خبراء ميونخ ممكن حد يساعدني أرجوكم

[amal qatar]

السلام عليكم

حبيت تساعدوني في جدول مرتب بحيث اقدر ازور معظم الاماكن السياحية في النمسا .. الروحه والعوده بتكون من مطار ميونخ

15 ليلة

ودي بهالأماكن ( ميونخ - سالزبورغ - كابرون قررت اسكن فيها بعيد عن الازعاج في زلامسي - انترلاكن - قارمش - انسبورغ - قرية هايدي )
ميونخ بخليها للآخر .. وش رايكم زينه هالمناطق ولا أغير

المشكلة وقت العودة بيصادف الثلاثاء يعني اذا بنقعد فيها 4 ايام بيصادف الويكند وبيكون كل شي مسكر
- وين القى من المناطق اللي ذكرتها حديقة حيوانات تستحق الزياره .
- هل في مناطق تنزل فيها ثلوج ممكن نزورها حتى لو يوم واحد نشوف الثلج ؟

[شموخ دائم]

,

,


مرحبا

لو تستبعدون انترلاكن من خط الرحله احسن لانها بعيده عن باقي المناطق
واذا تقصدين ( انسبورك ) بعد لو تستبعدينها افضل مافيها ما يستحق المبيت فيها
سالزبورج اجمل منها و تنتقلون الى كابرون او زلامسي المسافه قريبه بينهم حدود الساعتين فقط

وتكتفون في

سالزبورج 3 ليالي
كابرون
زلامسي 3 ليالي
قارمش 3 ليالي
ميونخ 5 ليالي للتسوق والحدائق الكبيره الي فيها


ان شاء الله الاخوان والاخوات يفيدونك اكثر




فندق Tauern Spa Hotel في كابرون
6 دقايق عن زلامسي بالتاكسي
فندق روعه هادي بالريف منتجع فيه العاب مائيه للاطفال وغرفه كبيره ووسيعه
افضل فندق في المنطقه كلها وقليل من يعرفه
انا سكنته سنه 2012 وكان سنه افتتاحه
وجدامه التكاسي متوفره


خط رحلتي كان
دوحه فينا \ سالزبورج \ كابرون زلامسي \ ميونخ دوحه
والبعض يعمل العكس





,

,

[amal qatar]

الله يجزاك خير أخوي شموخ دائم ماقصرت .. نعم كنت اقصد سالزبورغ .. بشوف المنتجع ان شاءالله القى حجز

ألف شكر وبانتظار باقي الأعضاء

[غير البشر]

ياهلا ومرحبا اختي امل

ماقصر اخوي شموخ دائم دايما مبدع بخبرته ونصايحه الجميله

ان شاء الله بقترح عليج بمخطط بس قبل لا ابداء فيه لازم اوقف عند كذا نقطه

نفس ماقالج اخوي شموخ بخصوص مدينه انسبروك نادر ننصح بالسكن فيها الا اذا
كانت منطقه وسطيه بين زيلامسي وانتر لاكن للراحه
واستثمار الوقت في انسبروك لزياره قارمش وبيرتساو والعوده للسكن بنفس اليوم


واذا بخاطرج بقريه هايدي في مدينه ماينفيلد بتكونين قربتي المسافه لج الى زيوريخ وانتر لاكن
ساعه فقط الى زيوريخ
وساعتين الى انتر لاكن
وبالمقابل العوده الى ميونخ يبغيلكم ساعتين ونص
او العوده الى انسبروك مره ثانيه في حدود الساعتين

بخصوص قارمش مانصح ايضا فيها للسكن لان مدينه صغيره ومافيها الشي الكثير وفليل ملل
مافيها الا الجبل والتلفريك يعني السكن بمدينه قريبه يكون افضل

بعد هذا الكلام

مخططي الاول :

طبعا بذكر فقط مناطق السكن من دون منطق الزياره القريبه

الوصول زيوريخ - انتر لاكن - ماينفيلد - كابرون او ماريا الم - سالزبورغ او وولف قانق واخيرا ميونخ طريق العوده

بخصوص منطقه ماريا الم منطقه قريبه من كابرون وزيلامسي وهاديه لمحبي الهدوء والارياف
كابرون اهدى من زيلامسي لكن فيها حركه وناس كثيره

وولف قانق بحيره من ضمن البحيرات الثلاث في سالزبورغ للهدوء والراحه والاستجمام او السكن بوسط مدينه سالزبورغ
وتقريبا نص ساعه من وسط سالزبورغ

المخطط الثاني :
يتم استبعاد ماينفيلد ( قريه هايدي )
واستبعاد زيوريخ وانتر لاكن
والاكتفاء بالذهاب والعوده من ميونخ

ميونخ - سالزبورغ - زيلامسي - ميونخ

لج الخيار اختي نشوف رغبتج اكثر في شنو عشان اوضح لج اكثر

بالنسبه للثلوج في هالوقت اذا تقصدين السفر بالصيف مافي مكان ينزل به ثلج
لكن توجد مناطق كثيره بها ثلج
مثل جبل كابرون وقمه دانشستين في زيلامسي
او قمه تتلس في لوزيرن
او قمه جونفرو في انتر لاكن

نشوف رغبتج في شنو ونكمل ان شاء الله الباقي

[amal qatar]

ماقصرت اخوي غير البشر الله يجزاك خير .. بخصوص زلامسي اليوم قريت عنها اكثر وعن ازعاج بعض الخليجيين فيها والزحمه عند البحيره و و و .. من الاساس انا مالي نيه اسكن فيها بسكن ان شاءالله في كابرن .. مادري تستاهل كم يوم نقعد فيها ؟

ميونخ قلت بخليها للعوده .. 4 ليالي تكفيها ؟

سالزبرغ من المناطق اللي قريت عنها ومادحينها .. اخليها من ضمن الجدول ولا ترشح لي منطقه ثانيه ؟ يخوفي تكون مزحومه نفس زلامسي

انترلاكن مدحوها وايد والارياف اللي حولها ..متردده فيها عشان المسافه البعيده بالذات ان بتكون الرجعه منها لميونخ مع انها في خاطري الصراحه هي واليوربارك .. اذا تشوف انها بتكون متعبه لنا وماتستحق العنوه مب مشكله بنكنسلها

حاليا هالاماكن اللي في بالي .. لو عندك اي اقتراح فيه اماكن ثانيه تشوفها احلى وأهدا عادي بغير الجدول كله .

