يوتيوبيات البناء .. مقاطع تثقيفية متجددة

[معماري قطري]

بو زيد طلعوا عندنا في الوطن العربي أشخاص مختصين ما يقصرون يبرزون حقائق هندسية صحيحة 100% وبدائل جيدة وأوقات تجارب بعضها تكون خادعة حتى لهم وأوقات بعضهم يغتش بكلام المسوقين

المشكلة بعضهم تناقشه نقاش هندسي عقلاني يطلع لك شخص ثاني يرد بحقد لأن تعريفي في اليوتيوب فيه اسم قطر بس وهو تحصله من تابعين الظالمين .. قليل من الملمين بالشغلة يؤكد كلامي وهذي مشكلة الناس العامة يمشون وراء الدجل الهندسي وكلام المسوقين

أمس مريت على واحد يبني غرفة زجاجية في الحوش وكان توه يؤسس لها بعمدان حديد .. 4 في 4 وكل زاوية عمود .. كافي وزيادة لكن الفني اللي يشتغل له ناوي يحط أعمدة وسطية .. بيكون خرب منظر الزجاج مفتوح أكثر شيء ويمكن بدون دراية قلت خلها بس في الزوايا وعلى مسؤوليتي لو صار شيء .. السقف بيكون خشب عليه قرميد وبشوف لو يمدنا بصور للشغل باحطها بإذن الله وأخ معانا في المنتدى ناوي يبني وحدة وانا اقتنعت بها كفكرة للبيت الجديد إن شاء الله

[سالم الزهران]

الجهال واجدين، ويصعب عليهم تقبل النقد..حنا مشكلتنا يبو عبدالله لو بغيت غرفة زجاجية او خشب تيك مثلاََ او اللي هي؟
تكلفة المواد 2000
تكلفة الفني أو الورشة 2000 مثلاََ
تكلفة التركيب 2000 مثلاََ فقط نمثل

الحين المقاول او التاجر ليش يطلب عليه 25 الف؟

ليش يبغي يكسب اكثر من كلفة المادة وتصنيعها وتركيبها؟

بكم الدرابزين؟ كم النحاس والحديد والزئبق الاحمر حتى؟

كم مكينة القص او النحت بالليزر.. بكم ساعة العامل؟

طيب ليش اسعارهم ب30 و40 الف؟

البلاء ان البيوت لو صارت من ورق مقوى راح تكلف دبل الدبل.. والاسواق ما استفدنا من الانفتاح عليها بلعكس نفس الشيء اللي عندك بالخليج متفاوت سعرة من بلاد للثانية وفي بقية العالم ارخص بعد.

[معماري قطري]

دوم إخوي سالم فيه بدائل .. صدقني جشع التجار عندنا غير طبيعي ومستغرب هالشيء عندكم لأن سوقكم كبير واستهلاكه يمشي بسرعة .. عندنا عذرهم الشغل قليل

أحب التوجه في التصميم اللي اسمه Minimalist ما ادري وشي اقرب ترجمة لها يمكن الاقتصادي .. هذا يقول لك إذا بتصميم حاول تخلي هيكل البناء يخدم الديكور ويكون بس كافي .. حاول تسوي درج بحاجز طابوقي فيه فجوات تجميلية بدال الدرابزين بتوفر حول 90% .. إعمل بيتك بتكييف بسيط .. ما فيه داعي للحجر والرخام الغالي .. حاول تسوي تصميم انشائي مدروس ما يكلفك وايد

توجه معماري قديم يقول Less Is More حاول تقرأ عنه هذا يصب في نفس التوجه الأول ويعني انت تسوي المطلوب وكفاية تكون سويت الكثير

تواجه ناس غريبين أطوار يقول لك واحد انا ابي ارتفاع الدور 7 متر وابي دورين بس 7 و 7 = 14 وهذا المسموح يحط الاستشاري في زاوية ضيقة ويكفخ فيه .. نسى إن الارتفاع المسموح يكون من الشارع .. الحوش ممكن 30 سم كفاية عليه تحصله يقول لا ابغي بيتي متر مرتفع .. زين المتر لازم تخصمه من ال 14 ما يستوعب .. بعدين بيستوي مدخل بيتك صعب للدخول حتى بالجيب .. يقول لك انا شفت بيت واللي شايفه يمكن قصر كبير متدرج في ارتفاعه وله طريق داخلي مب رامب قصير

واحد سكن قرب بيت راعيه مصممه مدخله برامب مرتفع لين الدور الأول والسيارة توقف فوق وميت على التصميم يبي يسوي مثله

المشكلة الموجود ما يركب على بيت عادي ويحتاج مساحة بمستوى قصر حتى لو الارض 2000 متر مب حلو عليها حتى يمكن 3000 تحتاج مدخل طويل وبعدين هذا الدوار المتدرج في الإرتفاع واللي يكفي حتى لسيارتين جنب بعض يمرون .. كل شيء بتسويه يستوي بس فيه شيء لائق وشيء غير لائق

[SouthK]

حاول تسوي درج بحاجز طابوقي فيه فجوات تجميلية بدال الدرابزين بتوفر حول 90% ..

