يوتيوبيات البناء .. مقاطع تثقيفية متجددة

[معماري قطري]

لاحظ يا معمارينا يا مسلينا ههه .. اي مقطع يوتيوب عربي.. تجد تعليقات من صنايعية تنتقد اللي ناشر الفيديو وطريقته.. يقلبونها مسبة.

شف مقاطع الأجانب.. تلقى فيها شيء بسيط لكن الاغلب احترام وتوجيه واستفسار بكل أدب.

صحيح هذا شيء لاحظته والسبب يمكن لأن الأجانب يبرزون فكر متميز وصحيح 100% قلة منهم من يخطيء يلقى اللي يصحح له وبأدب أو يضيف له ويجي الرد بالشكر من صاحب القناة ويعترف بأن كلام المنتقد صحيح مثل ما صار لي مع رفيجنا ولد اوريغن

بخصوص مواد البناء وخلطات الاسمنت صدقني كلها تستوي عندنا ولا يدري بها الا اللي مارس الشغلة على مستوى مشاريع مب بنيان عادي .. عندنا جزيرة البنانا تم تطويرها بشركة تايلندية وعمال تايلنديين استخدموا فيها الخشب كمادة أساسية في البناء وهذي هي بنيانها متميز وموجود

بروة اشتغلت على مباني خفيفة لسكن بروة غالبها جبس وخشب بارتشنات بدال الطابوق ولها كم سنة عايشة

لو تشوف الفنادق كيف تنبني بتعرف خصوصاً لو تدخل فيها استشارات ومقاولين عالميين .. كل شيء يتغير وعندنا تطورت صناعة الزجاج وحتى اليو بي في سي والألمنيوم .. اليو بي في سي قطر تعتبر المصنع العالمي الأول للمادة الأولية له وهي البروبلين أعتقد إن ما خانتني الذاكرة واستوينا نصنعه بالكامل عندنا من مادة أولية لمنتج نهائي .. والزجاج استوت بعض المصانع تصنع لك زجاج دبل ومنحني أو مقوس أو على شكل قبة

الأصباغ وتصنيعها دخلت كثير من المصانع العالمية والماركات المعروفة مجال الانتاج عندنا .. بالنسبة لنا استوردنا المواد الأولية من غابرو وكنا نقدر ناخذه من الجيران من قريب ننفعهم وينفعونا لكن اضطرينا نستورده من الجار الشرقي اللي ما يقصر يعطينا حتى بنص السعر ومن آخرين .. العالم مفتوح وفيه خير .. غير القابرو تم استيراد رمل نقي بأنواع مختلفة واسمنت بكميات كبيرة

ببساطة صرفنا أموال في الخير وفي تطوير البلاد وفي انشاء المصانع وغيرنا صرفوها على السيسي وحفتر والمؤامرات والشر في كل مكان

[معماري قطري]

المواد اللي يستعملها الغربيين والاوروبيين مختلفة عن المواد اللي عندنا.. مهو ذنب العامل عندنا يلقى الطابوق عنده تعبان والرملة تعبانه والماي بعد.. اظن ان شركات اجنبية تعبي لك الرمل مخلوط بالاسمنت حسب الكمية المناسبة لنوعية الاسمنت.

كلشي عندهم غير.. هذي هي الحضارة

نسيت عندنا كم مصنع لتصنيع المواد اللاصقة الخاصة وعندنا للانارة وللكابلات الكهربية .. أتوقع خلال 10 سنين بتصير طفرة عمرانية وصناعية هائلة عندنا وتونا في بداياتها .. كاس العالم ولا شيء بالنسبة للباقي

[معماري قطري]

نقاش فلسفي تصميمي طويل بسبب كورونا واحتياجات البيت

دوم انا اترجمها في احتياجات التصميم وتحسيناته ويمكن تفيد بعض المقبلين على تصميم بيوتهم

[معماري قطري]

[سالم الزهران]

عجبني البناء بالحجار.. بيوتنا القديمة حجر عرض الجدار حول نص متر.. كنا نجلس في الدريشة من عرضها. البيت كان يبنونه الجماعة. وينجرون الابواب والدرايش والحريم يخرزون ويوضنون الفرش مال البيت (الحصير). وهذه الامور ما لحقتها لكن اخبرت عنها. واخر شيئ يسوون قصايد شعرية في البيت عبالهم تدشين.

ويلومونا في زمن الطيبين يا معماري.

