يوتيوبيات البناء .. مقاطع تثقيفية متجددة

[معماري قطري]

اللي بيسوي درج خدمات حلزوني خارجي نصيحة يسوي له كسرة مصممة من الأساس داخل حيز البيت بس تكون مفتوحة من تحت لفوق ويركب باب حديد تحت ويسوي الجوانب كلها مسكرة مع مداخل للدرج لو حب من الدور الأرضي والأول ولو عنده بنتهاوس كذلك

يقدر يخلي الباب الخارجي السفلي حديد وينفتح فقط من الداخل للأمان فلو حب يدخل عمال للصيانة حد يفتح لهم الباب ولو احتاج لإستخدام الدرج مهرب طواريء بيلقى الباب التحتي ينفتح بسهولة من الداخل

[معماري قطري]

شغل غلط بكل المقاييس والمهندس ذكر فقط تغليف البايبات بالعازل .. كان المفروض عمل غرفة للمعدات أو أقل شيء تظليل وكان بيكون عندنا منظر أحلى واستغلال أفضل للسطح

الغرفة 2 في 3 = 6 متر مربع وبدون أي تشطيب حتى تركها ببلاستر داخلي يمشي الحال وما يكلف بنيانها شيء لكن تحفظ معدات الماء والتسخين وتدوير المياه والفلتر

تدوير المياه الباردة حل مثالي بس هم مسوينه لمسافة قصيرة لأن بايباتهم بعدين يدخلونها معلقة تحت السطح بدال ما تمشي فوق السطح ويصخن الماء أكثر

[معماري قطري]

هذه رسالة كتبتها للمهندس بخصوص الفيديو السابق وتفيد للجميع

سمح لي اخوي بهذي النصيحة .. المفروض معدات المياه من فلتر الى ضاغط الى سخانات مركزية الى خزان المياه الى مضخات تدوير كلها تكون في غرفة مظللة ومحمية من العوامل الجوية .. يستحسن مبنية طابوق وخرسانة ومركب لها باب فقط مكينة التبريد خارجية للتهوئة ومظللة عن وطأة الشمس

تدوير المياه حل جيد وفعال سواء للبارد أو الحار وشبكة وصندوق الكهرباء المفروض محميين وبعيدين عن مصادر المياه

البايبات المفروض كلها تكون فوق بلاطة السطح تحسباً لأي تسريب غير مرئي وتكون معزولة حتى تخف طاقة التبريد أو التسخين لأن فقد الطاقة يعني اشتغال التبريد بطاقته القصوى وكذلك التسخين

في الأخير عندي انا ضابط الحرارة على 37 ويجيني الماء بارد كثير اضطر اخلطه مع شوية ماء من السخان غير مبردï

[معماري قطري]

مكيفات ال جي وسامسونغ السبلت فيها ميزة مهمة أو في بعضها وهي الإمداد بالاوكسجين من الخارج وكذلك خاصية المروحة الهادئة وهنا عرض للجديد ولا ذكر هذي الخواص المهمة

[معماري قطري]

عشر سنوات ضمان على الكمبريسر المزدوج



ما ادري حد جربه؟

[معماري قطري]

جزاهم الله خير الشباب الخليجيين على هذي التوضيحات المهمة والسهلة للجميع والأفكار بسيطة بس لازم ينتبه لها اللي بينفذ واللي يتابع بيته

[معماري قطري]

فيديو مرعب شوي لهبوط بلاط حوش بسبب ضعف الدك ونشوء دحل صغير تحت

هذي الحوادث نادرة بس مهم ينتبه اللي يبني أثناء الحفر لأي أرضية ضعيفة ويطلب زيادة الحفر والعكس لو الاتفاق على الحفر مترين للتأسيس ووصل أرضية صلبة على عمق متر يوقف الحفر .. والأهم من الدفان على طبقات والدك الجيد هو استخدام صبية في الأخير تحت البلاط بسمك 10 - 15 سم .. والدفان يكون متدرج بدون حجارة كبيرة

[سالم الزهران]

يعطيك العافية معمارينا الحبيب
هل ممكن تسوي سقف زجاجي! اقصد جزء منه مثل المون رووف ؟

[ولد العرب]

هلا سلوم
خل عنك معماري مكلف في مكلف ماتشوف ماعلق على مشاركاته هنا غاااااالي وافكاره توديك في ستين نكبه
هو تخصص 5 ستار بس
اما فقراء والغلابه لهم الله
خريج امريكا وش تترتجي منه غاااالي


تعال عتدي انفعك بافكاري الرخيصه والزين والخصومات لها بكل مكان عند عيال البنغال وعيال بص حضرتك دي حاجه هايله اووي

هذا اول افكاري لو تبي تظلل سماء الفريج حاضرين
تفضل

اذا اعجبك فتحت دكاني جنب معماري



وبعدين سالم خاف ربك خاف ربك ناااااس تدور سقف من اي شي
وانت تدور قزاز شنو ذا
واذا جارك زعل عليك تتوقع حجم الحصى على قزازك هههههههههههههههههه ( ادري شدخل )

[سالم الزهران]

هههههههه الله يا ولد العم .. شهالزين
حنا لوبدينا مثل البنقال او بص حضرتك بنوصل بس ثقافة الكسل وهين فلسك ولا تهين نفسك لين يجي يوم ما تلقى احد يشتغل لك

لكن يا ولد العرب العزيز،، فيه قطعة ارض شبه مستطيل ..وجايه آخر الملك ولاحولي الا شجر العرعر والغرَب

فكرت لو الواحد بيسوي وحدة سكنية صغيرة وبالنسبة للسقف فعلاً طرت لي الفكرة بس اكثر شيء قلت شلون تحصل زجاج شفاف وقوي

لان بالليل تشوف نجوم كنت في صغري اراقب القمر يوم يختفي ويظهر من ورى السحاب ونقعد نتوقع من وين بيطلع من اي طرف

كل اللي عاشوا في البوادي والارياف يذكرون الشيء ذا و ادري الفكرة خنفشارية بس اذا ما سويتها في مبنى صغير فما راح تسويها!

ما تذكر يا ولد العرب يوم كنا نقول

يا قمر يا هلال ،،، ادع بوي من المسيد