المشاركة الأصلية كتبت بواسطة يمامـة
للأمانة يا ريم الشمال.. كل الامور اللي ذكرتيها كنت اتبعها مع عيالي ولله الحمد
لو بيقرون مرات القصص.. اطلب منهم يقرون بحس عالي يسمعوني اللي يقرونه..
ما عندي يقرأ القرآن قراءة صامتة لازم يرفع صوته ويسمعني اشلون يقرأ القرآن.
زجيتهم البعض منهم في دورات تعلم مهارات القيادة وكان ما بينها تعلم الخطابة كقائد..
سجلت البعض منهم في مركز قطر التطوعي علشان يتعلمون كيفية التواصل والتخاطب والتحدث
في الفعاليات اللي بيشاركون فيها.. وقد اضطر في مرات كثيرة اني امسك القصة او الموضوع
اللي يكتبونه وابيهم يقرونه لي بصوت عالي.. اني اقراه لهم بطريقة تشجعهم على تقليدي وانهم يكونون
احسن مني..
ولكن في الاخير بعد تلقين الطبيعة الجينية للشخص نفسه تلعب دور كبير في انه يسحب نفسه..
فعلى سبيل المثال بنتي دايما تقول لو بوقف في مكان اتكلم فيه احس اني عملاق والناس مثل النمل
تشبيهها غريب.. وترفض عروض كثيرة انها تمثل مدرستها لأنها من داخلها ما تبي تواجه الناس
مب لأنها اصلا ضعيفة في المواجهة او الكلام ولكن لأنها ما تبي تبرز نفسها في المواقف هذي..
ويوم وافقت على عرضين من العروض لاقت من المديح اللي يفوق مستوى عمرها.. ومع هذا
ما زالت ترفض و ترفض وترفض.. ونفس المشكلة مع اخوها الصغير.. واخوها اللي ترتيبه الثاني..
فمثل ما قلتي مهم جدا نقول للطفل اعتبر نفسك رئيس او مدير او انت في خطبة وتخيل اشلون بتتكلم مع الناس
اشلون بتواجههم.. اشلون بترفع صوتك علشان يسمعونك.. واشلون بتوازن نظراتك وحركات جسمك
ما بين النظر في الورقة والنظر لهم.. لكن بعد البيت بروحه ما بيكفي دام ان ما في فعاليات يتم اشراك هالاطفال فيها..
ما عندنا في المدارس فعاليات للخطابة او مسابقات ما بين المدارس.. والمناظرات يبون ناس متفوقين
طيب اللي مب متفوق في دراسته هذا يموت وما يتطور؟
عندنا مشكلة وتحتاج الى حل في تشجيع طلابنا على التحدث والخطابة وتنسيق الكلمات..