[معماري قطري]

مشكور يا بو زيد اضافة ممتازة

شوف الحجر ذيه جيري نظيف وجاي مقصوص وجاهز التكسير البسيط ذيه حتى يوزنه ويركبه بطريقة فنية يدوية ويركب الكسر الصغيرة ورا وبين القطع الكبيرة .. هذي الجدران تعيش مئات السنين ومادة أولية موجودة وسهلة تتركب بمونة اسمنتية وتنعمل حتى مباني منها من داخل بلاستر وتشطيب حديث حتى ممكن معادن أو خشب ومن برا تعطينا شكل الحجر

يمكن من أواخر البيوت اللي انبنت بالحجر والجص أو الطين بيت شفته مبني الجزء السفلي حجر جيري محلي والعلوي طابوق والسقف دنجل .. انبنى في منتصف الستينات تقريباً وانبنت معاه بيوت مشابهة عندنا ذيك الفترة منها بيت جدي وبيت خالي الله يرحمهم .. بيت خالي توه منهدم من أيام ويبنون مكانه ألحين .. من مميزاته غرفه الغربية فيها فتحة صغيرة قرب السقف وفاتحة الغرف على شرق ولها درايش صغار خشبية هذي يدخل منها هواء معتدل وقت العصر ويطلع الهواء الحار من فوق .. كان مؤجر لآخر أيامه قبل ينهدم والله يرحم من سكن فيه

جات بعدها فترة ازدهار الطابوق واعتماده للبناء وبعدها الخرسانات والحديد وما يعرف بالبناء الحديث

أحد الاخوان راواني قطعة حجر من قطر مقصوصة ووتر جت تبين فيها عروق سود وبيج وبيض متداخلة تداخل غريب تقول لوحة فنية .. قلت له شقصتها؟ قال عندي في الزرع بنيان متميز منها وهو شغل في الممنوع لأن الحكومة خايفة يخلص حجر قطر ومانعة استخدامه في البناء .. يقول البنيان صغير لكن مقصوص بهذي الطريقة ومصفوف بعمال حرفيين من اليمن .. يقول البنيان خيالي ودعاني امر اشوفه ولا رحت يبي لي بعد كورونا بإذن الله وباخذ قطعة تذكار

[سالم الزهران]

فيه بيت شعري قديم وخفيف عن البنيان..

يقولك..
الا يا يماني كيف تبنون بالحجر
نديره نديره ثم نبنيه بالقطر

وكأن النشيد هذا أو البيت حوار بين اثنين سؤال وجواب.. لكن لا يفوتك يا بشمهندس أن في الجواب مذكور أهم قاعدتين في البنيان بالحجر.. وهي (معرفة وجه الحجر من قفاه).. *فاصلة (طرى لي ولد العرب)
وهالشئ ما يبين معك الا اذا دورت الحجر وعرفت وين وجهه. اما يوم يقول (نبنيه بالقطر) يقصد بشكل مستقيم وعلى المستوى.. وهذي القاعدة هي اللي تحكم البنيان.. واخترعوا لها الخيط اللي يوزنون عليه المباني.

كلام يجر كلام و ترى المواهب والحرف هذي مدفونه في خاماتنا كخليجيين بس يبغي من يشجعها ويدعمها.. على الاقل اللي ما له علاقه بالتكنلوجيا مثلي ينفع يشتغل معلم بناي ولا نجار ولا شغلة زينة تفيد المجتمع.

[معماري قطري]

خلاص اللي مثلي ومثلك ما تأهل وهو صغير صعب يتأهل ألحين لكن ممكن ياخذها هواية ويبدع فيها .. هذا رفيجنا اللي ذكرته قبل من محبي الحجر الطبيعي من بيئة قطر .. أصر يبني مبنى اداري للعمل وكان هو مديره قبل التقاعد بالحجر وزرع حوله وجمل .. صراحة يستحق وسام وهو شخص معروف وانت تعرف إخوه عدل لو شاءت الظروف وتحسنت أوضاع كورونا والله عطانا عمر بنمر مجلسه إن شاء الله

[سالم الزهران]

خلاص اللي مثلي ومثلك ما تأهل وهو صغير صعب يتأهل ألحين لكن ممكن ياخذها هواية ويبدع فيها .. هذا رفيجنا اللي ذكرته قبل من محبي الحجر الطبيعي من بيئة قطر .. أصر يبني مبنى اداري للعمل وكان هو مديره قبل التقاعد بالحجر وزرع حوله وجمل .. صراحة يستحق وسام وهو شخص معروف وانت تعرف إخوه عدل لو شاءت الظروف وتحسنت أوضاع كورونا والله عطانا عمر بنمر مجلسه إن شاء الله

الله يكرمنا بلقائكم يبو عبدالله

[معماري قطري]

الله يكرمنا بلقائكم يبو عبدالله

إحنا اللي نتشرف بالطيبين من أهلنا