ممكن صورة او رسم للتوضيح؟

[معماري قطري]

ممكن صورة او رسم للتوضيح؟

بحاول اشوف لك وحطيت في موضوع مراجعة المخططات سكتشات بسيطة .. ممكن جدار خرساني بسمك بسيط حتى 5 سم يمشي أو 7 سم وتسوي فيه بعض الفجوات .. ممكن تصميمك للدرج مثل درج بيتي يمشي بدون درابزين ويمشي بمسكة درابزين

[سعود.]

تقصد كذا ( ابا عبدالله )
اوفر للمال بكثير شفت موضوع له يسونه بعد من انتر لوك

[SouthK]

بحاول اشوف لك وحطيت في موضوع مراجعة المخططات سكتشات بسيطة .. ممكن جدار خرساني بسمك بسيط حتى 5 سم يمشي أو 7 سم وتسوي فيه بعض الفجوات .. ممكن تصميمك للدرج مثل درج بيتي يمشي بدون درابزين ويمشي بمسكة درابزين

تقصد groove بحجم معين على طول الدرج؟؟؟

[معماري قطري]

تقصد كذا ( ابا عبدالله )
اوفر للمال بكثير شفت موضوع له يسونه بعد من انتر لوك

نعم بالضبط هذا أحد الأشكال والتصماميم .. وأكيد يسوونه بطوب محلي شبيه للانترلوك وحتى الانترلوك ينفع بعدين يشكلونه بالبلاستر على كيفهم .. ممكن بالخرسانة وفيه فجوات معينة والا حفر طولي يكون قبضة وفيها انارة مخفية .. تفاصيل الشغل كثيرة وفي يدك تتحكم فيها وتطلع جميلة وبسيطة .. مثلاً هذا الدرج يبين خشبي وعليه سجاد إحنا حتى البلاط الشعبي يمشي أو الدرج باسمنت معمول بشكل يدوي والحواف شوي لافة حتى ما تنكسر بسهولة وعليه سجاد .. مسوي في بيتي ببلاط شعبي وعليه سجاد ودرابزين رخيص المنيوم مركب من الجنب ما وصلت تكلفته 5000 ريال

[معماري قطري]

تقصد groove بحجم معين على طول الدرج؟؟؟

سواء قروف ( حفر ) أو مسكة مثل اللي حاطها سعود أو شبيهة حتى الالمنيوم حلوة والحديد تجي أشكال وتكون وايد أرخص من درابزين كامل ومنها الستانلس ستيل الدائري

[معماري قطري]

هذا ردي على اليوتيوب هذا

" الله يعينك وذيلا ما عندهم ثقة في منتجهم وناوين يستغلون جهل بعض الناس ويسوقون عليهم .. مرة طلب مني أحد المقاولين محاضرة للتوعية بمشاكل البناء والعقود قلت انا حاضر بس بتكون المحاضرة عامة ولي الحرية في التنبيه بكل الثغرات اللي يستغلها المقاولين قال ابغيك تركز على أخطاء الملاك وتغييراتهم .. قلت له هذي من ضمن المواصفات العامة للدولة يحق للملاك تغيير بالزيادة والنقصان بحدود 20% من تكلفة المبنى .. قال ان شاء الله بنحدد موعد وبنكلمك للتأكيد وهرب ولا كلمني وكان يفكر في محاضر يلمع صورة المقاول ويحط اللوم على المالك ولا ينبه المالك لحقوقه .. هذا اللي يصير عند المسوقين أما المهندس المحايد الواعي يناقش الفكرة والمنتج والطريقة والمحددات التعاقدية .. انا مع عرض المنتج واسم الشركة وأأيد الدعاية المستحقة للشركة وبنفس الوقت الدعاية السلبية لو المنتج ما يسوى وهناك بديل أفضل .. ببساطة مع النقد الهندسي المحايد وحتى بيكون مهم لإصلاح أي قصور "