يوتيوبيات البناء .. مقاطع تثقيفية متجددة

[معماري قطري]

[معماري قطري]

صحيح المقارنة مب واضحة وشاملة ولا يسوون نفس نظامنا إحنا شوي مبالغين في هبوط أرضية الحمامات 30 سم وهم 15 وأشوف بين الرقمين هبوط معقول 20 أو 25 مناسب لأن البايبات 10 سم وتحتاج سلوب بسيط والمسافة قصيرة يعني لو السلوب 2% وأقصى مسافة من نقطة صرف للنقطة الرئيسية 2 متر بنحتاج هبوط 4 سم وبعد تكفي ال 15 سم فوقها 4 سم سكريد بميلان نحتاج حول 5 زيادة وفوقها تشطيب الارضية بحدود 1 سم وفوقه ممكن نزول بسيط عن أرضية الغرفة نقول 2 سم بيكون 22 سم هبوط مناسب وأتوقع المهندس المصمم في يده يحدد الهبوط بدقة حسب مساحة الحمام وأبعاده .. بعدين يكون السكريد الخفيف بدال الدفان أفضل لتحت البلاط

[معماري قطري]

تعودت أبدي رأيي الهندسي في موقع اليوتيوب وهذا كان تعليقي على هذا الفيديو

" الله يتمم الشفاء عليك يا زميل المهنة ومبروك عليك افتتاح المكتب في هذا العمر وانا إخوك من قطر خبرة تقارب ال 30 سنة وأقدر الخبرات الهندسية وتحليلك صحيح ومتفق معه بس استغربت تقول الرياح السائدة شمالية غربية وهذا الصحيح وتقريباً في كل العالم .. لكن السهم يشير للجنوب الغربي وصراحة أشوف وضعية البيت خادمة بأنه غير مفتوح على جهة الرياح

الملاحظة الثانية دوم يتم الحديث على اتجاهات الشمس وانا نظرتي إن الشمس لها حلول كثيرة وممكن نطوع نورها لصالحنا ونستفيد منه والحرارة عندنا في الظل عالية جداً لذلك لازم نعتم بالعزل الحراري للجدران والأسقف وعمل مناور سقفية يساهم في العزل وفي الجمالية .. المناور في العزل تكون نقاط تبادل حراري مع الخارج والهواء الساخن بسبب قلة كثافته يرتفع لأعلى والبارد ينزل لتحت والمهم يكون باقي الحيز الفراغي معزول من الجوانب فلا تدخل حرارة بكميات كبيرة لا يقدر عليها التكييف

أخيراً حديقة بيتي مقسومة لسبع أحواض زراعية عملتها من التأسيس لعمق يصل لمترين وبتربة زراعية وأشكال غير منتظمة بعضها أكثرها مقوسة تحدد دوار وسطي وبعضها طولية وغالبية الحديقة شمال البيت وعندي جنوبية صغيرة بعد وأعتقد نظام توزيع مكونات الحوش مع توزيع المساحات المزروعة مع مواقف السيارات مهم والأهم أكيد توزيع المباني .. باب بيتي الرئيسي شمالي جانبي وباب الصالة شمالي وسطي للحفاظ على خصوصية المدخل وبالنسبة لخصوصية الجيران الحلول كثيرة في السواتر والجدران وأيضاً بناء ظهر البيت مقابل بيت جار وأوقات تحكمك الأرض مضطر تعمل واجهتها مقابلة الشارع الرئيسي ولكل وضع حلول "

[معماري قطري]

[معماري قطري]

نقاط كثيرة ممكن تحسن على هذا التصميم وفكرته حلوة وفيها شراحة

[معماري قطري]

[معماري قطري]

عزل خرافي مجرم

[معماري قطري]