[ضوى]

شوفي اختي العزيزة

هايدي لاند وايد بعيدة ومافيها اي شي وممله يعني تروحين تلعبين مع الغنم وتردين وضياع يومين عالفاضي

العام جدولي كان كالتالي:

ميونخ زيلامسي هايدي لاند انترلاكن لوقانو ميلانو رست اللي فيها يورو بارك وبعدها ميونخ مرة ثانيه ومنها تقدرين تطلعين على غارمش ، وعلى فكرة من رست تقدرين تطلعين على كولمار الفرنسيه وكمن مدينه فرنسيه ماتذكر الاسماء بالضبط وفي الرجعه على ميونخ فيه اكثر من منطقه تروحينها من ميونخ

خلي جدولج مريح ترا شقله الشنط متعبه وملل ، احنا استانسنا وايد وتسوقنا وايد وعيالنا لعبوا وايد وووايد كانت ممتعه رحلتنا بس متعبه م شقله الشنط وتغير الفنادق

شوفي لج مخطط حلو ونسيت اقولج انترلاكن قعدنا فيها عشر ايام ومامدانا ماشاء الله من كثر مناطقها اللي تجنن

[غير البشر]

العفو اختي ويجزاج بمثله يارب

صح زيلامسي زحمه وازعاج الخليجيين وماتاخذون راحتكم
كابرون خيار جميل وتستحق المنطقه للسكن على اقل تقدير 4 ايام

بالنسبه لسالزبورغ نعم جميله وصغيره وزرتها كذا مره والمره الاخيره الصيف الماضي
والمده المناسبه لها يومين
وتطمني المنطقه مش مزحومه نفس زيلامسي ولا قريب منها
يوم لوسط المدينه
ويوم الذهاب للمثلث الذهبي البحيرات الثلاث ( وولف قانق - وسانت جلجن - فوشل )
كلهم جنب بعض وتقريبا متصلين مع بعض

نعم ميونخ 4 ايام او 3 ايام فقط ماتستحق اكثر من وجه نظري


اختي بالنسبه لزيلامسي وانتر لاكن تقريبا الثنتين نفس الاجواء والحياه والنشاطات
في منهم يحبون زيلامسي اكثر ومنهم يعشق انتر لاكن
اذا بتروحين زيلامسي تقدرين تستغنين عن انتر لاكن

اذا خاطرك في الالعاب والارياف والثلج خذي هذا الجدول معاج

الوصول ميونخ - سالزبورغ - كابرون - ماينفيلد ( قريه هايدي ) - فرايبورغ - والعوده الى ميونخ

بالنسبه لمدينه فرايبورغ
هذي قريه صغيره وجميله وضمن القرى الالمانيه
موقعها استراتيجي جدا جدا
من فرايبورغ ربع ساعه الى اوروبا بارك
من فرايبورغ اقل من ساعه الى زيوريخ
ومن فرايبورغ اقل من ساعه الى شلالات الراين
وعلى حدود الغابات السوداء في المانيا
وقريبه من مدينه ستراسبورغ الفرنسيه
وتقدرون تروحون منها انتر لاكن ولوزيرن والعوده بنفس اليوم
الى انتر لاكن اقل من ساعتين
والى لوزيرن ساعه ونص

وفي طريق العوده من فرايبورغ الى ميونخ يكون مروركم قريب من legoland ليغو لاند
ومن ميونخ تكون زيارتكم الى قارمش

طبعا كل المناطق الي ذكرتها القريبه من فرايبورغ مب شرط تزورونها كلها
طبعا على حسب وقتكم ورغبتكم
فقط ابينها لكم

وايضا مدينه العاب اخرى قريبه من ميونخ SKY LINE PARK

http://www.skylinepark.de/

[ضوى]

غير البشر ظلمت انترلاكن يوم ساويتها بزيلامسي ابدا مب نفس الشي ، انترلاكن افضل من زيلامسي بوااايد ومناطقها اروع واجمل

[غير البشر]

صح كلامج ضوى هايدي ماتستاهل العنوه
فقط اذا راح تنتقل من منطقه الى منطقه مرورا في ماينفيلد ويرتاحون فيها ليله مافي مشكله
لان وصولها وعودتها من ميونخ ورغبتها في زياره كابرون ورست ( اوروبا بارك )
حطيت لها هايدي على الطريق بدل اطاله المسافه والذهاب الى رست عن طريق ميونخ راح يكن الطريق اول بكثير

بالنسبه حق لوغانو جميله جدا لكن صعبه عليها لبعدها عنها وعن المناطق الي بتزورها

[غير البشر]

هههههههه
قلت لج اختي ضوى في من يعشق انتر لاكن
وفي من يحب زيلامسي

لازم تفرقين في الكلمتين الي انا كاتبهم فوق راجعي ردي ههههههه