المشاركة الأصلية كتبت بواسطة Al-Kuwari
الوظيفة مهب عيب , طول ما الوظيفة تعزك عن سؤال الناس او تساعدك في انك ما تكون عالة على اهلك او المجتمع وطبعاً قبل كل هذا الواحد يتحرى الرزق الحلال
نجي للموضوع
مسألة ان الشباب مرفه بزيادة ودلوع ومب كفو مسؤولية مهب لان ما اشتغل جرسون او اي وظيفة مقامها لا يليق بمقام المواطن ,
ممكن اجبر ولدي انه يشتغل جرسون شهر لكن وش بستفيد دام عقليته ونظرته للوظائف هذي انها وظائف حقيرة , الاولى اني اغير من عقليته وطريقة تفكيره واخليه يحترم الجميع بداية من عامل النظافة لين اكبر رئيس شركة في البلد وهالشي يبدا من بداية التربية والنشأ
السبب هو الترف الزايد من وهو صغير الخادمة تجيب له قلاص الماي والدريول يشيل شنطته من انولد وهو كل طلباته مجابه ماحس بقيمة الريال او قيمة اي شي فالدنيا وهالشي حله بسيط
ولدك مثلا عمره خمس سنوات خلك بالسيارة وخله ينزل الدكان يشتري الحليب والروب والخبز اشياء بسيطه يعني ويحاسب الكاشير وطبعا يكون الدكان صغير بحيث انك تقدر تشوفه وتراقبه طول ماهو داخل عشان ماتحاتيه , لا اكل فالصالة تخليه هو يشل الصحن يوديه المطبخ ويشكر الخدامة يبي ماي يقوم يصب حق نفسه عندك شغل بسيط فالبيت اشتغل انت وخله هو يساعدك , عندك شغل عطيته الدريول قوله يقوم يساعده ولو ساعده عطه مكافأة مبلغ مادي بسيط , يبي يشتري شي خيره بين الشي الفلاني او الثاني لا تعوده ان كل شي يبيه بيحصله , عطه مصروف شهري وقوله يعتمد على نفسه ويضبط مصروفاته ويجمع للي يبيه وان جمع مثلا نصف المبلغ انت تتكفل بالباقي
عوده ان مافي شي عيب وان كل شي عادي دام مافيه مخالفه للشرع وبتشوف ان نظرة ولدك للحياة مختلفة ونظرته للكل انهم سواسية بدون ما اهينه بطريقة غير مباشرة باني اخليه يشتغل بوظيفة لا المجتمع ولا العرف يقبلها واخليه يظهر بمظهر المصخرة عند ربعه وقرايبه
انا ابوي ماكان محتاج ميسور الحال لكن كان يصلح اللي يخترب فالبيت بروحه ويصبغ بيتنا القديم الشعبي كل سنة بروحه ولا كان يستحي ولا احنا نستحي بس الحين كبر الله يعطيه الصحه والعافية والبيت الجديد فيلا فما فيه شده للتعب والغثى وهالشي زرع فينا نظرة ان ما نحقر اي حد مهما كان وضعه الاجتماعي
الدولة ولله الحمد غنية والوظائف بالملايين , بالمقابل عدد المواطنين مايتعدى 350 الف والله لا يحوجنا للوظائف هذي وصدقوني محد يتمناها لا انا ولا انت ولا العامل المسكين الغلبان , لكن هذي ارزاق من رب العالمين قسمها بين عباده والحمدلله الذي فضلنا عن كثير ممن خلق تفضيلاً