه أول شي ..
ويتقبل الانتقاد بصدر رحب ويبي يغير نفسه!

مثل ما قال القبطان سلفر ... يبي لنا تمهيد طويل ومد علاقات علشان يكون عندنا مساحة صغيرة
تشفع لنا نكون صريحين فيها مع من نحب ومع من يهمنا أمرهم
سواء كان وقت الغضب وحتى في الأوقات العادية
لأن الطرف الثاني إما ينحرج من لحظات المصارحة وموضوعها ..
وإما يعتبره انتقاص منه حتى لو هو في الأساس مب انتقاص
وإما ما يبي يكشف كل أوراقه مع الطرف الثاني .. يفضل اسلوب والمجاملات والطرق غير المباشرة وافهم يافهيم
فليش أخسر الناس .. بلاها إلا في الأمور الكبيرة .. ومعاها باسلوب اللطف والغير مباشر.

[مختلفة عقليا]

السلام عليكم

من رايي الشخصي .,

الصراحه اذا كان لها مفعول ., بقولها .,

يعني اذا عرفت اني لو صارحت افلان بشي بيتغير بصارحه بس لو لا ليش اصارحه !!

ماعرف انا دوم افكر ., بـ ليش اسوي هالشي !! عشان يتغييراللي بصارحه والا عشان ارضي نفسي وارتاح !!

مش مضطره اخسر علاقات وقد تكون (( قويه )) عشان المصارحه .,

افضل اعيش منشغله في نفسي واصارحها واتحمل قسوتي علي نفسي ., اتوقع افضل

ويسلموو

[راعي ال VXR]

ساتقبل صراحتك واسمعك باذن صاغيه لكن بعد الانتهاء منها يجب عليك انتي ايضا ان تقبلي وتنصتي لصراحتي لك

احنا في زمن اذا انت صارحتني انا بعد شاطر وبقولك 1 2 3 واسمعني للاخر انتقاد اونصيحه او تعقيب او ماشابه ذلك

ننسى مافينا من نقص ونركزز على الاخرين ونقاط ضعفهم ........ والكمال لله عز وجل


هذه هي الدنيا

[JN000N]

موضوعج يمكن ان يطلق عليه اناقه الاسلوب اناقة الفكر اناقة اللسان كل شي انيق بالتعابير اللغوية

حبيبتي ضوى
منكم نتعلم
ونبي رايح بخصوص المجاملات والصراحه