ما كنت فاهم قصة تأخير تفاعل الاسمنت وتصلبه بما يسمى Retarder بالعربي ممكن يكون مؤخر .. وفيه مواد تضاف للخرسانة غالية وتعطينا نزول أكبر لإختبار القمع مما يعني الخرسانة تغلف الحديد كامل وتدخل في الفجوات وتقلل التعشيش وبنفس الوقت تأخير التفاعل يعني تقليل درجة حرارة الخرسانة فلا تحدث كسور وشلوخ تضعفها وخصوصاً في الطقس الحار .. السكر بكمية تعادل 0.1% من حجم الإسمنت المستخدم في الخلطة يعمل هذا ويعتبر حل اقتصادي وسهل

إذا افترضنا الردي مكس فيه حول 5 أمتار مكعبة خرسانة من خليط مياه 40% من حجم الإسمنت ورمل وكنكري بعد نسبة كبيرة قد تصل لحدود 40% وكمية الإسمنت تكون معقولة وممكن الحصول عليها من جدول مكونات الخلطة اللي يجي مع سيارة الردي مكس متى طلعت وكم الحرارة وقتها وتقاس بعد في الموقع وتسجل المفروض وللقياس مقياس خاص معدني يدخل لعمق جيد في الخرسانة .. نفترض 1 متر مكعب بين ال 5 أمتار اسمنت أو 1000000 سم مكعب نحتاج لها ما مقداره 100000 سم مكعب سكر أو 100 لتر

[معماري قطري]

هذا مسوي تجربة للخرسانة بمياه قليلة وهبوط قمع قليل وبعد اضافة السكر الهبوط كبير مما يعني سهولة التعامل معاها وصبها ودخولها بين الحديد وعدم التعشيش بس بدون زيادة الماي اللي يؤثر في قوة الخرسانة بس القوة اللي تكتسبها تتأخر شوي ما توصل لها بسرعة

[معماري قطري]

ما حصلت التابع للفيديو السابق بس حصلت ذيه .. والخلط بالوزن 2.2 غرام سكر حق 880 غرام اسمنت و 1980 غرام رمل ونسبة الماي للاسمنت 45% .. نسبة السكر للاسمنت تطلع 0.25% بالوزن وعطتنا النتيجة المطلوبة من القوة خلال اسبوع أعلى .. الجداول في الفيديو وهي المهمة كلامه كله خرابيط .. وفي الجدول الثاني نلاحظ حرارة الخرسانة بدون أي إضافات ترتفع وتوصل أقصاها بعد 9 ساعات ونص وترجع تنزل .. بالإضافة القليلة للسكر نسبة الخلط اللي كتبتها بعد ترتفع مباشرة بعد الخلط وتوصل أقصاها في حول ساعتين بس أقل بحدود 10 درجات فهرنهايت عن اللي بدون اضافة سكر .. والجدول اللي بعده يوضح القوة اللي توصل لها الخرسانة بعد يوم وبعد اسبوع وبعد 28 يوم والأفضلية لإضافة السكر القليل والكثير خلاص العينات فشلت

الإستفادة الكبرى نزلنا الهبوط بالسكر الى 9 سم وشوي بدال ما كان 4.6 سم يعني سهولة لوضع الخرسانة وتخللها فيما بين الحديد ونزلنا حرارة التفاعل المبدئي وكذلك قوة الخرسانة أعلى بحدود فوق 10% مع نهاية 4 أسابيع



ثاني شيء مهم بالنسبة لي هو نسب الخلط بالوزن وهذي سهلة نعرفها الوزن الحجمي للرمل يقارب 1800 كجم للمتر المكعب يعني تقديرياً 1 متر مكعب = 1800 كجم قريب من الرقم بالغرام اللي حاطه ونقدر لو حبينا نحوله كله للكيلو .. متر مكعب رمل + 0.4 متر مكعب اسمنت + 0.18 متر مكعب ماي + 0.25% سكر من وزن الإسمنت اللي يعادل في حالتنا 720 كيلو يعني نحط 1.8 كجم سكر وتستوي الكيكة عندنا مناسبة وقوتها تعادل 67430.73 كيلو نيوتن في المتر المربع