تعودت اشوف الماي واعاينه وبعدين اتذوق شوي منه ليكون ماي آبار والا بحر
طريقتهم في العزل أصح من طريقتنا والقصد لدورات المياه
عندنا يسوون العازل تحت بايبات الصرف وبعدين يدفنون وبعدين يحطون سكريد وبعدين يبلطون هم يعتمدون إن بايبات الصرف الصحي محكمة التوصيل واللصق وهذا هو الصحيح ثم يعملون عليها سكريد بميلان ثم يعزلون فوقه ويسوون فتحة بسيطة في الصفاية لمرور أي مياه متسربة للصفاية ونزولها
بعض الآبار حلوة وبعضها مالحة والملح مشكلة وهي مجموعة أملاح وبيكربونات وهذا اللي يخرب الصبغ خراب دائم .. صارت عندنا في السابق مشكلة كبيرة في مجموعة مساكن شعبية بريكاست .. كانوا مانعين المقاول من التزود بمياه عذبة نظيفة لصب الخرسانات في المعمل ووجهوه يحفر بئر .. وعمل بنصيحتهم وبعدها طلعت تشققات كبيرة وصدأ في الحديد واستوت كثير من المباني هذي تحتاج هدم وهي ما كملت 30 سنة .. الخسارة استوت قومية بسبب توفير مياه ورأي مسؤول يمكن يكون على قد حاله علمياً وانوجد في المكان الخطأ
المواد الكيميائية نوعيات متعددة ولكل مادة غرض ومواصفات وضروري حتى نضمن استخدامها واضافتها يتابع استشاري مختص في الموقع أو ناخذها مخلوطة وجاهزة من مصنع خرسانة معتمد ونتأكد من مطابقتها للمواصفات من المختبر المختص