تعقيب على كلام اخونا ومهندسنا الغالي معماري، قبل يومين كنت اقرأ بعض الشغلات عن الاسمنت، حصلت ان الاسمنت له أرقام؟ رقم 1 و رقم 4، فطرى لي اسأل عنها لكن نسيت.
المهم بغيت اسأل اخونا بو عبد الله، هل يفرق العمود المستطيل عن الدائري في فايدته او استخداماته؟ هل الأحمال على العمود الدائري تختلف عن المستطيل؟
وشككككراََ
اللهــــــم ارحم أخي فايز واسكنه فسيح جناتك وسائر أموات المسلمين
حياك الله إخوي بو زيد والنقاش معاك ممتع .. العمود المستطيل في الغالب يكون في اتجاه الجدار والجسر معاه تسويه حتى يعادل العزم المتولد من الوزن .. العزم يكون التفافي أو دوراني يخلي راس العمود يميل في إتجاه الوزن الأكثر .. تخيل عندك مسطرة خشبية تبغي تحنيها بتحنيها في الإتجاه الضعيف أو الجزء قليل السمك بتحصلها تنحني بأقل قوة أما في الإتجاه الثاني الصعوبة تكون وايد كبيرةالمشاركة الأصلية كتبت بواسطة سالم الزهران
العمود الدائري نستخدمه في الوسط بحيث ما يكون داخل جدار ومخفي .. أكثر حميمية تقدر تقول واحساسك بوجوده يعطيك قوة وأمان مثل أعمدة المساجد الوسطية بعضها تجي مستطيلة أو مربعة وهذا تصميم ناقص أو ما يرتقي للعمود الدائري .. الدائري شغله أصعب وقوته وحدة في كل الإتجاهات .. المستطيل والمربع سهلين للتنفيذ والمربع شبيه للدائري بس قوته شوي تختلف في الزوايا غير 0 و90 والإتجاهات المتعامدة عليه
قبل كان الفن موجود وينحتون العمود نحت من الحجر أو الرخام أو الغرانيت ويخصرونه يجي الثلث التحتي ثابت الدوران والثلثين فوق بالتدريج يقل قطر دوران العمود يطلع فيه فن
العمود اللي أحبه انا وسهل ينعمل بعد المشطوف في الزوايا أو خل نقول الزاوية اللي تبين مثل اللي في تصميمي لبيتي .. طريقة الشطف فيه عدة طرق لها دورانية لافة أو سيدة أو مقوسة تقويستين أو ثلاث وهنا يدخل فيها الفن وممكن بالبلاستر بسهولة أو بالنحت وتكون دخلت في تعقيدات وسعر عالي وممكن يصير صح أو لا .. مثل عندنا مول الحزم والقائم على بنيانه صراحة تفنن فيه وطلب المستحيل وشفت شلون راح يختار النحاتين وجابهم وتابع شغلهم وفي النهاية قطف ثمرة جهده ولو يقول خسران ما اصدقه رابح رابح رابح كفاية الإنجاز والصورة النهائية المتقنة
كانوا قبل الرومان يسوون أعمدة ضخمة للكنائس ويضيفون لها أعمدة مساعدة تدعمها من الحركة الدافعة الجانبية اللي تسبب إنهيارها المفاجيء خصوصاً وقتهم ما كان فيه حديد تسليح .. المسلمين أبدعوا في عمل أعمدة ضعيفة تحمل السقف أو القبب وتخلصوا من القوة الدافعة الجانبية بقطع خشب تربط رؤوس الأعمدة بشكل أفقي وتوازن القوة الجانبية الدافعة وتخلي غالبية اتجاه الوزن لتحت ويقدر عليه العمود الضعيف وهنا يجي الإبداع إنك تصمم بنيان مدروس وضعيف ويعمر أو تزيد زيادة بلا معنى وبنيانك يكون ضعيف ومعرض للإنهيار
من النماذج اللي نجحت وتحدت الزمن والزلازل مساجد كثيرة في اسطنبول مبنية بهذي الطريقة وتوازنت وعاشت وبينان ثقيل حديث إنهار ولا قدر يقاوم الزلازل
هذا فيديو شرح بسيط للي تكلمت عنه عن القوى الدافعة الجانبية وشلون كانوا يعالجونها قبل .. تكلم عن ما يسمى Pointed Arches وهذا إختراع إسلامي بحت هم بدوا ياخذونه من المسلمين .. ببساطة هذي الأقواس المسننة أو الحادة من فوق تنقل الوزن وتحوله بالتدريج من جانبي لرأسي وبعدين غالب الاقواس تربطها في اسفلها قطعة خشب رفيعة تقاوم الشد وتوازن القوى الجانبية اللي تكون خفيفة .. أما قوسهم العريض والدائري هذا قوى الدفع فيه قوية وقوتها تقارب ضعف قوة اللي في القوس المسنن ويمكن أكثر وبحيث يكون عندنا نفس الإتساع لتباعد الأعمدة تحت .. بس قوس مسنن رفيع وبمواد اقل يعني وزن اقل وهذا يعني عمود تحت ضعيف
وهذي كنيسة مبنية بطريقة الدعامات الخارجية بس ماخذة حيز وما عليك قلدوا المسلمين في السقف المسنن والمنحني إنحناء حاد حتى يحول الوزن أكثر شيء رأسي مع محصلة قليلة جانبية .. انا المعلومات دارسها من خلال كورس تاريخ العمارة الكلام اللي ينقال وايد حشو ووجهات نظر مب كلام علمي دقيق
قبل كنائس كثيرة اندثرت وسقطت حتى أثناء بناءها وهذي اللي تعتبر حديثة بعد ال 1000 الأول للميلاد كثير عناصر مأخوذه من الحضارة الإسلامية .. هم ما كان عندهم الا القوس الدائري الدفش .. هذا فيه تأكيدات لكلامي تابعه
كنت أمر على بعض الكنائس واقول بنيانهم يشبه البنيان الخاص بالمساجد أو بعض المساجد .. تتغير بعض الحقائق مثل اللي يقول تراث الخليج تراث خاص به وإحنا نعرف إن القوة الموجودة في البناء والمعرفة ذاك الوقت فارسية فعادي المفروض ما ننكر أُصول الحضارات والبناء .. فيه حضارة
كنت باكمل ونسيت فيه حضارة يمنية قديمة وفيه عمانية بس كلهم لهم تدخلات مع حضارات ثانية أما قطر والبحرين والكويت والإمارات غالبية تراثهم مقتبس من فارس أولاً ومن الهند ثانياً والحديث بعد من حضارات ثانية وأغلبها البريطانية الكود البريطاني هو اساس مواصفات الدول هذي .. ومنها شرق السعودية .. غربها صحيح منبع الحضارة الإسلامية والعراق وسوريا حضارتهم فوق حضارات العالم وسوريا بلاد الشام يعني شاملة للأردن وفلسطين ولبنان وسوريا
ما قصرت يبو عبدالله.. معلومات ثرية يبي لي ارد اشغل المقطعين الأخيرة مالت الكنائس.. حقيقة معلوماتك من النوع اللي تلتقط بسرعة وتعالج السؤال المطروح..
اللهــــــم ارحم أخي فايز واسكنه فسيح جناتك وسائر أموات المسلمين
ضوابط المشاركة
رد مع اقتباس